Дюкъуллал шяравусса цIусса дуккаврил шин дайдихьулун хас дурсса шадлугърай шаэр, прозаик, тарихчи ва краевед ХIадис ХIадисовлул «Илчилул» редакциялул Ххувшаврил байрандалун хасну баян бувсса, лакку мазрайсса назмурду дуккаврил конкурсрай ххув хьусса Байрамова Ххадижан буллунни дипломгу, Булбул Оьмариевал «Ссурулккуртта» тIисса оьрчIансса назмурдал лугу.
Ряххилчинмур классраву дуклакисса Ххадижан хьхьичIунсса кIану буллуссия СВО-лий жанну дуллусса лакрал жагьилтурал ниттихъал цIания чирчусса назмулухлу. Ва назмулул авторгу ХIадисхъал ХIадисри, Дюкъуллал школалий Дагъусттаннал тарихрал, лакку мазрал ва литературалул дарсру дихьлахьисса учительли. Гьаннайсса, Ххадижа лайкь хьуссар Ххувшаврил диплом назмулул авторнал, гьунар бусса шаэрнал ва учительнал кIунттива ласун.
– Дюкъуллал шяравалу архну духьувкун, Ххадижаща ххув хьуми барча буллалисса шадлугърайн гьан къавхьуссия. Нагу хIукму бувссия ванин диплом булун КIулшивурттал кьинилул шадлугърай, цинявннал хьхьичI барчагу бувну, бусравну, – увкуна ванал.
ХIадисхъал ХIадис цувагу барча увансса цамургу хIучча буссар: вай гьантрай Дагъусттаннал Чичултрал союзрал лакрал литературалул секциялул хъунама Супиян Оьмаровлул ванахьхьун дуллуна Аьрасатнал Чичултрал союзравун кьамул увшиврул удостоверение. Ччянива лайкьссар ХIадисхъал ХIадис!
Чан-кьанну ванаяту цаявагу бусан, ванал Дагъусттаннал паччахIлугърал университетрал тарихрал факультет къуртал бувну бур. 1984 шиная шийнай зий ур учительну. ЛичIи-личIисса шиннардий Дагъусттаннал луттирду итабакьай издательствалул ванал шеърирдал ва хавардал луттирду итабавкьуну бур. Ванал бавтIссар Дюкъуллал тарих ва фольклор, вайгу дунияллийн буккан бувссар. «Дагъусттаннал тарих суаллаву ва жавабирттаву» тIисса, дуклаки оьрчIансса пособие хIисаврайсса лугу итабавкьуссар. Гьаннайсса, Рутуллал аьрщарай лакку мазгу ябуллалисса, лакрал, Дагъусттаннал тарихгу лахьхьин буллалисса инсанни. Педагог хIисаврай ванал даврин лахъсса кьимат бивщуну бур хIукуматралгу: ва ур «Аьрасатнал аьмсса кIулшивуртту дулаврил бусравсса зузала» ва «Дагъусттаннал просвещениялул отличник». ХалкьунначIа ва тарихраву мудан бусраврай цIа личIансса давуртту ванал канила чансса дурккун дакъар. Лакрал тарихрацIун дархIусса чичрурду дунияллийн дуккан дуваву – вагу ванал бивхьусса хъунмасса захIматри, ванал захIматран багьавайсса кьимат бищун жува бувасса ххай бура. Уттигъанну кунма бувккунни дунияллийн ванал «Камни рассказывают» тIисса лугу.
Барча хьуннав, ххаллилсса зунтталчу, пасихIсса лакку мукъул усттар, Лакку улклул язисса арс ва хIакьсса шаэр ХIадисхъал ХIадис, вил хьхьичIуншивуртту! Лакку мазрал ва лакрал тарихрал цIа-кьини дюхъаврил ххуллий ина бувсса ва буллалисса захIматгу, вил пагьмугу, мазгу, миллатгу ххирашиву ва миннуха къуллугъ буваву чара бакъа бусравгу хъанахъиссар, барачатгу хъиривссар!
ПатIимат Рамазанова
