Ккуллал райондалийсса ЧIяйннал магьирлугърал къатраву хьусса ирглийсса ме­роп­риятие дия «Одна страна, одна семья, одна Россия!» тIи­сса цIанилусса. Мунил сакиншинначину бия магьирлугърал къатрал хъунмур СалихIат Алхасова.
Сентябрь зурул ахирданий Аьрасатнаву кIицI ларгунни Донецкаллал, Луганскаллал Халкьуннал Республикартту ва Запорожскаллал, Херсонскаллал областьру АьрасатнацIун цачIун хьусса кьини кIицI дуллалисса мероприятиярду. МуницIун бавхIуну, ДР-лул Культуралул министерствалул баян бунни «Одна страна, одна семья, одна Россия!» тIисса цIанилусса флешмоб.

Ванил лагрулий ЧIяйннал шяраваллил культуралул къатраву хьунни флешмобран хас дур­сса мероприятие. Вай давур­ттал агьаммур мурадгу бур миллатирттал дянивсса дусшиврул арарду цIакь даву ва жагьилтал Ватан ххирану, тарихрал ва культуралул хIурмат-кьимат буну тарбия баву.
СалихIат Алхасовал, мероприятие дайдихьлай, кIицI лавгунни, хIакьинугу жула аьралитуран захIматсса кьинирду лахъан багьлай бушиву. «ХIакьинусса кьини исват хъанай бур буниялагу хIакьсса бушиву жула Президентнал увкусса, гуж цашивруву ва тIайлашиврувур бусса тIисса махъру. ЦIанасса ппурттуву ххишала бакъа аьркинну бур жагьилтурал дянив патриот зумунусса насихIатирттал дарсру дачин дан», – увкунни СалихIат Алхасовал.
Хъирив дуклаки оьрчIал бувккунни хасъсса аьралий операциялий гьуртту хъанахъисса аьралитуран хас бувну чивчу­сса шеърирду.

Имара Саидова