Октябрьданул 23-нний Дагъусттаннал бакIчи Сергей Меликовлул дунни ДР-лул Призыврал комиссиялул ва Оператив штабрал цачIусса заседание.

Цаймигу масъаларттащал архIал ххал бивгьунни ссуттил инсантал аьралуннавун къуллугъ буван буцаврил масъалагу. Аьралуннаву къуллугъ буван буцлай бур 2006-1994-ку шинал бувсса инсантал.
Аьралуннал комиссар Аьб­дурахIман Мурадхановлул тIи­мунийну, республикалий буцин ккаккан бувсса призывниктурал хъунмур бутIа тIайла буккантIий бур Аьрасатнал Федерациялул Ярагъбу Гужирдавун. Дагъусттанлувтал буцинтIий бур цаймигу аьралуннал сакиншиннавун (военные формирования), миннувух Аьрасатнал ФСБ-лул дазул аьралуннавунгу.
Ноябрьдания байбивхьуну пландалий бур призывниктал 10 ятIапрай тIайла буккан аьралуннал-транспортрал авиациялий.
АьбдурахIман Мурадханов­лул бувсунни кIантту-кIан­ттурдайсса призыврал коми­ссиярттал давурттал хIакъира­вугу, кIицI дунни призывниктал буцайни хIасул хъанахъисса захIматшивуртту ва ми духлаган дувансса ххуллурду.
Шагьрурдал ва районнал аьралуннал комиссариатирттан кумагран республикалул аьралуннал комиссариатрал зузалтрая сакин бувну бур кIанттурдал комиссариатирттайн лагайсса группа.
Дагъусттаннал бакIчинал тапшур бунни призыврал давурттавух чялишну гьуртту хьун муниципал сакиншиннал бакIчитурайн ва идарарттал каялувчитурайн.
Чялишну дачин дуван информациялул ва бувчIин бавурттал давуртту жагьилтурал ва миннал нитти-буттахъал дянив.
ДакIнин бутанну, призывниктал хасъсса дяъвилул операциялий гьуртту хьун къа­буцинтIиссар.
ХIадур бувссар
ХI. Аьдиловлул