«Илчи» кказитрал редакциялул уттигъаннусса бусравсса хъамаличу хьунни отпускалий Дагъусттаннайн увкIсса ххаллилсса хIакин, миллатрал пахру бан лайкьсса бусравсса лаккучу Жаруллагь Аьшуев. Медициналул элмурдал доктор, РМАНПО-лул (Российская медицинская академия непрерывного профессионального образования) аьмсса ва хирургиялул стоматологиялул кафедралул профессор, Москавуллал Стоматологиялул ва челюстно-лицевой хирургиялул агьаммур научно-исследовательский институтрал хьхьичIунсса элмийсса зузала.

Ванал оьрмулул ва пишалул ххуллу ччинан эбрат хьунсса бур. Цувагу цIу бусса, пасихIсса, бюхханну ихтилат бан кIулсса ур. Сайки кIира ссятрай лахъи ларгуна жул ванащалсса хьунабакьаву, му чIумалгу цучIав бизар хьуну, увххун- авкIуну акъая, ялунгума, яла-ялагу цIухху-бусу буллай, ва итаакьин ччай бакъая. Жаруллагьлул бусласисса гьарицагу зат мюнпатсса, бучIи лякъинсса, оьрмулул дарсну хьунсса бия, цавагу хха лях гьан къабивтун чичин ччай бия.
Архсса зунттал шяраву, хъунмасса кулпатраву хъуна хьусса оьрчI, школа къуртал байхту, цана цувалу шагьрулийн увкIун, ларайсса кIулшивурттугу ларсун, чIарав ацIансса, чул бищунсса акъанува, жагьилсса оьрмулуву сивсусса шаттирдай элмулул ххуллийн увккун, лавайсса даражалийнгу лавхъун, хIакьинусса кьини дазул кьатIувсса яла сий думи институтирттаву тIалавну ур.
КуртIсса элмийсса кIулшивур­ттацIун, магьирсса карунницIун, ванаву чIявусса гьунарду цаймигу бур. Бур балайлул ва къавтIаврил бюхъу, ур спортравугу итххявхсса, усттарну дай тямадашивугу. Школалий дуклакисса шиннардийва ва гужсса ттуплий укку ва лачIун-укку ивкIун ур. ХIакьинусса кьинигу спортраву чялишну ур.
Цала даражалух къаурувгун, Жаруллагь дакI хъун дакъасса, аьчухсса, цаманан кумаг бан анавар уккайсса ур. «ЦIуххияра, на бусанна» тIисса, цанма кIулмур цайминнангу лахьхьин бан ччисса ур. Жаруллагьлух вичIи дирхьунан чIявусса мюнпатсса затру лахьхьинссия, ттун пахругума багьлай бия ва лаккучу ушиврия.
ДакIнин бутан, уттигъанну Жаруллагь Аьбдуллагьович гьуртту хьуссия НТВ-лий цIуну итадаркьусса «У нас выигрывают» тIисса программалий, бусравсса хъамаличу ва тиражрал комиссиялул член хIисаврай. Та передачалий, бюххансса чIуний ххаллилсса лакку балай итабавкьуну, цинявппа махIаттал бувссия ванал.
Увну ур Жаруллагь 1970-ку шинал, зунттаву, лагмара кюртти кунна дирхьусса лакрал мюрщи щархъал вив ларсъсса хъун дакъасса Хъуннащиял шяраву, хьхьичIунсса тIаннул усттар Аьвдуллагьлул ва Сиянатлул кулпатраву. Нитти-буттал тарбия бувну бур циняв оьрчIру захIмат ххирану. Жаруллагь чIявуну, буттан кумаг буллай, тIаннул давуртту дуллан икIайсса ивкIун ур. Амма Аьвдуллагьлун оьрчIал дурккуну, ларайсса кIулшиву ларсун ччай бивкIун бур.
Ца чIумал ва увкIун ур, «Дагестанская правда» кказитрайсса, Качинский авиациялул училищалувун кьамул бавриясса баян бавугу ларсун. Вагу Жаруллагьлун ккаккан дурну, увкуну бур: «Ина чурххал бюхттулсса ура, вияту ххуйсса летчик хьунссия. Летчик хьуншиврул, захIмат бан аьркинссар. Гьарица кьини ина дайдишин аьркинссар ца чулуха кIа жула хьхьичIсса Закьу зунттуйн лавхъун, тамур чулуха увчIун. КIийн лахъарча, кIанияр лавайгу лахъантIиссара». Аьшуевхъал кулпатраву буттал мукъул сий хъуннасса диркIун дур. ХIатти ция мунал увкумуних вичIи къадишин. Жаруллагьлул цалагу учай: «Ттун ттула ппу Аллагь куна чIалан икIайва, мунал сий хъуннасса дия шяраву», – куну. Амма, иш цамур куццуй багьну, Качинский училищалувунгу къалавгун, Жаруллагь лавгун ур хъинну сий дусса, Кенигсберграйсса Аьралий училищалувун уххан. Конкурс хъуннасса диркIун дур – 9 инсан ца кIанайн.
– Историялул экзамен дуллай ура. Гужсса тIалавшинна дусса преподаватель ия. Циваннив, на ганал дакIнил къалавсунав. Буслай унува, ахчилай ур. Ахиргу, кIива бишин авчунни. Ганал канивусса ручкагу хъап дурну, учав: «Циван бишин ччай ура ина ттун ялавайсса кьимат? На му ласун къаувкIрахха тиха шихунай. «На дуккин ччай ура, хIарачат бан ччай ура. Була ттухьхьун суаллу». На мукун учинссар тIий акъахьунссия, махIаттал хьуну авцIунни. — Ххюва суал булунна, — увкунни. — ХхюцIалва була, — учав. Мунал суаллу буллай, на жаваб дуллай, ахиргу, ивзун, хъямалагу агьну, увкунни: «Ина кунмасса бухьурча циняв, дуруччинтIиссар жула хIукумат», – куну. ЧIявусса хIаписартурал, къуллугъчитурал оьрчIру бухлахисса кIанай на цалчин лархссар курсантнал форма. Му чIумал бувххуна ттул бакIравун пикри: «Агана вил ня зий духьурча, кIулшивуртту духьурча, ина яла гужмара», – буслай ур Жаруллагь.
Мунияр шихунай куртIсса кIулшивуртту ласунна, хьхьичIун­май хъит учинсса хIарачат булланна, нитти-буттан дакIнин щунмур къабанна тIий, цала яхIирал лавайсса даражалийн лахъан увну ур Жаруллагь.
Цукун багьну бур Аьралий училищалул студентнал ххуллу медициналувун?
Най унава училищалуву ду­ккавривугу, спортравугу ххуйсса ккаккияртту чIалачIи дурсса Жаруллагьлун, цIуллу-сагъшиврул тагьарданийн бувну, училище кьабитан багьну бур. Гьай-гьай, буттан му зат хъинну бювххун бур, ва арснал чулухунай бакI къадугьлай ивкIун ур. Так духтуртурал ихтилат бувну махъ цахъис кIукIлу хьуну ур. Ца чIумал къашайшалтрал ялтту уклакисса хIакиннал Жаруллагьлун цанмагу баллай увкуну бур: «Ва оьрчI къазананссар», – куну. Сивсусса, ссалчIав лахIан ан къаацIайсса Жаруллагьлулгу увкуну бур: «Зананна на», – куну. Зана хьуну шяравун, агьну ур дуккаврихун. Бутталгу багъишла ивтун ур. Шяраву ванал цIуллу-сагъшиврул тагьаргу ххуй хьуну дур.
– Буттал багъишла итаву хьуна ттун дарув-дарман, – тIий ур цувагу. Цахъис хIаллай буттащал занай, тIаннул давурттахагу зий ивкIун, увххун ур Дагъусттаннал медициналул институтрал стоматологиялул факультетрайн. Дуклай ивкIун ур хьхьичIунну. Гьуртту шайсса ивкIун ур институтрал жяматийсса давурттавугу. Дагъусттаннал вузирдал дянивсса шахматирттай буккаврил бяст-ччалливу гьуртту хьуну, цалчинсса кIану бувгьуну бур. Дуллуну дур арцуйнусса бахшиш. Гара кьини, ахттая махъсса автобусрай щяивкIун, лавгун ур шяравун, цанна дуллусса арцу нитти-буттачIан диян дан.
Институт къуртал байхту, Новый Уренгойрайн лавгун, тикку ца-кIира шинай зийгу ивкIун, махъунай увкIун ур.
Институтрал преподавательнал маслихIат бувну бур: «Ина итххявхсса, инсантуращал ихтилат бан кIулсса ура, винма аькьлугу лахьхьин, элмулулгу хьхьичIунай хьун, Москавлив гьарча къахъинав», – куну. Танал махъру бювххун, 1998-ку шинал Жаруллагь лавгун ур Москавлив. Гьай-гьай, билаятрал хъун шагьру ва та учIанавав тIий ялугьлай бакъахьунссия, хьунаавкьуну ур личIи-личIисса захIматшивурттащал. Амма Жаруллагь захIматшивурттая нигьа- усайма къаивкIун ур. Вокзалданий утту ихьлай, гьарица кьини тIиссакссагу, Минздраврал кабинетру батлан багьну бур, аспирантуралувун уххансса направление ласлай. Ванаву муксса гьавас бивкIун бурхха, ччимур ххуллу ласун, циняв захIматшивуртту духIан хIадурну ивкIун ур.
Шанма-мукьва гьантта хьуну бур Жаруллагьлул аспирантуралулсса байсса Володиннул кабинетрал хьхьичI щяикIлай, кьамул къауллай.
– Ца ппурттуву, цIунилгу анавархъиндарай тиккун най уна, дурцунни ттул ус. Гагу кIунттарай дархIуну, увкIун, кабинетрал хьхьичI щяивкIра цIунилгу. Оьвкуну: «Вин ттуяту ци ччай дур?» – цIувххунни. Цувагу ттул дархIусса уссух уруглай ур. «На дуклан ччай ура, хъунмасса гъира бур, ттун кумаг бува», — учав дакIнин бутлай ур Жаруллагь. Укун Стоматологиялул элмулул ва ахттаршиннарал институтрал аспирантуралувун уххан направлениялул хъирив увкIун ур. Зузи кьини къуртал хьуну, увккун нанисса директорнахь тавакъю бувну бур, ца-кIира минут1райсса кьамул ува куну.
– Ина ци зун ччай ура аспирантуралуву, вин цикIуй дан кIуллив? Шикку так ккарччив хъин даврийну къуртал къашайссар, элмий­сса ахттаршиннардугу аьркин­ссар, – куну бур директорнал.
– На хIадурну ура мигу дуллан, – жаваб дуллуну дур Жаруллагьлулгу. Ванай дакI даркьусса директорнал аспирантуралувунгу кьамул увну, давугу ляркъуну дур цала ученикначIа.
Низам дусса, уххаву къакIулну зузисса Жаруллагьлуй дакI даркьуну дур хъунаманангу. Увцуну ур цачIана ассистентну. Жаруллагьлул хъунама РУДЕН-далуву ортопедиялул стоматологиялул кафедралул заведующийнугу ивкIун ур. Махъ цува захIматну къашай хьувкун, цалва лекциярдугу Жаруллагьлухь букки увкуну бур. Гьар цимур-ца цала бакIрайн ларсмур кунна, му давугу ххуйну дан бювхъуну бур Жаруллагьлуща. Ца-кIива лекция буккайхтува ва студентътуран ххира хьуну ур. ЧIумуяр ччяни аспирантурагу къуртал бувну, 2003-ку шинал шиккува докторантуралувун увххун ур. Лавайсса даражалий дурурччуну дур докторнал диссертация. Га шиналсса (2008 ш.) яла ххуймур диссертацияну Жаруллагьлул диссертация ккаккан дурну дур. Патентгу лавсун, резьба бакъасса имплантру дуккан дурну дур. Ва хьуну ур Дагъусттаннай имплантологиялул сфералувусса цалчинсса доктор.
Ссаха зурчагу, ва даву ттущара хьувивав тIисса щак-щук тачIав къабуххайсса бивкIун бур Жаруллагьлул бакIравун. Дуллалимургу, ци захIматшивуртту хьунадакьирчагу, мудан дузрайн дуккан дайсса диркIун дур.
Утти Жаруллагьлул гьан дурну дур цала резюме Гарвардрал, Балтимордал ва Токиолул университетирттавун. Гьар кIанаягу оьвтIисса жаваб дуркIун дур. Улувкьуну ур ингилис маз лахьлай. Гарвардрай ингилис мазрай цала презентациягу дурну, тичча увкIун ур Балтимордал университетравун. Балтимордал университетрал бувгьуну бур ванал оьрмулуву ца агьамсса ва дакIний личIансса кIану.
– Шикку ттул яру тIивтIуна, чIявусса затру лавхьхьуна, чIявусса дусталгу хьуна, – тIий ур Жаруллагь. Жаруллагь тIисса цIа учин захIмат хъанай, шикку дуллуну дур ванан «Доктор Джордж» тIисса медициналул псевдонимгу.
Дус хьуну ур яла захIматми операцияртту байсса пластический хирург, онколог Роберт Ордлущал. Ванал буллалисса операцияртту ккавккукун, Жаруллагьлувунгу ми буллансса гьавас багьну бур. УвкIун Аьрасатнавун, оьрмулул 44 шинаву ординатуралувун увххун ур, челюстно-лицевой хирургнал пиша лахьхьинсса мурадрай. Мугу къуртал бувну, цIунилгу Американавун лавгун ур 4-5 шинайсса стажировкалий.
– Тихун-шихун ххяхлай, цайминная лахьхьин шаймур лахьлай ура. Ттулла даву ххуйну дуллан, инсантал рязи буллан, ххари буллан ччай ура, – тIий ур Жаруллагь.
Бусса оьрмулий цувагу лахьлай, цайминнангу лахьхьин буллай ур. Укунсса хIакиннайн тIайла авцIусса къашайшалан хъунма­сса бахтти хьушиврун ккалли бан бучIихьунссар.
2011-ку шинал Американава­сса даврил уртакьтуращал тIивтIуну бур Москавлив «Доктор Джордж» тIисса Стоматологиялул ва эстетический косметологиялул инновациялул центр. Жаруллагьлул хIурматран, Роберт Ордгу увкIун ур му тIитIлатIисса мажлисрай гьуртту хьун. ЦIана шикку 9-10 духтур зий ур, миннава 3-4 Дагъусттаннаясса ур.
Пишалул ххуллий буллалисса захIматрацIун, спортрал иширттавугу чялишну ур. Ва каялувшиву дуллай ур Дагъусттаннал Бадминтондалул федерациялий, хIарачат буллай ур ва спорт жучIава машхул бан. Мукуна хъанай ур бадминтон машхул даврил Ухссавнил Ккавкказуллал федерал округрал хъунама куратор. Жаруллагь ур спортрал мастер хьунсса кандидат. ЦIана ва цала дакIнийсса ца проект дузал даврия пикрилий ур. Цала дус, летчик-космонавт А. Мисуркиннущал вайннан ччай бур телевидениялий «Звезды бадминтона» проект зузи дурну, ххув хьуми аьламравун тIайла буклан.
Ваксса мажал бакъа унугу, Жаруллагь гьуртту шайссар «Дагестан» МЦК-лул дуллалисса давурттавугу. Гьарица шинах лакку мазрал диктант чичин лавгун, ххюварду ласайссар.
Медициналул ххуллийх лавгун бур Жаруллагьлул хъунмур душ Аминагу. Ва бур хирург-имплантолог ва цифровой стоматологиялул ортопед. Жаруллагьлул клиникалийгу зий, 3-мур медициналул институтраву кандидатнал диссертациягу чичлай бур. КIилчинмур душ, Карина, психолог хъанай бур. Щак бакъар вайгу бутта кунма итххявхсса, гьунар бусса бушиврий.
Медициналул вузирттал студентътуран маслихIат буллай, Жаруллагь ур Гиппократлул хъа тачIав хъамамабитару, «зарал мабара» тIисса калима хьхьичI ххуттайн ларсун, низам ва жаваблувшинна дуну зузияра, ахттар дуллалияра элму, гьаз буллалияра пишалул даража тIий.
Андриана Аьбдуллаева