Октябрьданул 22-нний Дарбантуллал райондалий Дагъусттаннал бакIчи Сергей Меликовлул ва Аьрасатнал экологиялул операторданул каялувчи Денис Буцаевлул ххал бунни цIуну буллалисса цIинцIал сортировкалул комплекс, яла тиккура дунни Дагъусттаннай ТКО зана-кьала даврил система дузал даврил хIакъиравусса батIаву.
Тикку дурну дур тамансса давуртту: дурну дур заводрал къатри, дузал бувну бур транспортировкалул конвеер, машан ларсун дур аьркинсса техника ва дузал дурну дур оборудование.
Дарбантлив кунмасса компания бантIий бур Хасавюртуллал ва Къарабудахкантуллал районнайгу. Циняв объектирдан ларсун дур паччахIлугърал экспертизалул рязишиврийсса заключение, миннувух экологиялулссагу.
Объектирдал зана-кьала даврил аьмсса кьуват (мощность) хъанай бур 950 азарда тонна шинал мутталий, лув дагьмур (отходру) дишин хъанай дур шинай 570 азарда тонна.
Гьар шинах региондалий салкьи шайссар 1 миллиондалияр ххишаласса лувдагьру. ХIакьинусса кьини ми цинярда зана-кьала дуллай къабивкIссар, тIайла дуккайсса диркIссар дуччин 2 полигондалийн.
Кьянкьасса коммунал лувдагьру зана-кьала даврил цIусса системалийн бучIаншиврул республикалул ХIукуматрал Аьрасатнал ТIабиаьтрал министерствалущал ва Аьрасатнал экологиялул операторнащал цачIу хIадур бувну бур лувдагьру зана-кьала даврил реформа бартдигьаврин хасъсса чараннал комплекс.
2022 шинал къулбасру дурну дур му бутIуву объектру баврин хасъсса инвестициярттал проект бартдигьаврил ххуллул карталий.
Масъала ххал бигьаврий гьуртту хьуну бур республикалул исполнитель ва законодатель властирдал органну, мукунма АьФ-лул Федерациялул Советрал вакилтал, АьФ-лул депутатътал, Аьрасатнал ТIабиаьтрал министерствалул, ТIабиаьт дуруччаврил прокуратуралул, УФАС-рал, Казначействалул вакилтал.
«Жува хIакьину кIул хьуру цIинцIал сортировкалул комплекс баврил давурттащал ва жущава бюхълай бур кьимат бищун региондалий ТКО зана-кьала дайсса цIусса система дузал даврил давурттащал. Ва объектрал хIаллихшинну дуллантIиссар республикалул Кьиблалул зоналий.
Жунна ккарккунни строительствалул площадкалийсса цинярда давуртту. Заводрай зунтIисса техникалул ва оборудованиялул контрактру чирчуссар», – кунни Сергей Меликовлул батIаврий махъ лахълай.
Денис Буцаевлул тиккусса давурттан кьимат бивщунни. Ванал тIимунийну, Дагъусттан хъанахъиссар СКФО-лий цIинцIал реформа бартдигьаврил лидер.
Дагъусттаннай ТКО зана-кьала даврил захIматми масъаларттал хIакъираву махъ лавхъунни ДР-лул тIабиаьтрал министр Ратмир Расуловлул.
Ванал тIимунийну, захIматми масъаларттуну бур контейнердансса площадкартту биялну бакъашиву, хаснува зунттал зоналий. Зунттал районнай тIалавну бур дузал буван 2500-нниха ливчусса площадкарду.
«Республиканский экологический оператор» ООО-лул гендиректор Иван Морозовлул бувсунни цIинцIал сортировкалул комплексру баврил хасну дурсса давурттал хIакъираву.
