Ва най дур Москавлив «Тимирязев Центр» тIисса выставкардал центрданий, лахъи лагантIиссар октябрьданул 12-ннийнин.
ДР-лул бакIчи Сергей Меликовлул тапшурлугърайну, региондалул делегациялул каялувчину ур Дагъусттаннал ХIукуматрал председатель Аьбдулмуслим Аьбдулмуслимов.
Республикалул стендрай чIалай дур региондалул агропромышленностьрал каширду, ми дур экологиялул чулуха марцIсса бакIлахъия. Выставкалул сакиншинначитурал тIимунийну, стендрачIан чIявусса халкь батIлай бур.
Аьбдулмуслим Аьбдулмуслимов выставкалул цалчинсса кьинива увкIунни Республикалул стенд ххал бан, ванал ххал бунни делегация хIадурну бурив даву дачин дуван форумрал кьинирдай, ихтилат бунни хъамаллуращал.
Стендращал кIул хьун цалчинминнавух увкIунни Аьрасатнал КюмайтIутIи бугьултрал ва чахир дувултрал ассоциациялул исполнительныйый директор Алексей Плотников. Ванал лавайсса кьимат бивщунни стенд дузал даврин, бувсунни Дагъусттаннал къюмайтIутIи бугьаврил лябуккулия. Дагъусттаннал стендрачIан увкIунни Волгоградуллал областьрал губернаторнал хъиривчу Василий Ивановгу. Ваналгу цIа дунни республикалул агропромышленностьрая.
Аьбдулмуслим Аьбдулмуслимовлул хъамал бачIва гьан къабунни, миннан буллунни республикалул брендну хъанахъиссса ссайгъатру.
ХIасан Аьдилов