Щалагу Аьрасатнал литературалул «Твои, Россия, сыновья!» цIанилусса конкурсрал гьашинуния тиннай ларсун наниссар Аьрасатнал Федерациялул Виричу НурмахIаммад ХIажимахIаммадовлул цIа. Ва конкурсрайнсса заявкарду кьамул дуллалиссар октябрьданул 1-ннийнин.

«Твои, Россия, сыновья!» конкурс 18-нни хъанахъисса. Конкурс дуллалиссар Буттал кIанттул цIанийсса Хъун дяъвилиясса, Аьрасатнал Федерациялул Ярагъуннил Гужирдаясса, ванил виричусса тарихраясса, Ватандалул ттизаманнул вирттаврал, СВО-лий билаятрал мурадру буручлачиминнал къучагъшивурттаясса литературалул произведенияртту ялун личин баву ва машгьур баву мурадрай.
Конкурсрал мурадруми цивппа цагу-кIивагу бакъар. Вайннувух ялагу бур творчествалийхчин аьралий къуллугърал сий ларай даву ва Аьрасатнал Федерациялул Ярагъуннил Гужирдаясса произведенияртту чичаврийн аьралий чичулт гьуз учин баву.
Творчествалул бяст-ччаллаву гьуртту хьун оьвтIий бур аьралий къуллугъ буллалиминнайн, СВО-лул гьурттучитурайн, аьралий иширттал ва аьралий къуллугърал ветерантурайн, Аьрасатнал Федерациялул Ярагъуннил Гужирдал граждан персоналданийн, вайннал кулпатирттаву аьралий-патриот тематикалул художествалул произведениярттаха зузиминнайн.
– Жяматраву аьралий-пат­риот тематикалухсса къулагъас гьаз хъанахъаврийн бувну, ратный къуллугъран, Ватан дуруччултрал виричушивурттан хас дурсса литературалул агьамшиву (актуальность) ялу-ялун гьаз хъанай дур. Буккулт луглай бур тарихийсса аьпалул агьамшиврул ялув, захIматсса чIумал ватан дуручлай бивкIминнал виричувшивурттал ялув пикри буллали буллалисса произведениярттах. Цалчинсса шаттирду ласласисса автортураннив укунсса конкурсрай гьуртту шаву пишакаршиврул ххуллий лавхъсса бунияласса шачIануну хьун бюхъайссар. Оьрмулул авадансса опыт бусса, чувшиву, виричушиву чIалачIи дуллалисса цимивагу иширал бардултну хьусса ветерантуран тIурча, ва конкурс хъанахъиссар творчествалийхчин, назмурдал ва прозалул кумаграйну цалла кIулшивуртту, билаятрай ва дунияллий хъанахъисса агьамсса иширттах­сса цала бургаву, ябитаву, цалва бакIрачIан бувкIмур чIалачIи бувансса кашину. Вайннал аьралуннавусса цалва къуллугъраясса, дусшивриясса, виричушивурттаясса, аьралий дустурацIа хьусса чIумалсса къумашивриясса хавардал жагьилсса никиран чIалачIи буллалиссар Ватандалуха къуллугъ баврил гьарцагу гражданиннан цуксса агьамшиву дуссарив, – тIий, конкурсрая буслай ур ЦДРА-рал (Центральный Дом Российской Армии) чичултрал Аьралий-художественный студиялул начальник Владимир Силкин.
Конкурс дуллалиссар «Поэзия», «Проза» ва «Публицистика» номинациярттай.
Конкурсрай гьуртту хьуншиврул ва шинал октябрьданул 1-ннийнин гьан дуван аьркинссар давуртту (почталийх) ва адресрай:
129110, г. Москва, Суворовская пл., д. 2, стр.1, ФГБУ «ЦДРА» Минобороны России, комната № 330 (Военно-художественная студия писателей) с пометкой «На Всероссийский литературный конкурс «Твои, Россия, сыновья!». Телефон для справок: 8-495-681-66-45.

ДавурттацIун чара бакъа дикIан аьркинссар биографиялул справкагу, ваницIун – махъуннайсса дахIаву дуван­сса информациягу (телефондалул номер, электрон почта ва м.ц.).
Конкурсрая, ваний гьур­тту шаврил шартIирдая гьарта-гьарзану чивчуну буссар М.В. Фрунзел цIанийсса ЦДРА-рал сайтрай.

Бадрижамал Аьлиева