Сентябрьданул 18-нний Аьрасатнал строительствалул ва ЖКХ-лул министр Ирек Файзуллин хьунаавкьунни Дагъусттаннал бакIчи Сергей Меликовлущал. Хьунабакьаврий гьуртту хьунни Федерал казначействалул каялувчи Роман Артюхин ва ванал хъиривчу Эли Исаев.
Ирек Файзуллиннул бувсунни къатри даврил бутIуву региондалий тамансса хъин чулийсса дахханашивуртту хьуну душиву. 2023 шинал дурну дур 1,6 млн квадрат метра къатрал, гьашину сентябрьданул байбихьулийннин дурну дур 2,57 млн квадрат метрарду. ХIакьинусса кьини республикалий дуллай бур чIявуквартирарду бусса 76 къатри, ми хъанай дур 741 азарда квадрат метра.
Росказначействалул федерал комиссиялул заседаниялул лагрулий хьусса дискуссиялул хIасиллайн бувну, ххал дигьинсса агьамсса теману хьуну дур региондалий коммунал инфраструктура цIу дуккан даврин хасъсса мероприятиярттал мюнпат лахъ баву.
Дагъусттан хъанай бур къулайсса шагьрулул ялапаршин дузал даврил Щалагу Аьрасатнал яла хъинми проектирдал чялишсса гьурттучину. 2018 шиная шинмай субъектрал дуллуну дия гьуртту шаврил хIакъираву 30 заявка.
Бартдиргьуну дур ххув хьусса 5 проект. 2024 шинал Дарбант, Къизлар, ва Буйнакск шагьрурдай 3 проект ххув хьуссар 9-мур конкурсрай. Гьашину республикалий пландалий ккаккан бувну бур дузал буван 86 жяматийсса ва 30 хIаятирттал кIанттурду.
Миннуяр ххишалагу, 2023 шинал Запорожскаллал областьрайсса Михайловскаллал райондалий 27 объектрай дурну дур ремонтрал давуртту, цIанасса ппурттувугу 17 объектрай давуртту дуллай бур.
«Ва хьунабакьаврил хъуннасса мяъна дуссар. Жуща бюхълай бур жула опыт бахханаххи буван АьФ-лул Минстройращал, Федерал казначействалущал, Территорияртту лядуккан даврил фондращал. Къатравун гъилишиву дулавриву ххал бигьлагьисса масъаларттал хъуннасса мяъна дуссар чIал дакъа къатравун гъилишиву дулайсса чIун ялун найгу духьувкун. Жура аьркинссар бартдигьин АьФ-лул Минстройрал кумаграйну дузал дуллалисса проектру», – увкунни региондалул бакIчинал.
Ирек Файзуллиннул бувсунни Дагъусттаннал строительствалувусса цаймигу хьхьичIуннайшивурттая.
