МахIачкъалалив ларгсса нюжмардийгу литературалул байранну дия, балкьарнал шаэр СалихI Гуртуевлул цIанийсса дунияллул халкьуннал конкурсрай ва Апанни Къапиевлул цIанийсса таржумачитурал IV дунияллул халкьуннал дянивсса «Резьба по камню» конкурсрай ххув хьуми барча буллай бушиврийн бувнугу, вайва гьантрай Волошиннул цIанийсса литературалул фестиваль душиврийн бувнугу.
Балжину бувсун, дакIнин бутанна Апанни Къапиевлулмур конкурс. Ва Аьрасатнал Чичултрал союзрал ва Ккавкказуллал чичултрал клубрал сипталийну бувайсса конкурсри. Литератортуран, миллатирттал мазурдий чичлачисса шаэртурал назмурду дюрхъуну таржума дурсса автортуран кьимат бищун багьлагьисса. Конкурсрал сиптачинал, машгьурсса шаэр, публицист ва таржумачи Миясат Щейховнал тIийкун, миллатирттал поэзиягу, цайми миллатирттангу хавар бикIаншиврул, чивун дуккан дуллалисса. Ва давугу вихшала дурну дия мукъул усттартурайн: Нина Ягодинцевайн, Сергей Тенятниковлуйн, Залина Басиевайн ва Алла Поспеловайн. Лауреатътурал, дипломантътурал, конкурсрал сакиншинначитурал ва жюрилул члентурал Апанни Къапиевлул гьайкалдануцI тIутIив дирхьуна.
Хъамал барча буллалисса мероприятиярду хьуна Расул ХIамзатовлул цIанийсса Миллатрал библиотекалуву ва Поэзиялул театрдануву. Шаннагу мероприятие ххуйсса даражалий гьаншиврул кабакьу бувну бур Дагъусттаннал Культуралул министерствалул. Министр Зарема Буттаевал цIаниясса Барчаллагьран лайкь хьунни Миясат Муслимова ва хъамал: Марина Кудимова, Вера Калмыкова, Стефания Данилова, Андрей Коровин, Геннадий Калашников, Анна Гедымин, Нина Ягодинцева, Арсений Ли, Алла Поспелова, Залина Басиева ва Нина Дунаева.
Поэзиялул театрданувусса мажлисрай балайрду увкунни Хиринду Султановал ва Эльвира ЯхIияевал.
Хъамаллуран Дагъусттаннал караматсса тIабиаьтгу, кIанттугу ккаккан буллалисса экскурсиярду бунни гидтурал – Камил Дадаевлул ва ХIасан ХIасановлул.
Миясат Муслимова барчаллагьрай бур конкурс ххуйсса даражалийн гьаз буван чIарав бавцIуцириннайн, миннавух жяматийсса ишккакку, гьарцагу ккалли дансса давривух хIала уххайсса Зиябуттин ХIажимирзаевлуйн ва Мариян Илиясовал цIанийсса «Дараччи» фондрал президент Гульшан Хасаевайн.
ПатIимат Рамазанова
