Октябрьданул 15-нний Дагъусттаннал ХIукуматрал председатель Аьбдулмуслим Аьбдулмуслимовлул каялувшиврий хьунни региондалий яттил ппал зана-кьала даву лядуккан даврил мероприятиярттал план биттур даврил масъалалул хIакъиравусса батIаву.

Премьернал тIимунийну, Аьрасатнал «Мусил ссут-2024» агропромышленностьрал выставкалул лагрулий Москавлив дурну диркIссар АьФ-лул территориялий ппалул рынокрал лябуккулул масъаларттал хIакъиравусса ведомстварттал дянивсса координациялул штабрал заседание. Ва хьуссар Аьрасатнал промышленностьрал ва машлул министрнал хъиривчу Олег Бочаровлул каялувшиврий. Шиккугу ххал бивгьуну бивкIссар план биттур даврил масъала.
Ппал зана-кьала даврил мероприятиярттал план биттур даврил хIакъираву премьер-министрнал тIимунийну, Аьрасатнаву ппал ласаврин хасну Дагъусттаннал бугьлай бур яла хьхьичIунмур кIану, ягу ласайссар билаятрай ласайсса цинярда ппалул 32 %, СКФО-лий ласайминнул – 65,6%. Гьарца шинах региондалийсса хозяйстварттал ласайссар 14,5 азарда тонна ппалул.

«Региондалий ласайсса цинярда ппалуя зана-кьала дайссар 3200 тонна», – куна премьернал.
ЦIанасса ппурттуву Дагъусттаннай дузал буллай бур промышленностьрал ппалул кластер, ванил лагрулий бартдигьлай бур 343,6 млн къурушрансса 4 цачIусса проект. Вайннул ахирданий дузал хьунтIий бур 147 зузи кIану.
Республикалий яттил ппал зана-кьала даврил мероприятиярттал план биттур даврил хIакъираву махъ лавхъуна Дагъусттаннал промышленностьрал ва машлул министр Низам Халиловлул.
БатIаврил хIасиллу дуллай Аьбдулмуслим Аьбдулмуслимовлул бувсуна шикку ххал бивгьусса масъаларттал ялув бацIаву дуллай бушиву федерал ва региондалул каялувчитал.

ХIадур бувссар
ХIасан Аьдиловлул