МахIачкъалалив, Сулайман Стальский паркрачIа, Пушкиннул цIанийсса кIичIираву, октябрьданул 4-нния 6-ннин най дия Дунияллул Халкьуннал дянивсса луттирдал 11-мур фестиваль-ярмарка «Тарки-Тау – 2024». Ванил сакиншинначиталну бия Да­гъусттаннал Информациялул ва печатьрал агентство, художествалул ва публицистикалул журнал «Дагъусттан». Фестиваль хьуссар Луттирдал фестиваллал «Ккалаккисса Аьрасат» («Читающая Россия») тIисса ассоциациялул гьурттушиврийну ва Аьрасатнал миллатирттал литературардал чIарав бацIаврил программалийну.

Фестивальданийн бувкIунни Аьрасатнал личIи-личIисса регионнаясса, хIатта чил билаятирттаяссагума издательстварду ва лу­ттирдаха зузисса 60-ннийн бивсса идарартту.
Фестивальданийн ивну, павильоннал ялттугу увккун, гьурттучитуращал яхши-хашгу бувну, шикку лугу машан лавсунни Дагъусттан Республикалул ХIукуматрал председатель Аьбдулмуслим Аьбдулмуслимовлул.
Фестивальданул личIи-личIисса батIавуртту, хьунабакьавуртту ва выставкарду хьунни Поэзиялул театрдануву, Буйнакскийл кIичIиравусса «Темп» кинотеатрдануву, Дагъусттаннал паччахIлугърал филармониялул Гъинттулмур майданнив ва цаймигу кIанттурдай. Вай миксса чIярусса дияхха, цуксса ччайнугу, цинявннуйн биянсса иш-тагьар дакъая.
ЧIяру шадлугъирттаву цал­чинна-цалчинмур дия Поэзиялул театрдануву хьусса ТАСС-ран 120 шин шаврицIун дархIусса «Амин Чутуев. Строим светлое будущее» цIанилусса фотовыставка.
Щаллу хьунни 11-чин жучIара хьусса луттирдал фестиваль – Ух­ссавнил Ккавкказнавусса ца яла хъуннамур луттирдал ярмарка. Ва хьунни шагьрулунсса мяйжаннугусса байран, яла-яла – луттирду ххираминнансса.
Фестиваль лайкьсса даражалий шаврил ца барашиннану хьунни «Читающая Россия» тIисса ассоциациялул хъунама Михаил Фаустовлул, фестивальданул бакIщаращуй авцIуну ивкIсса Марат ХIажиевлуя цIагу дурну, увкусса махъру: «ЗучIасса гьашинумур фестиваль Аьрасатнал цаппарасса хъуни шагьрурдайнияр ххуйну хьунни. ТIайласса хIукмур Пушкиннул цIанийсса кIичIиравун, хьхьирил зуманичIан буккавугу», – куну. Ва ассоциациялул шинал лажиндарай луттирдал 30-ксса фестиваллу дувайссар личIи-личIисса кIанттурдай, Камчаткалия Калининградрайн бияннин. Вайннан щиннияргу ххуйну кIулссар укун­сса давурттал хIалгу, даражагу.
Фестивальдания махъ жу гъан хьуру ванил сиптачи ва сакиншинначи, «Дагъусттан» журналданул хъунама редактор, жула лаккуоьрчI Марат ХIажиевлучIан.
– Къабигьану бикIай фестиваль хъанай душиврия, ва гьарца шинал дувайсса даву душиврия инсантуран баян буван, цанчирча лу оьрмулун чара бакъа аьркинсса затну бакъар, инсантурал хьхьичIва-хьхьичIсса буруккин бикIай дуканмунил, лахханмунил. Гьарца шинал фестивальданул лагрулий жу хIарачат бувару дакIний личIансса хьунабакьавуртту, презентацияртту, выставкарду, конкурсру дуван. Ва ххуллухьсса дакIний личIанми давурттавух дия оьрчIал сурат дишаврил Экологический конкурс, ваний, так суратру дишаву да­къасса, цайми-цайми заданиярттугу диркIссар, вайннувух – литературалул эссегу. Конкурсрал суратирттал выставка «Аьрасат – Ттул тарих» тIисса Тарихийсса паркравун ласунсса пикри буссар. Конкурсрай, республикалул художествалул школардал оьрчIру бакъа­ссагу, гьуртту хьуссар Москавлиясса оьрчIругу, – буслай ур ва.
ЯлунчIин хьунтIисса Дагъус­ттаннал луттирду бищай издательствалул 100 шинал юбилейрацIунгу бавхIуну, Маратлул бакIраву цIа­нава щуруй бур хъиривмур шиналсса «Тарки-Тау» фестивальданий дуванмуницIун бавхIусса пикрирду.
– Ялуннаймур хъанай дур 12-мур фестиваль. Хъунмасса умуд бур шагьрулул ва кIану, гьашину кунма, булунссар ялунчIингу тIисса. Ялагу, ттун бувчIунни ца агьамсса зат – цинярдагу шадлугъру кьатIув, кIичIираваллаву дурну хъиншиву. КьатIувминнуй чIявусса инсантал гьуртту хъанай бия, къатраву дуллалиминнуй – чансса. Ахттакьуннай ссят 6-ннийра щаллу шайсса фестивальданул шадлугъру, ва ххуллухь хьхьунил 10 хьуну махъгума дайлитIлай дакъая, инсантал найнма бия, давурттая, цалва-цалва иширттая махъ. Ният дур хъуннамур къулагъас оьрчIал литературалух дуллансса. Жулва дагъусттанлувтурахь тавакъю буван ччива: дакIний битира, гьарца шинал октябрь зуруй жулла республикалул хъун-шагьрулий луттирдал фестиваль-ярмарка шайшиву, – тIий ур Марат.
Бадрижамал Аьлиева