Украиннал аьрщарай нанисса хасъсса операциялий, аьралитал бакъассагу, хIакинталгу чялишсса гьурттушинна дуллай бур. Аьралий операциялул талатавурттаву лайкьсса даражалий медициналул кумаг буллай, шайсса куццуй чIарав бацIлай бур жула медиктал. Къизгъинну бита-ххитавуртту нанисса кIанттурдай аьралитуран медициналул кумаг буллалисса хIакинтурал захIматран багьа бакъассар. ХIакьинусса оьрмулуву вайгу Вирттавран ккаллиссар. Цала оьрмулун нигьачIаву душиву бувчIлай бунагу, хIакинтал, махъаллил къавхьуну, ххассал буллай буссар аьралитурал оьрмурду. Мукунминнавасса ур СВО-лий гьуртту хъанахъисса, ВДВ-лул артиллериялул полкрал медпунктрал хIакин МахIаммад Шагьмарданов.
2023 шинал июльданул 1-нний контрактгу чирчуну, хушрай СВО-лий гьуртту хьун лавгун ур ва.
МахIаммад увну ур ЦIуссалакрал райондалийсса ЦIуссалакрал шяраву. Школалий дуклакисса ппурттувугу ва хъинну итххявхсса, хьхьичIунну дуклакисса оьрчI ивкIун ур. Дуклан увххун ур Къабардин-Балкьарнал медициналул институтрал стоматологиялул факультетрайн. МахIаммад чIивинияцIава хIакин хьунсса хияллай ивкIун ур. Вуз къуртал байхту, кIира шинай Москавлий ординатуралуву дуклай ивкIун ур. Стоматолог-ортопед хIакиннал сертификатгу ларсун, зун айивхьуну ур МахIачкъала ва Каспийск шагьрурдайсса клиникарттай. Шикку цIанихсса хIакинтуращал зий салкьи хьусса опытгу ванан бучIи лявкъуну бур. Хасъсса операция байбивхьусса ппурттуву аьралитуран медициналул кумаг буллансса хIукму бувну бур МахIаммадлул. СВО-лийн увкIсса цалчинсса гьантрайва агьну ур бита-ххитавуртту нанисса кIирисса кIанттурдайн.
Душманнал чулухасса артиллериялул битавуртту нанисса кIанттурдай кIусса щавурду дирсса мукьа аьраличу ххассал ан бювхъуну бур МахIаммадлуща. Къизгъинсса талатавуртту нанисса кIанттурдава аьралитал бувцуну, мугъаятсса кIанттурдайн биян бувну, анаварсса мутталий медициналул кумаг бувну, ххассал бувну бивкIун бур. Аьралий бурж бартбигьлагьисса хIаллай ванал царагу аьй лачIунсса щилтагъшиву дурну дакъар.
Къуллугърал бурж лайкьну бартбигьаврихлу, АьФ-лул Президент Владимир Путиннул ХIукмулийн бувну, МахIаммад Шагьмарданов лайкь хьунни «За отвагу» ва Александр Суворовлул медаллан. Хасъсса операциялий гьуртту хъанахъисса хIаллай МахIаммадлул ккаккан бунни цува унгу-унгусса хIакингу, аьраличугу ушиву.
Къаххирар МахIаммадлун, хасъсса операциялия буслай, цала гъан-маччами хъювуссул буккан буллан. Гьай-гьай, паракьатну бакъар Украиннал аьрщарай нанисса хасъсса операциялий гьуртту хъанахъисса аьралитурал нину-ппу, мачча-гъанми.
ЧIа учинну МахIаммадлун ва цинявппагу жула аьралитуран, хасъсса операциягу къуртал хьуну, Ххувшавугу ларсун, цIуллуну-сагъну зана шаву.
