Ккуллаха
(поэма)

«Лаккуй Ккуллал колхоз дуссар
Ватандалийх цIа машгьурсса,
Гъумучиял шагьру буссар
Дурккуминнал щаращисса»
А. Гъапуров

Муданна лирчIун дуссар цIа дурксса Ккуллал колхоз,
Москавлий – хъун шагьрулий, ВДНХ-лул улттуй,
Колхозрал бакIчийталсса МахIаммадхIажий, ХIасан
Хъузалтрал кутак цIакь дан, захIматчийталну бивкIссар.

КIа ца колхоз дакъагу, бия зузисса завод,
Даххайва хIукуматран дикI, нагь, нис ва бурчу, ппал,
КIа дия бувсса кьулла, дурккуминнал «щаращи»,
Кандидатътал, доктортал кIикка чIявусса ливчссар.

Кьумавхъал МахIмудлул ва кIанал душнил Кулсуннул
Хъин дайсса диркIссар аьзар, цала кару сававну,
Буккин-чичин къакIулсса зунттал чувнал ва душнил
Къашайми ччяни ччаннай бацIан бувайсса бивкIссар.

КIайннал бивзсса гьанулий бюхттулсса чIира бувссар
Масухъал Аскандардул, кIанал арснал Кьубатайл,
Ххаллилсса хIакинталъя Аьликишил арсру, душ,
Райондалий бакъагу, щалагу Дагъусттаннай.

АцIния шанма тухум хIакинтурал ливчуссар
Уссар чинсса чув усса кIа Ккуллал шяравату,
Бархху-Авдулхъал тухум хъиннува абад буллай,
КьурбанмахIанма уссар халкьуннал лавай авцIун.

ЦIа дурк аьлимчувталъя Буржунхъал Гьарун, Киров,
Ккалайминнан кумаг бан, бакъа чара бакъасса,
АьлихIажи, Алексей мукъурттил усттарталли,
Балайчинан – балайлул, буккайминнан – чичрулул.

Лакрал журнал «ЦIузурун» акъа чара бакъасса,
Лакрал «Оьмар Хайямри» ХIажийнахъал Алексей,
ЦIа дурксса лакрал шаэр хъусрал Мирзан 100 шин
ПасихIсса мукъурттийну мунала кIицI ларгусса.

Дуккулий бакъассагу, захIматчитал чIявуссар
Бур чинсса чувтал бусса ттул чIаххуврайсса Ккулув,
Буссар хъинсса шофертал, цIа дурк механизатортал
Щалагу райондалул дахху-ласучийталгу.

Асли лавгссар Москавлийн, ВЦИК-рал членну бивкIссар,
Калининнущал цачIу рирщусса сурат дуссар,
КкивитI лавгссар крайрайн, хъун колхозрал вакилну,
Сусловлул мунин буллуссар «Барчаллагьрал чагъар».

Буккин-чичин къакIулсса, ххаллилсса зунттал хъаннил
Колхозрав буллай бивкIсса дакI марцIсса захIматрахлу
Та Совет хIукуматрал лайкьсса кьимат бивщуссар,
Щала ккуллал жяматран ми дакIнийнува буссар.

Адухъал НурмахIанма ЗахIматрал Виричувъя,
ХIухчийл ттуршайнгу агьну щала оьрму гьан бувсса,
ХIалима ва Сяидгу цIа дурк ризкьичийталъя,
ХIукуматрал Советрал депутатъталну бивкIсса.

Партиялул парткомрал, комсомолнал кьюкьлул,
Лагма лаган байссия хъузалт колхозрал даврийн,
Парткомрал бакIчий ия Мурачухъал МахIанма
ХIукуматрал Советрал депутатшиву дурсса.

Оьмарихъал Мусигу жагьилтурал бакIчийъя,
Комсомольцы бикIайва колхозрал даврил вирдакI,
Гулбарият лавгсия «Аврора» жами ккаккан.
Кабиратгу буссия съездрал делегатну.

Пизатлул оьрму най бур почтрал хъунмурну зинма,
ХIажийнахъал Айналгу луттирду машгьур буллай,
Аьбдул, Руслан зий бивкIссар зувирахъул шиннардий
Щарнил оьрчIал-душваврал цIакьсса тарбия дуллай.

Районналул кказитрал «ЧаннацIукул» магьиршив
Ахттар дуллай мукьцIалла шинну ларгссар Абреклул,
Районналул хаварду, вирттаврал чувшивуртту
Мунайхчилли баяйсса щалагу мухлукьатран.

Ххаллилсса «ОьрчIал багъ» бур оьрчI-душ тарбия буллай,
Лувату най никиран ас-намус лахьхьин буллай,
Шяраву аьзархана агьалинаха зий бур,
Зузисса хIакинтурал захIматран кьимат бишлай.

Лакран хъунмасса пахрур Даххаевхъал Муслингу,
Липецкаллал «ОМОН» сагъну ххассал бувусса.
КIа дакIнин багьанххурвав цIанамур хIукуматран
Мунал дурсса чувшиврул лайкьсса кьимат бищунсса.

Шяраву цIакьсса низам дуручлай зий бикIайва
Гатунхъал Оьмари ва Ражав, цIувкIуллал МахIмуд,
Пахал ХIасанхъал ХIадис, Маллахъал МахIаммагу
ХIукуматрал цIакьшиврул ялув бавцIун бикIайва.

Хъунмур оьрму гьан бувссар «Андропов» бакIчину
Районналул агьалий токрайну щаллу буллай,
ЦIанагу Серегин ур мунала ирсирай зий,
Районналул халкьуннан Ильичлул чани буллай.

Сяидхъал Камил зий ур жагьилтурал бакIчийну
ДакI марцIсса захIматрайну цала бурж биттур буллай,
Дагъусттаннал жагьилтал патриотизм зумувну
Щалагу Аьрасатнан эбратну сасан буллай.

Цумананни къакIулсса Виричув Халидлул цIа,
Буттал кIану буручлай цала жан кьурван дурсса,
Мунала ирс дуручлай цала жанну харж дурссар
Даххаевхъал Арсеннул, Мурачухъал Ширванил.

Уссурвал Аьлихан ва МахIанма зий бикIайва
Коммунистал, жагьилтал дакI марцIну зузи буллай,
Алексей ва Мирзагу ссавруннал заллухъруя,
Аьламравун чумартсса жагьилтал леххан буллай.

Шяраваллил бакIчитал Паша Рамазангу
Шяраваллил жяматран бусравнува бикIайва,
Шяраваллил бакI дургьун цIана Щамххала зий ур,
Шяраваллил агьалий шартIирдал щаллу буллай.

ЦIана Чупалав уссар племхозрал бакIчийну,
Хъун колхоз лиярчагу, ризкьичитал ябуллай,
Бакреслив ятту, дучри, хIухчалтрал маэшатри,
Лаккуй циняв фермарду ризкьилул дурцIун дури.

Лакрал районнал цIарду абад дуллай зий буссар,
Хъярту-Далил арснал душ, Нураттинхъал Карина,
Дунияллий чIивисса лакрал мухлукьатрал цIа
«Аьрщи ва агьлу» тIисса хIурматрансса цIанийну.

Спортсменталгу ливчуссар дунияллийх цIа дурксса,
Ччарча лачIун буккаврил, ччарча кару дишаврил,
Балайчитал ва къавтIалт Ккулату чIявусса бур,
Дагъусттаннал сахIнардай агьалий тяхъа буллай.

Виричувшив, патриотизм, ккуллал оьрчIал лозунгри
КIикка ливчссар чIявусса Вирттал ва патриотътал,
Миннал гьунар эбратну, чувшиву лахьхьай дарсну
Тарбия буллай буссар школардай оьрчIру-душру.

Ххирасса Ватандалийн кьини дурккусса чIумал
Цала жанну харж дурссар чумартсса ккуллал оьрчIал,
Миннан дирхьу гьайкаллу жагьилтуран «символну»
Ххяххабургъил тIинтталу мудангу партIий дуссар.

Районналул бакIчийтал Ккулату тамансса бур,
ДакI марцIсса захIматрайну жула район ядурсса,
Кьамма ХIасанхъал Шамил цIанагу бакIчийну ур
ХIикматсса аькьлулийну район цIу лаган дуллай.

Агь, «Ялтту-Ар», Ккуллал ар, дакъа чарабакъаса
Районналул магьирлугъ ина ашкара дара,
Циняв тяхъашивуртту ина кьамул дувара,
Амулданун ххяххивуй ина дирхьусса аьрщи.

ЧIиринугу, чIан куртIсса

Зунттай Къяннал щар дуссар
Тарихравун даргьусса,
Чумартсса вирттаврайну
Дунияллийх цIа дурксса.

Абулкьасин уссия
Финансирттал хъунману,
Та хъун дяъвилул чIумал
Маэшатралсса буллай.

Агъахъал ХIусайн, ХIадис,
ХIадислул арс Агъагу,
Бакрихъал Загьидатгу
ЦIа дурксса хIакинталли.

КIийла Раппий, цал Айгун
Министрталну бивкIссар,
Дагъусттаннал халкьуннал
Маэшат абад буллай.

Спортсменталгу ливчуссар
Дунияллийх цIа дурксса,
Мурадхъал Ширвани ва
Исупахъал Ирбагьин.

Аьрасатнал бакIрачIан
ЗахIматсса кьини дуркний
Жанну хIайп къаувкуссар
Гай Къяннал жагьилтурал.

Душмантурайн лажинну
Цала жан кьурван дурсса,
Аьрасатнал тарихравн
Укъакканну авгьусса.

КъаувкIунну нажагьсса
Аьрая шавай сагъну,
Хъами буми – хъанничIан,
Бакъами, ниттихъачIан.

Дурккуми бакъассагу,
ЗахIматчитал чIявуссар,
Балайчитал, къавтIалтгу
СахIнарду чIюлу байсса.

Цумананъя къакIулсса
Бакрихъал Сиражуттин,
ХьхьичIра-хьхьичI райондалийн
Бургъурдавух щин дурцсса.

Абулкьасинхъал Арсен
Ххаллилсса хIакинъя,
«Анаварсса кумаграл»
БакIчишивугу дурсса.

Мяшхьунсса бур вай жул къян
Щалагу Дагъусттаннай,
КIихIамаксса шярава
Шама министр увксса.

Район цIу лаган дурссар
Аьвдуразакьхъал Рапил,
АцIния мукьра колхоз
Дузрайн дуккан дурну.

ЦIа дурк юристътал ливчссар
Законну дуруччайсса,
Аькьилсса адвокатри
Аьвдурашидхъал Бакри.

СВО-луву цIа дурк
Цалчинма Виричуври
Энгельсхъал НурмахIаммад
ЦIа дурк чарвитул аслан.

Вия эбрат ларсхьунссар
Вай лакрал жагьилтурал,
Хъардугу бувхьунссия
Душманнал канийн къагьан.

Дурккумийгу чIявуссар
Дагъусттаннайх цIа дурксса,
ЧIиринугу, чIан куртIсса
Ва Къяннал шяравалу.

Цумананни къабавсса
Мязайхъал Казбеклул цIа,
Жула лакрал проза
Абадлий машгьур бувсса.
МахIмуд Аьлилов
ш. СунбатIул