Сентябрьданул 27-нний «Дагестан» РИА-лий 1999 шинал Дагъусттаннайн ххярхсса дунияллул халкьуннал дянивсса бандитътурал кьюкьри ххит ду­ккан даврил гьурттучитуращалсса хьунабакьаву хьунни.
Шикку ДР-лул Информациялул ва печатьрал агентствалул каялувчинал хъиривчу Аслуттин МахIаммадовлул укун бувсунни тай дяъвилул иширттавух цува гьуртту шаврил хIакъираву.
«Та чIумал на зий уссияв аьдлу-низам щаллу даврил органнаву милицанал капитаннал чиндалуву.
Августрал 7-нний бандитътурал хIарачат бувна Бущихъиял райондалийсса мукьра шяравалу канихьхьун ласун. На нава Гагатлиял шяраватусса ура. Мунияту ттуща тай ишру хъанахъисса кIанайн къалавгун ацIан къавхьуна.
Бущихъав бивсса чIумал жун бувчIуна дяъвилул ишру хъанай бушиву. Боевиктурал шяраваллу дургьуну дия. КIанттул инсантурахь ми буслай бивкIун бур, ай, туну, жу зун хъиншиву дуллалиссару – Дагъусттаннай шариаьтрал законну зузи давур жул мурад, тIий. Боевиктал дакI дарцIуну бивкIун бур, инсантал цала чулий бацIаншиврий. Микку бандитътал гужну бяйкьуну бивкIссар», – кунни Аслуттин МахIаммадовлул.
Хъирив тай иширттая бувсунни СВО-лул гьурттучитурал ва ветерантурал «Барс» советрал председатель Арсен Абилаевлул.
«Жу цал буссияв Къадардал зоналий, цанчирча 1997 шиная шинмай боевиктурал пикри буллай бия, Дагъусттан цукун бугьан хъинавав, цукун личIи буван хъинавав Аьрасатная, тIий. Тикку Буйнакскаллал ва Къарабудахккантуллал районнал оьрчIая сакин дурну дия ополчентурал кьюкьа. Жу га зоналул лагма рургьуну бивкIссару, жул кьюкьлуву 60-ксса инсан ия, миннавух бия десантниктал ва «авгъантал».
1999 шинал августрал 13-нний жу лавгссару Бущихъиял райондалийсса ТIандо, АнсалтIа, РахатIа шяраваллавун. Жу тихун бивсса чIумал, инсантал лавгун бия шяраваллавату, тикку бия так Ульяновскаллал десантниктал. Жу хIала хьуру миннал артиллериялул аьралитуравун. Ополчентуращал, МВД-лул, ФСБ-лул ва АьФ-лул Обороналул зузалтращал ва десантниктуращал цачIу бандитътурал кьюкьа ххит дуккан дурссар», – кунни Абилаевлул.
Хьунабакьаврий ия мукуна аьра­лий корреспондент, «Дагестан» РИА-лул зузала Альберт Токаев. Ванал цува дяъвилул иширттавух гьурттуну ивкIшиврия укун бувсунни: «1999 шинал бандитътурал кьюкьри Дагъусттаннайн ххяххаврил хIакъираву ттун бавуна нава МахIачкъалаллал «Дом быталий» сурат рищуну зузисса чIумал. На хIадур хъанай уссияв отпускалийн гьан, амма му куццуйсса хавар бавну, отпускалийн гьансса пикри бакIрава бувккуна. Ттун багьуна «Новое дело» кказитрай аккредитация дан, тихун гьаншиврул. МинначIату аьркинсса чагъаргу лавсун, на лавгра цал Къарамащилийн, яла – ЦIуссалакрал райондалийн», – бувсунни Токаевлул.
Дяъвилул иширттавухсса гьурттушиврия бувсунни мукунма та чIумал «Молодежь Дагестана» кказитрал корреспондентну зий бивкIсса Эльмира Кожаевалгу.
ХIасан Аьдилов