АцIансса кIану бакъа бувцIуну бия лахьхьукьунну Оьруснал театрданул чIивимур зал.
Лакрал театрданул сахIналий хъунмасса тIайлабацIу буну хьунни совет заманнул хъунасса чичу Чингиз Айтматовлул «Ниттил авлахъ» («Материнское поле») тIисса кьиссалиясса спектакльданул премьера.
Спектакль бивхьуну бур Дагъусттаннал театрал магьирлугърал зузалтран акъасса, тамашачитурангу ххуйну кIул хьусса, Ухссавнил АьсатIиннал ва Къабардин-Балкьарнал лайкь хьусса артист Гиви Валиевлул. Ванал бивхьусса У. Шекспирдул «Укрощение строптивой» ца яла хьхьичIунсса ххуттай буссар Лакрал театрданул репертуардануву, ххира хьуну бур му тамашачитурангу ва мукьра шинал лажиндарай шапI куну бувцIусса заллаву най буссар гьарцагу постановка. Хъунмасса тIайлабацIу буну хьуссар ва спектакльданущалсса гастроллу Аьрасатнал шагьрурдайгу.
«Ниттил авлахъ» спектакль бивхьуссар Дагъусттаннал Республикалул БакIчинал грантрацIух Къиргъизнал хъунасса чичу Чингиз Айтматов дунияллийн увккун 95 шин там шаврин хасну.
Спектакльданул сценография – Дагъусттаннал халкьуннал художник Ибрагьимхалил Супияновлул. Костюмру – Фатима ХIажибековал.
«Ниттил авлахъ» кьиссалуву ккаккан бувну бур къиргъизнал хъузалал захIматсса кьадар. Толгонай (Дагъусттаннал халкьуннал артистка Луиза Шагьдилова) дакIнил кьуват ххисса хъамитайпа, Буттал кIанттул цIанийсса Хъунмасса дяъвилия лас ва шама арс зана къавхьуну, духIан захIматсса къюву духIлай бур, хьхьу-кьини дакъа къурув захIмат буллай. Аьрщарал буллай бур ванихьхьун кьуватгу, гьавасгу. Жагьилнува щащарну ливчIсса арсналщар Алиман (Дагъусттаннал лайкь хьусса артистка Зинаида Чавтараева) ванин ххира хъанай бур цила аьзизсса душ кунма. Бяйкьуну чил ласнацIа увсса ванил арсгу (Алиман цуппамур оьрчIах бивчIай) цила арснал арсшиврий хъуна уллай бур, кулпатраву усса чувнацIа хьуну ялгъузну къаличIан Заннал ядигар дурсса талихI-тирхханну хIисаврай кьамул дурну.
ХIакьину Украиннал аьрщарай нанисса хасъсса аьралий операциялий паччахIлугърал мурадру буруччаврил ххуллий жанну кьурван дурсса вирттаврал ниттихъал хьхьичI утта уклай ур Къиргъизнал хъунасса чичу Чингиз Айтматов, цала мукъуву аьч дуллай вайнналгу духкъалагайсса къюву.
(Премьералиясса тамашачитурал пикрирду бусанну хъиривмур номерданий).
Зулайхат Тахакьаева
