1999 шинал сентябрьданул 5-нний, кIюрххи-кIюрххила, ххюттуршуннийн бивсса, хха­ллилну ярагъуннилгу балгу­сса чачаннал дяъвичитурал Да­гъусттаннал райондалул центр ЦIуссалакрал лагма рургьуна. Миннайн данди бавцIуна милицанал райотделданул 30 зузала ва 22 Липецкаллал ОМОН. ХIасил, душмантал ацIлийну чIявуя…
Сайки щаллусса гьантлий РОВД-лул къатраву баранбал талайгу бивкIун, лагмаругьулува личин бювхъуссар.
Мурахас дурсса шяраву эяллавусса пущу-пуркIувагу лещан бувая жу та дяъвилуву гьуртту хьуминнащал ва бардултращал хьунабавкьусса чIумал.

Сентябрьданул 5.

6.15 – 8.00.
Ссят арулуннийх зузисса чIумал, ЦIуссалакрал райондалул РОВД-лул начальник майор Муслим Даххаевлуйн гузат буллали­сса группардал баян бувну бур боевиктал, блокпостругу ппив буллай, райондалул вив бувххун най бушиву. Даххаевлул амру бувну бур дяъвилийн багьайкун хIадур хьун. Тиккувами милицалт бавтIун бур милицанал къатрачIан ва лагмарагу дурну дур цIакьшиву.
Цалчинми дяъвичитал миннан ххал хьуну бур ахънил зуманив, тIайланма РОВД-лул муххал-бетондалул «къуршилул» тия чулий. Дяъвичитал цIу Культуралул къатрайн дуруган дурну бивкIун бур: ми къат­рал спортзалдануву Липецкаллал ОМОН-далул кьюкьлул мина диркIссар. Чапхунчитуран цивппа ци дуллай бу­ссарив кIулну бивкIссар: ца омоновецнал бакIрах къачагътурал булай багьа бивкIун бур 2 азарда доллар.

Буслай ур майор Муслим Даххаев:

-Чара бакъа чичара жу цачIун хьун сант рутлай бивкIминная, хаснува АхIмад Давдиевлуя. Га ЦIуссалакрал ва ТIюхчардал дянивсса пострай хъунаману ­уссия. Къачагътурал ганал группалул лагмагу рургьуну, итабакьинну, оьруснал саллатI булурча, увкуну бия. АхIмадлул тIурча, дяъвичитурайх цIу дишин амру бувну бия. Мукьа цала увтун ия, яла цувагу увтун ия. Махъминнаща, ливтIуссагу хьуну, буккан бювхъуну бия.

Буслай ур омоновец Михаил Архипченко:

-Спортзалданул чIавахьул­ттай панжартту дия, миннул ххассал бувнав жу. Цал мичултрал лулалул лувсса гранатометрава бивтуна. Пюрунтругу ххит хьуна, панжарагу руцари хьуна. Жувами сагъну ливчIунав. Га ссят жунма-жунма ккаккан був­сса кIанттавун левчуру. Тикку жу атомрал бомбалул бакъа къабичинссияв.

8.00 – 12.00
Басаевлувтурал Культуралул къатрал ва РОВД-лул къатрал лагма рургьуна, ми кIивагу цIакь бувсса кIану ца-цаних ппив бан­сса кьасттирай. ЦIуссалакрал шяравалу дуручлачиминнал хIукму бувна, цачIун хьуну, ца кIанай цIакьшиву дан.
Цалчин милицалтрачIан ув­ккуна лейтенант-омоновец Лев Ореханов. Гава ссят рациялувух га айивхьуна Культуралул къат­рава цалами буккан бансса каялувшиву дуллай. Гай буккан баву бигьа даншиврул милицанал цIу дирхьуну дуссия. Му операция бан цаппара ссятру ларгуна: дяъвичитал «левчуну наниминнайн» буцири ярагъуннива битлан бикIайва. Укун ивкIуна Андрей Теперик, къачагътурал пулеметрал жарт бакIрайх тийннай ларгун дия. КIусса щаву дируна взводрал командир Алексей Токаревлуйн. ЧIал къавхьуну ккуллалул гъарс увкуна Александр Керсиковлуйх. Милицалтравугу бивщусса хъанан бивкIуна. Медикаментру бакIрайва биял хъанай бакъая – бинтру, щавурду дахIлай, къаливчIуна. Щавурдайх, энчIругу дуллали буллай, спирт дуккайва: «ХIайп, барачат бишивухъул, укун харж дан», — тIий, хъярчругу буллай.
Яла цIусса балагу ялун бивуна: мугъаят акъа къатрава увксса хIакин Эдик Белан ххишала зана къавхьуна. Чансса хIаллавун мичултрал радиолувух баян бувна хIакин ясирну увгьуну ушиву – му щялмахъ къабивкIун бия. Эдиклул цанна нясивмур аьзият мунияр махъри ккурхIусса.

Буслай ур ЦIуссалакрал милица Арсен Оьмаров:

-Жу цачIу талай бивкIру, цила багьайкун. БакIрайва чан­сса хIучIгума бия: «чехначIа» гранатометру дия, цивппагу цимилагу ххишаласса бия. Ца квад­рат метралий – ххю-ххюя инсан! Сайки цинявннахь бия пулеметру. АКМ (автомат) тайннал ярагъуннинвагу ккалли къабайва. Амма жу тайннайн цIарал чявхъа бурган бувкун, иш къулай хьуна.

Буслай ур майор Муслим Даххаев:

-Лагма рургьуну бусса щалагу хIаллай дахIаву дяличIан къарирт­ссар электросвязьрал узелданул начальник Полина Халиловал. Цила даврия махъунмай ша къалавсуна ванил. Тива бу­ккайнигу, жущалъя бусса.

20.00-22.00
МаркIачIанмай Дагъусттаннал виваллил иширттал министрнал цалчинма хъиривчу генерал-майор Сергей Оленченкол амру бувкIуна: ЦIуссалакрал РОВД-лул циняв зузалтран, цивппа цIакь хьусса кIанугу кьабивтун, цаламинначIан личин. Майор Даххаев му амру биттур бан къарязи хьуна: му ппур­ттуву чIявусса агьлу кьатI хьун най бия.

Буслай ур майор Муслим Даххаев:

-БучIантIиссар увкусса кумаг най бакъая. Нарив, ттуламиннал дакъа, Липецкаллал оьрчIал жавабгуяв дуллай усса. Сант дусса чIун дургьуну, личинсса ххуллу лякъин багьлай бия. Къачагътал, жу неххацIун личинмур буллан­сса ххай, колхозрал пирмалучIа луркIан дурну бия. Муниятуя ттул пикригу бусса: бачин Зандакьуллал – Чачаннал чулийн, тайннан жу бачинссар тIисса щак бакъамур чулийн.

Буслай ур омоновец Юрий Зубков:

-Муксса бияхха «чех» жул лагмасса хIатI чIикI-чIикI тIутIи бувну, кьатIату кумаг бучIанссар тIисса умудвагу бакъая. Буссавагу умуд гичча личинсса бия, гиккувасса милицанащал. Гайннан ххаллилну кIула кIантту,вацIри, ххуллурду. Мунияргу – жул гужгу бия цачIу бушивруву.

22.00 – 24.00
ДаххаевлучIан бивуна цIусса амру: «Личин!». Ва базилух амру бия цува Дагъусттаннал виваллил иширттал министрнал гьан бувну. Даххаевлул ккулла-янсаврал луртан хIисав дуруна: му дия, къизгъинну талай, ца ссятрай дакъа къадиянсса. Му тагьарданулгу бансса цамур бакъашиву бувчIин буллай бия. ХIадур хъанан бивкIуна. Ччув­ччуна кьюлтI документирттавасса цаппара. Цаппара – яла захIматми уголов деларду – цащалла ларсуна.

Буслай ур майор Муслим Даххаев:

-Яла бигьа бакъамур зат бия – гьан хар-хавар бакъа, щуркIал къахьунну. Тайннаща циняв хьулурдайх ва чIавахьулттайх цIу дишин бюхълай бия. Пикри бувссия чIира зеххин. Дуккарду чIираккутI. Кьакьардавух, ахъа­вух хьхьунил лякьлуву бавчуру Чачаннал чулийнмай. Тайннал ххалабакIурдацIух цIу щуна, гьарца зат чанна лархъуна, дях­тта кунна. Амма чIалссия…
Мюрщисса кьюкьри-кьюкьри хьуну, жу жуламинначIан личин бувккун бавчуру, дяъвилий дан ккаккан дурсса дуцири кьяйдардугу ишла дуллай: хьхьичIгу, чуллахгу къарал бачин бувну, гузлагу буллай, махъ кьюкьагу дачин дурну. Личин сант хьун дансса хасъсса цIу дишай гру­ппагу бивтун буссия ттул милицалтрая сакин бувсса.

Сентябрьданул 6.

1.00– 3.00

Буслай ур омоновец Михаил Архипченко:

-Шяравату буккайхту, ххал хьуна ччурччусса БМП. ЧIарах ливтIусса виртталгу бия. Циванъяв къакIула, ттун гай ца мюрщину чIалай бия, цайра мет­ра ва дачIи дакъа дакъасса кунма: кIиягу бия «сфералуву» ва броневикирттаву» (яни каскардаву ва бронежилетирттаву), гай бия ттигу чIаванувасса оьрчIру. Цаннал ччан чурххая личIи хьуну бия, хъачIгу ппив хьуну дия, амма ссихI буну ия. Саша Керсиковлул: «Кьаитан къабучIир», — увкуна. Жухь жулагу кIия ивщусса уссия, миннава ца – кIусса щаву дирсса. Амма цукун кьаитанссия! ЦIуницIа ганачIан ххярк учав – ссихI бувккун ия… Жу гай кьакьалуву кьабитарду, анжагъ урттугу ялун дирчуну.

Махъмукъун кIанай

Душмантурал ххяппула вай бувкссар, 25 километрагу риртун. Казбекуллал райондалийхчил хьуну, кIюрххил ссят 6-нний бивссар ЦIуссаккуллал шяравалличIан – тикку жулами бивкIссар. Бивщуми, БМП-лийгу бивхьуну, къинттуллухун гьан бувссар.
Зарал: ЦIуссалакрал милицалтраяту – 14 ивкIусса, 8 ивщусса, омонтурая – 1 ивкIусса, 6 ивщу­сса. Ца ятIа-тIар бакъа бат хьу­сса хIакин Эдик Белан. Махъ кIул хьуна га къачагътурал, аьзавр­тту дуллайгу бивкIун, бивтун увтшиву….
ХъачIрай хъачI дирхьуну, талай бивкIсса вирттаврал цаннащал ца кIул хьунукссагума чIун хьуну дакъая. Даххаевлул, даччин къадурну, цанна омонтурал кьюкьлул бакIчинал цIа хъамариртшивугу буслай: «Ххуйну дакIний бур цIа Сергей диркIшиву (фамилия Сковородин). ДакIний бур майор ивкIшиву. Виричусса, къирият дусса къучагъ ия. Вар, цивппагу виртталсса бияча».
Липецкаллал омонтурава­сса Михаил Архипченкол ххи бувна:
-Агарда цинявгу, цIусса­лакрал милицалт кунма, таларча, Басаевлул ва Хаттаблул «чIелмуллул оьрчIру» шиккун ххишала гъан къахьунтIиссар», — куну.
«Комсомольская правда» кказитрая
№ 40 «Илчи», 1999 ш.