Дагъусттан Республикалул бакIчи Сергей Меликовлул вай гьантрай къулбас дунни кIанттул цилакаялувшиндарал органнал 2023-ку шиналсса социал-экономикалул ккаккиярттахлу грантру дуллалишиврийн багьайсса Указрай.
ХьхьичIунсса кIанттурду бувгьуминнавух ва базилухьгу дур Лакрал район. Лахъсса зунттал районнал дянив Лакрал райондалул бувгьуну бур кIилчинмур кIану ва мунинсса бахшишран дулун ккаккан дурну дур ца миллион ва ряхттуршазарда къуруш.
ДакIнин бутан, хьхьичIунсса муниципалитетирттан грантру дуллай байбивхьусса 2008-ку шиная шинмай Лакрал райондалул ацIния шамилчинни хьхьичIунсса кIану бугьлагьисса.
Цалчин Грантран лайкь хьуссар Лакрал район 2009-ку шинал, 2008-ку шиналсса ккаккиярттайн бувну, аьщуйн щуну учин, Юсуп МахIаммадов райондалул бакIчину зий айивхьуну цалчинсса шинал хьун дурсса ккаккиярттахлу. Муния шийннай ва Грант ларсун дур гьарца шинал лув-ялув. Шамилва бувгьуссар цалчинмур кIану. КIану бувагу къабувгьуну лях ларгун дур так ца 2017-ку шин.
Социал-экономикалул ккаккиярттахлу грантру дулайни хIисаврайн ласайсса дур ларгсса шинал дянив муниципалитетрай хьусса хьхьичIуннайшивуртту.
Лакрал райондалий махъсса шинал хьхьичIуннайшивурттан ккалли дан багьлай бухьунссар чялишну чулийн буклакисса республикалул инвестицион проектру: цалчинма-цалчин лахъсса зунттал районнай уттинин чувчIав бакъасса ттизаманнул тIалавшиннардацIун бавкьусса, ялун бургангу аьнтIикIасса, оьрчIал мюхчаншиврун ва гьунарду итххяххан баврингу шартIру къулайсса детсад. Буршайн бияннин буллалисса ххуллу, райондалул шяраваллан марцIсса хIачIай щин дузал дансса мурадрай буллалисса кIива щинаххуллу: ца — ТтурчIайнна зунттуя Гьухъалив, цагу Ххюлусмату Гъумукун бияннинсса.
Лакрал райондалул бакIчи Юсуп МахIаммадовлул барчаллагь тIий ур муниципалитет цIунилгу хьхьичIунсса ххуттайн лахъан захIмат буллалисса гьарцагу идаралул зузалахь.
Жугу барча тIий буру Юсуп МахIаммадовлухь ва райондалул агьалинахь ца уттигу бюхттулсса хьхьичIуннайшиву. ЧIяру хьуннав зул хьхьичIуннайшивуртту ялунсса шинавугу!
Зулайхат Тахакьаева
