Уттигъанну Къабардин-Балкьарнал хъуншагьру Нальчикрай хьунни Архитектуралул шинан хас дурсса VIII-мур Ухссавнил Ккав­кказуллал ва Кьиблалул архитектуралул форумрал смотр-конкурс. Ши­кку, кIилчинсса кIану бувгьуну, арцул диплом лайкь бунни Дагъусттаннал цIанихсса архитектор ХIажикьурбан ХIажикьурбановлул.

ДакIнин бутан, СунбатIуллал шяравасса Илларкьадинал арс ХIажикьурбан ХIажикьурбанов чIярусса ххаллилсса проектирдал авторди. Ванал цIа ххуйну кIулссар, Дагъусттаннай дакъасса, цайми республикардай ва регионнайгу.
Дагъусттаннай чIярусса лякъинтIиссар ванал проектрай дурсса ябацIансса, авурсса къатри. Каспийскалийсса «Антарес» тIисса машлул центр, Каспий хьхьирил зуманивсса «Джами» тIисса туристътурал центр, МахIачкъалаливсса машлул ва гостиницалул комплекс « 7 небо» ва м.ц.
Махъсса шиннардийсса ванал давурттава кIицI дан бю­хъанссар Дарбантливсса Табасараннал театрданул къатри, «Лезгинка» ансамбльданул центр. Укра дурссар ацIунния ливчусса мизитирттал проектру.
Дагъусттаннай архитектуралул сфера хьхьичIуннай давриву ХIажикьурбаннул хъунмасса захIмат бивхьуссар. Ва ххуллий лайкь дурсса наградарттугу дуссар. Шагьрурдал кIичIираваллу, майданну чIюлу буллалисса къатрайну ванал абад дурссар цала цIа.
ХIажикьурбан хъанахъиссар Дагъусттаннал ХIурматлувсса архитектор, Дагъусттаннал ХIур­матлувсса строитель.
Арцул дипломгу барча тIий, чIа тIий буру цIуллушиву, давриву тIайлабацIу ва хьхьич­Iуннайшивуртту.

Андриана Аьбдуллаева