Нюжмаркьини, сентябрь зурул 27-нний, ЦIийшиял шяраву хьунни Аьрасатнал Виричув Фархад Худайнатов дакIнин утлатисса мажлис. Ва кьини ЦIийшиял школалий тIитIлай бия хасъсса аьралий операциялий къучагъшиврий жан дуллусса Фархадлул аьпа абад буллалисса мармарчарил ула.

Мажлисрай гьуртту хьун був­кIун бия Ккуллал райондалул бакIчи Шамил Рамазанов, Ккуллал ва Лакрал районнал администрациярттал вакилтал, райондалул школардал директортал ва учительтал, Виричувнал гъан-маччами.
Мажлис байбивхьуна Аьрасатнал гимнрахун билаятрал ттугъ гьаз баврийну. Гихунмай му бачин бувну ия райондалул Ветерантурал советрал хъунаманал хъиривчу, отставкалийсса майор, аьралий иширттал гьурттучи Шамххал Хизриев.
Мажлис тIитIлай, ихтилат бувна Шамил Рамазановлул.
– Гьарица чIумул бикIай цила вирттал. Амма дяъвилул иширттаву ккаккан дурсса къучагъшиву ляличIиссар, буттал буттахъая шихуннай   яла бусравмур ва кьиматраймурди.
Ларгсса шиннардий райондалий СВО-лий жанну дуллу­сса вирттавран укуннасса аьпалул ултти дихьлахьисса чIумал жува умудрай буссияв вай махъра-махъсса хьунссар тIий. ХIайп, хасъсса аьралий операция уттигу найнма бур, жула жагьилтурангу Ватандалул мурадру буручлай жанну дуллан багьлай бур.
ХIакьину жува Фархад дуклай ивкIсса школалий ванал аьпа абад буллалисса ула тIитIлай буру. Шикку дуклакисса оьрчIан тачIав хъамакъабитантIиссар жула паракьатшиврул цIаний жан дуллусса Фархадгу,ва кунмасса цинявппа виртталгу, – увкунни ванал.
Фархад Чариновичлул оьр­мулиясса ихтилат бунни Саният ПаттахIовал.
Фархадлул суратругу дургьуну, дуклаки оьрчIал бувсунни ванал дурсса виричувшиврия, дур­ккунни назмурду.
Виричув дакIнин утлатисса ихтилат бунни ванахь дарс дирхьусса математикалул учитель, школалул завуч ХIасанова Аминат Абакаровнал.
– Каспийскалий мукьва класс­гу къуртал бувну, увкIуна ва  ЦIийшиял школалийн. Ччяни хIала увххуна коллективравух. Хъунанал хIурмат бусса, чIивинал чIарав ацIайсса ия. ТачIав вяйливсса, низамрава увксса тIул къадурссар. Дуккавривугу хьхьичIунсса ия. Школалий, райондалий дуллалисса гьарица спортрал мероприятиярттай гьуртту шайссия. Школа лавайсса кьиматирттай къуртал бувна.
Учительнан бикIу, шяраваллил инсантуран бикIу аьркинний кумаг байва. Гьарица чулуха вихшала дишин бучIисса ия. Жулва чайссар чув шай мархха куну. ЧIалай ия ва гиччава най уна мукунсса ушиву.
Ванан къабуллусса оьрму оьрчIан, махъсса цинявннан булуннав. Ниттихьхьун ссавур дулуннав, – увкунни ванил.
Хъирив цала кьини хъун дан бувкIсса цинявннахь барчаллагь тIисса ихтилат бувна Фархадлул кулпат Галина Алхасовнал.
Ихтилатру къуртал хьуну махъ тIиртIуна школалул лажинчулий  ларчIсса ула. Му тIитIин вихшала дурна Шамил Рамазановлуйн ва  Фархадлул буттауссу Давудлуйн. Учительтурал, дуклаки оьрчIал, гъан-маччанал, хъамаллурал дирхьуна тIутIив. Виричувнал аьпалун баян бувна минутIрайсса пахъ багьаву.