Ттигъанну «Илчи» кказитрал редакциялий хъамалу уссия юрист, адвокат Увайсов Зиябуттин Буттал арс.

Увну ур Зиябуттин 1979-ку шинал МахIачкъалалив. Ванал ппу ур республикалий цIа машгьурсса судья, Дагъусттаннал Верховный судрал судьяну зий чIярусса шинну дурсса, Ххутрал шяравасса Бутта Увайсов, нину Мааьзат дур НицIавкIратусса.
Къуртал бувну бур МахIач­къалаллал 33-мур школа. 2000-ку шинал Дагъусттаннал паччахIлугърал университетрал юридический факультет къуртал бувну махъ, архIала аспирантуралувугу дуклай, зий ивкIун ур шиккува «Мусульманское право» спецкурс бихьлай.
2005-ку шиная шийнай – «Справедливость» тIисса адвокатътурал коллегиялул адвокат.
2010-ку шиная шийнай – «Традиция» тIисса адвокатътурал коллегиялул хъунама.

2017-ку шинал хIасул дурну дур «Монитор пациента» тIисса жяматийсса ккуран, къашайшалтран юридический кумаг баврил ххуллий зузисса.
ХIакьину Зиябуттиннул цIа республикалий чIявучин кIулссар, лавайсса даражалул юрист хIисаврай акъагу, жяматийсса ишккакку хIисаврайгу.
ДакIнин бутанну, 2020 шинал ковид цIуцIаврицIун бавхIуну, щалла дунияллий кунна, жулла республикалийгу захIматсса тагьар хIасул хьусса ппурттуву Зиябуттин Увайсовлул, «Монитор пациента» организациялул соцсетирдавусса аккаунтирттай арцу датIлан баян бувну, машан ларсун мюхчаншиврул сурсатру, дарчIуссар дур республикалул цIуллу-сагъшиву дуруччаврил идарарттайх.

«Монитор пациента» проектрал хъиривва хIасул бувну бур «Монитор ЖКХ» ва «Монитор дорог» тIисса 2 цайми проект, агьалинан ЖКХ-лул хIаллихшиннардайн багьайсса юридический кумаг баврил ва ххуллурдал ялув бацIаврил ххуллий зузисса.
«Монитор пациента» проектрал лагрулий къашайшалтран кумаг баврил ххуллийсса даврил ялув цалчинсса суалгу хIасул хъанай бур укунсса:
– Организациялийн бувксса агьалинан­сса хIаллихшиннардах юристътуран багьа булунсса арцу ча лякъару?
– Инсантурал чири­лун ду­­­ллу­­­­­сса ва тан­­михI­­­райн кIункIу бувмин­ная дартI­­сса арцуйну щаллу хъанай бу­ру.

– Зул идаралул сайтрай ккаккан бувну бур карталул номер. Карталийн жущалва муттаэсса билаятрая арцу дучIарча, зува иноагентнан ккалли бан бюхъайшиврия нигьачIаву дакъассарив?
– Аьрасатнал карталийн чил билаятрая арцу дичин къашайссар. Мукунма чил билаятрал карталийн Аьрасатнал карталиягу.
СВО-луцIун бавхIуну ва къулайшинналий къадагъа дуссар.

– «Монитор пациента» идаралийн агьалинал чулухасса аьрзри ци журалул бикIай?
– Шикку бур 2 буруккин. Агарда хронический цIуцIаву дусса инсаннан аьркин хъанай духьурча чIярусса арцу, масалдаран, ласунну диабетрал къашавайсса инсан, зурул бакIрах 15 азарда къуруш дарурттах харж дан багьлагьисса иш бухьурча, ванан паччахIлугърал ккаккан бувну буссар уква дарурттал щаллу уван ягу дарурттахсса арцу дулун.
Агарда къашайшала азарханалийн кьамул къаувну ухьурча, вайннаща буккан шайссар ФОМС-райн. Нажагь вайннал масъала щаллу къабарча, мукунсса аьрзригу кьамул байссар жу. ХъунмурчIин жучIан бучIайссар дарурттансса хIаллихшиннарду дусса къашайшалт, зуруя зуруйн даруртту аьркинсса: диабетиктал, диализрайсса къашайшалт ва эпилепсия думи.

КIилчинмур масъала – реабилитациялун аьркинсса технический кумаг: коляскартту, протезру, чIунил аппаратру.
Вай цила чIумал ласун къабюхъарча, жул кумаграйхчил ласун бюхъайссар. ХIакиннал гъалатI сававну, зарал хьусса инсантурангу кумаг бан шайссар жуща.
На циван зий айивхьура чирча ва проектраха, цIуллу-сагъшиврул бунияласса буруккин бусса инсан цанма паччахIлугърал ккаккан бувсса дарув тIалав бан хъанай акъар. Жул хIаллихшиннарду тIурча, украссар. Даруврах мюхтаж­сса инсантуран кумаг бансса арцул ялув жу буккару иш бавчусса идарарттайн,

– Аьрзри паччахIлугърал идарарттая бикIайрив ягу частныйминнуя ?
– ЧIявуми бикIай паччахI­лугърал идарарттая. Цанчирча, паччахIлугърал уква булун ккаккан бувсса даруртту частный идаралул буллай бакъар. ХIакиннал гъалатIругу паччахIлугърал азарханардай хьунабакьлай бур, цанчирча, захIматсса операция частный клиникалул бакIрайн ласлай бакъа тIий. Хьунабакьай УЗИ къатIайлану баву сававсса аьрзригу.

– Къашайшалт ча бучIай чIявусса, бикIайрив районнаяссагу?
– ХъунмурчIин МахIач­къалалия, яла гъансса шагьрурдаягу. Шяраваллил кIанттурдая, лахъисса ххуллу битлаяр, къа­бучIай, так хъинну захIматсса тагьар духьурча бакъасса.
– Цуксса чIун аьркин шай инсанная аьрза кьамул бувну, ванил хъиривгу лавну, щаллу буван?
– Аьрза щаллу баннин цаппарасса шачIантту битан багьай. Цалчинма-цалчин, жу буккару аьрза чичин савав хьусса идаралийн. Идаралул щаллу къабувну, судрайн буккан багьарча, хъирив лавну, хIукму кьукьиннин дачIи шин лагай.
СВО-луцIун бавхIусса санкцияртту сававну, цаппарасса чил билаятирттая бучIайсса даруртту жула рынокрая лагаврийнугу захIматшивуртту хьунадакьлай дур. Вай бучIан бансса ххуллурду лякъингу чIун лаглай дур.

– Судрал хIукму кьамул бувну приставтурахьхьун буллуну махъ зул ялув бацIаву дуссарив?
– ЖучIава вихшалдарал чагъар кьабивтминначIан зуруй кIийла-шамийла оьвчайссар тагьардания цIуххин. ДачIи шинал лажиндарай судрал хIукму щаллу къавхьуну бухьурча, жу цIунилгу булайссар иск, чIал баврихлугу арцу тIалав дайссар жаваб дуллалиминная.
– Ингушнаву ва Къа­бардин-Бал­кьар­навугу зий бикIайва зул филиаллу. ХIакьину буссарив вай зий?
– Республикарттайсса фи­лиа­ллу лавкьуссар. Арцу диял хъанай дакъая. КIантту-кIанттурдай къалявкъуна спонсортал, Дагъусттаннал спонсортурал арцуцIух жулассаннацIун тайгу дузал буллан ка хъирив лалай дакъая.

– ЖКХ-лул хIаллих­шиннардил ялувсса аьрзри ци журалул бикIай?
– ЖКХ-лул хIаллихшиннар­дил ялув аьрзри чIявусса къабикIай, хIатта ва аралуву агьалинал буруккинну чIявусса бухьурчагу.
Масалдаран, ласунну жула республикалий, сайки гьарца шагьрулий хьуннав, шяраву хьуннав, чани лещаврил буруккин. Амма ва иширал ялув аьрза буллуну, щаллу хьуннин чIун най дур. Мунихлуну, агьали аьрзри чичлай, мунилсса буллаяр, къачивчунма кьабитлай бур.
ЖКХ-луву агьалинал чулухасса яла чIявуми аьрзри бикIай управляющий компаниярттал цала буржру цила багьайкун биттур буллай бакъашиврийн багьайсса. Масалдаран, капитальный ремонтрал ялув – ва хIаллихшиндаран ккаккан дур­сса тариф духьурчагу, хьунабакьай ишру управляющий компаниярттал тарифрай ккаккан бувсса багьа зурул бакIрах ласлай бушивруцIун, хасну капитальный ремонт дуванни тIий датIлатIисса. БикIай аьрзри щин дакъашиврул, ттукI лешлай бушиврул ялувссагу. Ларгсса шинал МахIачкъалалив Редукторный поселокрай газ пIякь чаврийну зарал бивсса инсантурава шамуннал буллуна аьрзри. Вай аьрзачитурал чулий щаллу хьуссар, бивсса заралданухлу арцу ласун кумаг бувссар.

ЖКХ-луву бикIай яхьунсса къатри тIалав даврил ялувссагу аьрзри. Цалчинмур группалул мушакъатшиву дусса инсаннан паччахIлугърая къатри дагьлагьиссар, шинал бакIрах ттуршрайра къатри дулун ккаккан бувну буссар. Вайннан дулай­ссар къатри ласунсса сертификат. Ласун къахъанахъисса ишираву жу кумаг байссар.
– ЦIуллу-сагъшиву дуруччаврил министерствалущал, ОМС-ращал, паччахIлугърал идарарттащал дахIаву дуссарив?
Дуссар. Жу вай идарарттал даврия ягу вай идарартту жул даврия щалва рязину буссар куну учин къахьунссар, амма вай идарарттай сакин бувну буссар советру, ми суаллал ялув бацIлансса.

– Инсантуран кумаг бан къавхьусса ишругу шайрив?
– Къавхьунугу къабикIай. Амма судрайгу, прокуратуралийгу къашавайсса инсантуран даруртту аьркинсса ишираву хъирив къалавну къабацIай, ЖКХ-лийн, ххуллурдайн багьайсса суал къулагъас къадурну ливчIсса иш хьурчагу.

– «Монитор дорог» проектрал лагрулий ци давуртту дуллалиссар?
– Ххуллурдайсса къуйрду духлаган даврил, дакьин даврил ялувсса давуртту. АцIния мукьва гьантлул дянив щаллу дан аьркинссар жуав. Ванил ялув агьалинал чулухасса аьрзри къабикIай, жува занай, ялтту буклай, ГАИ-лул инспекция тIалав буллалаву бакъасса.

– Гъилахъангу, кIи­лахъангу чани лешлашисса районну дур МахIачкъалалив. Ванил ялув аьрзри къабу­чIайрив?
– Агьалинал чулуха хъинну чансса бикIай аьрзри. Инсантуран ва чIивисса буруккинну чIалай бур, мунияту ванил ялув аьрзри чичлай, бакI цIуцIаву дуллай цучIав акъар.
Шинал лажиндарай аьмну 72 ссят хIисав хъанай духьурча чани левшсса, вай къатравусса квартирарду хIисав бувну, ца къатлун аьчIа дишин аьркинссар Россетилия.
– Судрайн аьрза чичирча, ци багьа буссар муних, учиннуча, госпошлиналул багьа?
– Шанттуршра къуруш. ЦIа­на аьрза чичин захIматшиву дакъассар, Госуслугилий буссар гьарца аьрзирал мисал. Так цIа ва адрес даххана данни бусса.

– Буси вила кулпатраягу.
– Ттул кулпат Гъумучасса бур. Буссар ххюва оьрчI – цавай — студентътал, цавайгу — школалийн заназисса.

– Лакку мазрай ихтилат барув ужагърай?
– ХIарачат бару. Ттул ппу Къазахъисттаннай хъуна хьуну ия. Лакку мазгу кIулну къабив­кIун бур. Зувира шинаву, Да­гъусттаннайн ивзун махъ, лав­хьхьуну бур цила багьайкун, лакку мазрайсса макьаларттугума чичайва. Маз ччимур оьр­мулуву лахьхьин хьунссар, так маз ххиранугу буну, ва ла­хьхьинсса, ваний гъалгъа тIунсса гъирагу бухьурча. Нагу, ттула гьалмахтурацIух уклай, хIарачат буллай ура лахьхьин, гъалгъа тIун.

– Барчаллагь хъунмасса, Зиябуттин, кабакьиннав ина дуллалимуницIун.

Ихтилат чивчуссар
Зулайхат Тахакьаевал