Къизляр шагьрулийсса Спортрал комплексраву хьунни хасъсса аьралий операциялий къуллугърал бурж биттур буллай жанну дуллусса «Ястреб-Каспий» СОБР-ал зузалтран хас бувсса Регионнал дянивсса лачIун буккаврил бяст-ччал.
Бяст-ччал хьуна чIава жагьилтурал дянив. Мероприятиялул сакиншинначитал бия Дагъусттаннал Халкьуннал Мажлисрал депутат Вагиф Аьбдуллаев, Къизлярдал райондалул мажлисрал депутат Шамил Жамалуттинов, ДЮСШ-рал тренер МахIаммадрасул Аьбдуллаев. Вайннал дуллалимунин кабакьу бувна Къизлярдал шагьрулул ва райондалул администрациярттал.
Бяст-ччал ххал бан бувкIун бия ХIукуматрал ва кIанттул администрациялул вакилтал, жанну дуллуминнал дустал, даврил уртакьтал ва мачча-гъанми. Цинявппагу шиккун бувкIми барча буллалисса ихтилат бувна Къизлярдал райондалул бакIчи Аким Микировлул.
Хъирив ихтилат бувсса «Ястреб-Каспий» СОБР-ал командир, полициялул полковник Запир Алискантовлул бувсуна билаятрал мурадру буручлай къучагъшиврий жанну дуллусса отрядрал вирттаврая.
– Укунсса къучагътал ялун нанисса никиран эбратну хьун аьркинссар. Вай жунма абадлий дакIний бикIантIиссар.
ХIакьину бяст-ччалливу гьуртту хьун бувкIсса цинявппагу спортсментуран на чIа тIий ура спортравугу, оьрмулувугу чIярусса яргсса ххувшавуртту, – увкуна хасъсса подразделениялул командирнал.
Бяст-ччалливу гьуртту хьун бувкIун бия 6 региондалиясса (Дагъусттан, Чачаннал Республика, Ингушетия, Ухссавнил АьсатIин-Алания, Ставрополлал край ва Крым) 120-нния ливчусса спортсментал.
Ххувшаву ларсминнан ва хьхьичIунсса кIанттурду бувгьуминнан дуллуна медальлу, грамотартту ва арцуйнусса бахшишру.
Цалчинсса кIану бувгьуминнан – чемпионнал мухIулттивгу. Турнирданул лагрулий Спортрал комплексраву хьуна «Собери ребенка в школу» тIисса ихIсандалул акциягу. Мероприятиялул сакиншинначитурал ва хъамаллурал буллуна портфельлу ва школалийн аьркинсса кьай СВО-лий жанну дуллуминнал оьрчIан.
Запир Алискантов ва хъамал мукунма бивуна «Милосердие» тIисса, бугьарасса ва мушакъатсса инсантал чIумуйну ялапар хъанахъисса пансионатрал отделениялийн, буллуна шиккусса инсантуран дуки-хIачIиялул кьуцуртту ва бахшишру.
Андриана Аьбдуллаева
