Махъзуманив ца яла чIявуну ишла буллалимур махъ бур квадробер тIисса махъ. МукIру хьунна, филолог бунугу ва мукъул мяънарагу къакIулссия ттунна. КвадрокоптердацIун бавхIусса махъ бухьунссар тIий буссияв. Интернетравун бурувгра. БувчIунни хIайвантрал, жанавартрал бурчурду куннасса лаххиягу, маскардугу ларххуну, вайннуха лащан хIарачат буллалисса инсантурайн учайшиву.

Цал вайннаясса нигьачIинна цукунссар, оьрчIзаманнай цIушинал байраннай жувагуния цулкIри, барцIру, бюрхру, цухьри хьуну бикIайссияв тIий бура, хороводру дуллай, ёлкалул лагма буклай. Яла-яла, ттаттахъал бухсса бартукьирттая ва рахIурдая ури магъругу дуллай. Дуванссар оьрчIал ттуккул вичIив, балчаннул магъ, гъалул чIири, шикку ци оьккишиву дур, оьрчIру щинчIав зарал буллай бакъархха, щихачIав цичIав дацлай бакъархха тIий бура. Ва масъалалувун куртI хъанан бивкIукуннив, аьламатсса ишру ялун личлан бивкIунни, хъуннабава арснал оьрчI щинзирданий авхIуну уккан уллалисса кьатIув, уссу уссийн балчаннул хьхьури лахлахисса. АцIния ххюра шинавусса душ ккаччи хьуну мукьччаннай заназисса.

Астапируллагь, инсаннал зумув ккаччил хIап циван къатIааьан бизави, ччиттул мявгума къатIааьн бизлай бур. Гьаннайсса, аьламатсса ишру. Буниялттунгу нигь рутлатисса. ОьрчIал тIуркIурду кунма чIаларчагу, психикалул цIунцIия душиву аьлтта чIалачIи буллалисса. Испаниянавусса душнил хавардив хъяхъавугума лачIун дуллалисса бур. Жагьилсса душ цуппа макьараоьрватIира тIий, макьарагу ларххуну, оьрватIи хьуну занай бивкIун бурча, полиция бувкIун, жанавартран социал пособие къабагьайссар увкуну бур. Циван хъин къахьуви, га ссят макьараоьрватIи душнил жура-жинсирайн кIура бавну бур. Амма жула ниттихъал бувайсса лахъуни дакIнин бутарча, хIазичун бунугу? Ттукку куна зузинайн «ттуккуй» учайва, туну утти на ттуккурав, ягу моднайсса мукъуйну учин квадробердав? Ягу шанан ххирасса бунутIий, «цушай» учирча, на цушарав?

Дунгъузру суккувагу къабанна. ХIиллакарсса инсаннайн цулчIа учайхьурча, мугурив квадробер? Ккурккуллал Щазал зумуну учин, «агар хIиллакартал квадробердур тIурча, щин диял къахьунссар ми шюшлансса». Гьаннайсса, ва мукъул на ттущалва нава ччалаччи бунна, пикрирдахун бувтунна. Дагъусттаннал Муфтиятрал хъунама Аьбдулла Салимовлул, оьрчIал ва чIаважагьилтурал дянив «квадробинг» тIисса суккушинна машгьур хъанай душиврийгу чIурчIав дурну, маслихIат бунни нитти-буттахъан оьрчIах ичIува къулагъас дуллан. Интернетрал биялалул ми хъяврин къабулланшиврул. «ОьрчI ур хIайвандалул костюмгу машан ларсун, «на ччитура», «на ккаччира» тIий мукьчаннайгу занай яхъанай. Агар зу учирча, жу зунттаву архну буру, мукунсса иширттаягу архссару куну, зу бяйкьлакьиссару, интернет зунттавунгу дирссар. Вана укун, интернетраву жулва оьрчIал дакIурдивун кьутIа тIий бур, лухIимур кIялар тIий бяйкьин буллай бур. Жунма ци буллан аьркинссар жулва оьрчIру махъаллил буван. Укунсса иширттая ххассал буван? ОьрчIащал гъалгъа тIун аьркинссару», – тIий ур Муфтиятрал хъунама. Ванал бувсуна, цал, нитти-буттахъал собраниялий, 10-15 минутIрай гьар кьини оьрчIащал гъалгъа тIутIисса нитти-буттахъал кару гьаз дувара учайхту, ца инсаннал ка гьаз къадуршиву, интернетравурив оьрчIал няравун ккаччил тIуллу дуллан аьркиншиву бакьлай бушиву. Гьаннайсса, квадробинг хIайвантрал ва жанавартрал тIуллу оьрчIан ххуй дизан дуллалисса, машгьур дуллалисса ххуллур. Социал сетирдай дур оьрчIру ккаччи-ччитрансса дукиягума канакисса видеосуратру, мукунна оьрчIру кIичIирттавух мукьччаннай лечлачисса видеосуратру.
Аьрасатнал президентнал пресс-секретарь Дмитрий Песковлулгума гьаз бунни ва масъала Владимир Путиннун квадробердая хавар бакъассар, ва суккушиннарал машгьуршиву мукссара хъун дуллан къабучIиссар куну.
КъакIулли ттунгу, лахъа-хъун буллалавурив, буниялттунгу нигь рутлатисса мугьалирив жулва ялун нанисса. ЧIумуй хъирив бувккуну, къаххуймунил дазу рирщуну хъинни. Оькки ххуй бизлазаврил мархри гьалххану итабакьланнин. Къавхьуннихха жущава «НякIсса кит» тIисса ва цаймигу вайннухава лавхьхьусса аждагьа тIуркIурдая, цала цивппа аьс буллалисса зулмулия буруччин биялсса оьрчIру. Буниялттунгу, интернетрал бияла ххув хъанай бур. Психологтурал, учительтурал, экспертътурал хъинну хъирив лавну ххал бигьин аьркинни квадробинграцIун бавхIусса масъалартту. ЧIумуй ххал бигьин, гьа…Лакку мазравун цIусса махъ цIакь хьуну къалякъиннав, ва хIакьинусса ттул макьалагу, квадробер мукъул дайдихьу дуллалисса хьухьурча, дайлитIугу шиччара нанисса хьуннав, «зул арс, душ квадроберди!» тIисса лахъуни къаляхъаннав.

ПатIимат Рамазанова