Байранну гьарзасса гъинтнил гъилисса август зурул 16-нний, дунияллийх цIа ларгсса пагьламантурал шяраву, 2200 метралул хьхьирияр лахъну, Щунул щутталу дирхьусса Цалчинмур ЦIувкIравгу хъуннасса байран дия, Шяраваллил кьини дуван чIявусса агьлу бавтIун бия, тарих дакIнин бутан, жагьилми куннащал кув кIул буван.

Ччянира цIакь хьусса аьдат дунугу Шяраваллил кьини лахъа-хъунну кIицI лагаву, махъсса шиннардий, личIи-личIисса ишру хьхьичIун багьну, къавхьуна байран дуван. Биялну мякь був­ккун бунуккива ЦIувкIуллал жямат буттал аьрщарах, ша бизансса кIану бакъа, агьалинал дурцIуну дия шяравалу. Мероприятие дайдишин хьхьичI, жямат кIюрххила хIатталлив лавгуна, мачча-гъанцириннал гьаттардий кьулгьу-кьуран буккин. Яла шяраваллил зума-къирагърайсса школалий байрандалул дайдихьу дуллалисса махъ лавхъуна ЦIувкIуллал Жяматийсса со­ветрал хъунама, профессор МахIаммадбаг ХIусайхановлул. Ванал махъ лахъайхту, аьдатрайн бувну, лакрал гимн увкуна агьалинал. Шиккува кIицI лаганна, цIувкIул байрандалийн хьхьичIва хIадур хъанай бивкIшиву, байрандалун аьркинмур ласунсса ва шяравусса давуртту дуллан­сса фонд хIасул бувшиву, ва фондравун гьарманал дакI дирсса кумаг бувшиву ва сахаватну ка кIидархIуссагу хьушиву.

Байрандалул программагу гьарза-гьартасса дия: спортрал бяст-ччаллийсса тIуркIурду, пагьламантурал конкурс. ХIурмат лавайсса хъамал хьуннав, жямат хьуннав, лагма лавгун, ссупралух щябивкIун, махъру лахълахъи­сса, балайрду тIисса, къавтIавуртту дуллалисса мажлисгу бия, ванил хъунмур хъар ларсун ия музыкант ва балайчи Шарапи Ажубов. Спортралмур хъар дия СантIуев МахIаммадлуй, Каспийскалиясса Ах1мад Х1ажиевлуй, Х1ажимурад Исяевлуй, Садикь Бакриевлуй, дуки-хIачIиялулсса – хъунама цIигьур хIисаврай Хизриев МахIаммадлуй. Шиккува кIицI лаганна, Мугьажират Даниялова бакIчисса хъаннил кьюкьа лагма ларгун, цIигьуртуран кумаг буллай, дяхьхьунивунин аьрайн гьавккури буллай, бавкьуну, нахIуну, махъгу ца бувну, дакIругу ца дурну, зий булувкьуну бия. Футболданий бикIу, ка дишаврий бикIу, хьхьуттай гьунарду ккаккан буваврий бикIу, хьхьичIунсса кIанттурду бувгьунан дипломру ва арцуйнусса бахшишру дуллуна шяраваллил клубраву. Спортрал т1урк1урдаву хьхьич1ун бувкминнан арцуйнусса бахшишру дулуна цала чулуха Башир Сант1уевлул. Рабадан ва Рима Оьмариевхъалгу цала арснал, аьпа биву, итххявхсса спортмен Робертлул аьпалун арцуйнусса премия ккаккан дурну дия.Бувна гурсса ссувхIат. Хъирив кьини, кьасса ардал аьнттувусса Цумур щиначIа дия бигьалагаврил программа. Байран барачат хьуну, ЦIувкIул цIулаганхьуви.
Утти байрандалий гьуртту хьуминнал пикрирду.

Башир СантIуев, жяматийсса ишккакку:
– ХIакьину ттун хъинну хъуннасса тирхханну дур, вай жулва ялун нанисса жагьилтурал шяравалу ядаврил ялув бакIцIуцIаву дуллай чIалай. Жунма чIалай бурхха, жува жулва наслу шяраваллавун кIункIу къабулларча, укунсса байранну ва цаймигу мероприятияртту къадулларча, жулла шяраваллил ялун цукунсса нигьачIишиву най дуссарив, аьдатру хъамадитан най душиву, жулва оьрчIру куннан кув къакIулну хъуни хъанан най бушиву. Кьунияхъайсса инсантал Аьрасатнал ва Дагъусттаннал халкьуннал артистътурал ва лайкь хьусса артистътурал цIардан лайкь хьусса шяравалур, цайми хьхьичIуншивурттайн бувагу къабуккарчагума. Вай циняв кIанттурдугу хIисавравун лавсун, ва даву ххуйсса даражалий дуван хIарачат буварду, барчаллагь чIарав бавцIуцириннайн. Уттиния тийннай, Шяраваллил кьини ванияр ххишалану мюнпатну дувавансса хIарачат бикIантIиссар, субботникру дуллай, кIичIиртту марцI буллай. ЦучIав тийнайну къаавцIуну, циняв хIала бувххун.

МахIаммадрасул Ильдаров, шяраваллил хъунама:
– Байраннайгу, гьар иширавугу ЦIувкIуллал жямат цачIун батIавриву так ххуйшивур дусса. ХIакьину шяраву бувагу 20 къуш бур. ЧIярусса къатри лекьлай дур. Леркьссагу дур. Ттун ччай бур шяравун бавтIсса инсантуран ци тагьар дуссарив ккарккун. Дакьин дайминнал къатри дакьин дурну, цIусса дуван ччиминнал цIусса дурну, куннал кувннан кумаг буллай, шяравалу уттара дуккан дувансса мурадри гьанумур. Ва байрангу ва ххуллийсса давур. Лекьлакьисса, леркьсса къатрал заллухъруннай бишинтIиссар къатри лазилакьи дуван аьркиншиврул масъала. Агар мажал бакъа, каши дакъа, гъира бакъа ухьурча, залунная ихтияр ласунтIиссар мунал къатри жура лазилакьи дуван. Шяраваллил чIалачIин, диц-куц зия дуллай дур мукунсса къатрал, дакIругу зия дуллай дур. Байрангу дурну, байбишинтIиссару вай цинярдагу давурттаха зий.

МахIаммадрамазан Кьурбанов, имам:
– Байрандалия мукьах жул пикри буссар, мизитгу ккурчIавва бухьувкун, бивкIу хьуний инсантал кьулгьу-кьурандалий шябикIавансса къатта буван. Инсан буттал аьрщарай уччайсса аьдат дуссар. Шяраву инсан уччин ччинан къулайсса даву хьунтIиссар. Бур мизитрацIун бавхIуссагу, цайми журалул давурттугу дувансса пикрирдугу. Хъунмасса захIмат къахьунссар, гьарца кулпатрал цащара бюхъаймур фондравун дулурча, дуллайгу бур. Жува буржлувссару, диндалул ххуллу-ххагу цIакьну бурувччуну, ва жулла шяравалугу, ппухълуннал жунна ядурсса кунна, ядан. Мукунма ца цIюрувкьусса масъала ялагу бур, шяраваллавугума лакку маз бухлаглай бушиврул, буруччин багьлай бушиврул масъала. Шяравугу, ичIувагу, школалийгу, мизитравугу лакку мазри бикIан аьркинсса. Жяматрал циняв мурадру хьхьичIун лавсун бартбигьлантIиссару. Бугьарду мизитрачIа цIусса мурхьругу.

Людмила ХIасанхIусайнова, педагог:
– ЛичIину хъуннасса чIун къадиркIнугу, ччясса мутталий хIадуршиннагу дурну, къаоьккину ларгунни. Шагьрурдайгу ЦIувкIуллал ва ппурттуву чIя­русса мероприятияртту дия, диркIхьурчагу, бавтIун, байран дунни. Ттул умуд бур чIярусса шиннардий шяравун къабивсса, къабувкIсса вай инсантурал дакIру хъюлчай учин дуван куннасса суратру ккаркссар, шяравалу цIу дуккан дувавриву бутIа бишин хьхьичIунмай хьунссар тIисса. Барачатсса дайдихьу хьуннав!
Камил Мяммаев, Аьрасатнал «Караматсса инсантал» тIисса телепроектрай ххув хьусса пагьламан:
– Байрандалун чанмур, диял къахъанахъимур зат чIун чансса душиву дия. Спортрал соревнованияртту, оьрчIансса программа, пагьламантурал конкурс, культуралулмур бутIа, гьарзат чярхний хIала-ккалану дуван багьунни. Хаснува оьрчIаву чIявусса бия пагьламан лахъан, хьхьуттайн гьаз хьун ччисса. Мунияту ялунчIин, тулунчIин кIира-шанна кьини ккаккан дуван багьлай бур байрандалун. Биялсса бия архсса шагьрурдая бувкIссагу, туристъталгу.

Рамазан ХIажиев, ЦIув­кIу­ллал пагьламантурал школалул каялувчи;
– Вай шагьрурдая бувкIсса, цалагу хьхьуттайн гьаз къавхьусса оьрчIругума нигь дакъа гьаз хъанай бия хьхьуттайн, сивсуну шару ласлай бия. На 2 шинай Ваччав зий уссияв, райондалул шяраваллавасса оьрчIан хьхьуттайх лахъан лахьхьин буллай. Ваччавсса цIувкIраоьрчIру 2-мур кьинива хьхьуттайх шару ласлан бикIайва, цайми шяарваллавами сайки 2 зурува сисайва. Генетикалул иш бухьунссар. Бур шяраву паргалсса оьрчIру, душру, буминнан ла­хьхьин буллантIиссару. ЦIуллушиву дулуннав ялунчIингу буттахъал аьрщарай вава куццуй шадну хьунабакьлан!

Альфия Абакарова, ишбажаранчи:
– На ва байрандалух хъинну мякьну ялугьлай бивкIра, шяравун къабивну ттулла 15 шин хьуну дунутIий. Цума-цагу инсаннан Ватан дайдихьлахьиссар нину-ппу бувсса, хъуни хьусса аьрщарая, гьанурдая, мархрая. Цуксса архну ухьурчагу инсан ппухълуннал миналия, ванал дакIниву мархращалсса дахIаврил ххал къадуцайссар. Укунсса байраннал ялун нанисса никиран тарбия дуллалиссар, буттал аьрщарахсса ччаву дутлатиссар. Мяйжанссар, дия мюрш-кьюршсса диялдакъашивурттугу, агьали чIявушиврул, чун бачинссарив, ци дулланссарив къакIулссагу бия, хьхьичIва ватсаправусса ЦIувкIуллал ккурандалуву суаллу буллай, цанма аьркинмур мяйжан буван ччи­ссагу бунува. Амма шяравун биявриясса, шяраваллил агьали кка­ккавриясса ххаришиврул мукун­сса мюрш-кьюршсса ишру ялтту-лултту гьан бан ччай бия. Чунмай ябитарчагу, дакIнин ччисса, ххирасса инсантал бия лагмава. Шяраваллил агьлу – ца хъунмасса кулпатри, куннал кувннащалсса арардугу ца кулпатраву куннассар. ЯлунчIингу укунна цашиву ккаккан дуллан, буттахъал аьрщарал цIа-кьини дюхъан дуллан цIуллушиву дулуннав !

ПатIимат Рамазанова