Сентябрьданул 13-нний ДР-лул ХIукуматрал председатель Аьбдулмуслим Аьбдулмуслимовлул шадлугърал тагьарданий наградартту дуллунни давурттаву хьхьичIуннайшивуртту хьун дурсса республикалул ялапарлувтуран. Мероприятие хас дурну дия Да­гъусттаннал миллатирттал Цашиврул кьинилун. Ва Кьини кIицI лагайссар гьарца шинал сентябрьданул 15-нний.

Аьбдулмуслим Аьбдулмуслимовлул цинявннахь барча кунни ялун нанисса байран ва барчаллагь увкунни республика лядуккан давриву гьарца кьини бихьлахьисса захIматрахлу. Бувсунни миллатирттал Цашиврул кьинилул байрандалул мяъналия, агьамшиврия.
– Махъсса шиннардий жува чанну буслай бияв патриотшиврия, амма хIакьину зана хъанай буру вара темалучIан. Жува чун гьарчангу, цуксса лахъсса зунттавун лахъарчангу, цуксса куртIнийн бучIарчангу, ялувсса Ххув Заннал жува зана бару аьзизсса аьрщарайн. Му бур жула Дагъусттан, жула зунттурду, жулла районну. Аьркинссар дакIнихтуну ххира хьун Дагъусттан, жулла Ватан, жулла культура, республикалул циняв миллатру. Жула бур чIявусса миллатру, амма циняв гъалгъа тIий бур бюхттулсса оьрус мазрай. Мунивур дусса жулла цашиву. Барча буллай, талихI-тирхханну ва оьр­мулул чIярусса шинну чIа тIий ура, – увкунни ванал.
Муния махъ дуллан бивкIунни наградартту: 25 инсаннан дуллунни Дагъусттан Республикалул ХIукуматрал ХIурматрал грамотартту ва Барчаллагьрал чагъарду.
Награда дуллуминнавух бур «Каспийск шагьру» муниципал сакиншиндарал Агьалинал социал щаллушиндарал управлениялул Кулпатрал ва оьрчIал, ветерантурал ва инвалидтурал ва личIисса тагьардал чIумал зараллу бивминналсса байсса отделданул хъунмур ХIажимирзаева Амина Аминнул душ. Ванин ДР-лул ХIукуматрал Барчаллагь баян бувунни захIматраву хьун дур­сса хьхьичIуннайшивурттахлу ва лажин кIялану дуллалисса давурттахлу.
Ххирасса Аминай, жу, «Ил­чи» кказитрал зузалт, хъинну ххари хьуру вин награда дулаврия. Вил ххаришиву жугу кIидачIлай буру. Барча вил награда, цIуллу баннав, ххарину битаннав, мунияргу бюхттулсса наградартту ласлай ккакканнав! Жугу хъамакъаитайсса вил буттал, Аминнул, дустал.