Дяъвилул ттупал чIурду ЦIуссалаккуй чансса лагь шайхту захIматри инсантуран та чIумал бивкIмур дакIнийн бутлан.
Амма хъанай бивкIмур махъминнангу кIулну бикIувча тIий, ттун багьунни ччурччу дикIуйн цIу бичлачисса журалий инсантуращал ихтилат буван.

Миннавусса ца хъанай бур дяъви нанисса чIумал ЦIуссалаккуй 10 гьантта цала багъравусса кIаланнуву хъуннар хьусса, къашавайсса, дизаннагу къахъанахъисса ниттищал бувсса, райондалул администрациялул хъунаманал секретарша Роза.
— Га кьини на кIюрххил ссят 6-нний чантI увкура, — тIий буслай байбивхьуна цилва хавар Розал. – Ссят арулла шавайсса чIумал кIюрххилсса дуллан байбивхьура. КьатIату Аллагьу-акбар тIисса веврду, автоматирттавасса битавурттал чIурду баллан бивкIуна. Хъанахъимур къабувчIлай, кьатIув левчура. Автоматращал РОВД-лул чулухунай левчуну нанисса чIаххувчу, милица Нариман Юнусовлул лихъияра, мабацIари кьатIув, лабикIияра куна. Къатлувунмай бувххун, чансса хIаллавату битавурттал чIурду паракьат хьуна. Яла ттухь, дакIний бакъар щил бувсъссарив, боевиктал ххявхшиву бувсуна. Жу шава га кьини шама инсан уру: нагу, ттул къашавайсса 87 шинавусса нинугу, арснал душгу. На анаварну шану-кIаралу ххюрхху бав кIаланнувун. Яла телефонналувух райондалул связьрал хъунмур Полина Халиловайн оьвчав. Ганин кумаг буллай бия связистка Залмугу. Полинал ттухь бувсуна цала лагма боевиктал бушиву ва гивату буккан бюхълай бакъашиву. На гайннахь, дакI данмур буслай, пикри мабару, кьянкьану бикIияра тIун бивкIра. Ганил ттухь райондалийсса связь кьукьиннин райондалул администрациялул бакIчинал бурж биттур буллалисса Т. Оьмаевлущал дахIаву дан ччишиву бувсуна. На га усса кIанайн оьвкусса чIумал, мунал ттухь халкьуннан баян бувссар, цинявппа райондалия буккан аьркинссар, инавагу анаварну букку увкуна. На ттущава къашавайсса нинугу кьариртун букан къабюхълахъишиву бувсукун, мунал ттухь кIалан ххал да увкуна.
Яла на байбивхьура телефондалувух цинявннайн оьвтIий лихъияра, ххассал хьияра тIий. Оьвчав ТМО-рал хъунмур хIакин Людмила СултановачIан. Мунил ттухь марцIсса лакку мазрай: «На боевиктураву бура, ттуща гъалгъа тIун бюхълай бакъар, — увкуна. Трубкалувун баллай бия боевиктурал ганихь гьужумрай «Оьрус мазрай гъалгъа ба» тIисса чIурдугу. Яла оьвчав райондалул администрациялул къатлувун. Гикку трубка гьаз бувна Арсен тIисса жагьилсса милицанал, цукун ура ниттил увкукун, ганал ттухь ххуйну ура, нигьамабусари, жува дяъви къуртал хьуну махъ хьунабакьинну увкуна.
-Ккашилнувагу акъарав, ччатI ва нисрагу ларсун бучIавиявхха, бита-ххитаврил кьатIув буккан шайсса иш бакъар, — увкуссия. КIюрххила ттуща ттула арснал душ ливхъун нанисса мачча-гъанминнащал гьан бан бювхъуна. Куяв (ласнал племянницал адамина), на къабувцуну гьан къахьунссар тIий, левчуна ттул хъирив увкIуна.
Нину кьадиртун ттуща бачин къахьунссар учав на. Жу кIинналагу, гьаз дурну, нину кIаланнуву дишарду ва жувагу мивун бувххун хьхьу гьан дарду. Хъиривмур кьини кIюрххицIун нину диркIусса кунна ссихI къабигьлай дия. Жун пикри хьунни га багъраву дуччин. Жу му къатлувун гьаз дарду. Му чIумал Къизилюртлияту га цIаравух, га балаллувух ттул хъирив бувкIуна занабивкIун племянница. Гичча лихъаннин жу нину дучлан бивкIру. Племянницал: — Вания гъелину дур, — увкуна.
-Нава банна ванилссача, лихъияра, — учав. Гай лавгун чансса хIаллава ниттил ссихI бивгьуна. На га ттула хъачIунттай махъуннай кIаланнувун ххюрхху дав. Ттуща 3 баклажка щинал ласун бювхъуна (4,5 л.). Дукра чан-кьансса кьацI чинсса дакъа ласун къабювхъуна. Жул ялун снаряд дагьуна. Ялувсса муххал турбардал жу ххассал бувнав. КIаланнул ялун кьатI хьусса аьрщарал гивун бургъил тIинтту дагьан дитлай дакъая. Так битавурттал ва бомбардал чIурду баллай бия. Боевиктурал тиху-шихунмай заназисса чIурдугу баллай бия. Гьарца хьхьуну жуяту арх акъа ца боевик балайлий щютIа тIун икIайва. Му чIу уттигу ттул бакIрава буклай бакъар. Нинурив на, кIаланнувусса банкри дишайсса чIамулу кIану бувну, гилу уттудишин дурссия. Навагу мунил чулухун багьну хьхьурду гьан дуллай бивкIра.
Ци хъанахъиссарив цинма къабувчIлачIисса нину ттухь на ккашил хьуннача ттун нугъай чяйрагу да, жучIара дакъахьурчан накI, чIаххуврахь дула учача тIий дия. ЦIана данна, хъинни тIий на га хъяврин дуллай буссияв. На вихну бияв ЦIуссалак ччясса мутталий душмантурацIа марцI бантIишиврийн.
Ялува ливчIсса жул ккаччи кIаланнул ялтту занай бушиву бувчIлай бия. Ударный волналул му личин дурсса нузавух жучIан багьуна. Му бия ччаннайн щаву дирну.
Гъараллу лачIлан диркIуна. КIаланнувун мичча-тичча аьрщи хIаласса щинну дарчуна. На нину кIучI дуллан бивкIра. Ттула ччан кIучI барчан ка, ка кIучI дарчан ччан кIучI бан къабюхълай бия. Атил хьусса чурх бяхълан бивкIуна. 10-мур кьини ссил арснал Надирдул, къувилул ялалугу марцI бувну, нуз тIиртIуна. Му чIумал ттун ккавккуна чани, яла ттунма ххирасса жулва халкь. Ттуща бусан бюхълай бакъар мукъурттий га кьинисса ттула ххаришиву. На бияв ва дунияллий яла талихI бумур хъамитайпа. Му кьини ттуща ссахачIав лащан дан къабюхъанссар. Бия гикку райондалул чIявусса чиваркI, гъан-маччами ва цайми кIулсса-къакIулсса халкь.
Ттул ттула лякьлул оьрчI бакъассар, амма гай циняв гиккун бавтIсса оьрчIру ттун ттула кунма чIалай бия.
Миккува ттун ккавккуна ТМО-рал хъунмур Людмила Султановагу. Жул хьунабакьаву ххаришиврул мукьащалсса дия. На му хъамитайпалунгу хIалалли тIиссара виричунал цIа. Мунил райондалийн кьини дурксса чIумал виричушиву ккаккан дунни. На бувцунав Ккулув, гикку Саида тIисса медсестранал, на цачIанма бувцуну, лажин-ка шюшин кумаг бувну, нинугу марцI дурну, жун дукра дурна. Ттул ниттил цалчин чяй дула увкуна, ттущарив цичIар дукан хъанай дакъая (хъуннасса хIаллай къадуркунугу бивкIун дукра дукан нигьа- буслай бияв).
Яла ЦIуссаккуллал хъами бувкIуна, цала дух-цIусса яннагу ттун ларсун. Хъиривмур кьини на, нинугу кьадиртун, лавгра шаппай.
Жула къатлул дарвазалул хьхьичI ца ккулий щарссанил, ттун мунил цIагу дакIний дакъар (уттигу ттуйнма нава бучIан бувара), ттуяту атилсса жуларду лирккун, циятурасса кьаркьсса жуларду ттуйн ларххуна. Ттух луглай бивкIун бия дяъвилул чIумал гъан-маччами. На ца-кIива гьантлува даврийн бувкра. Ттуч1ан увкIуна ца жагьил. Ганал, ттучIан гьан хьуну, увкуна: «На га Арсенна, тетя Розай, администрациялия га кьини вищал гъалгъа бувсса». Жу хъямала багьру. На хъинну ххари хьура га жагьилсса, дахьва оьрму бутлан айивхьусса оьрчI га дяъвилуща ххассал шаврий. Ттун 70 шин шавай дур. На ттулва оьрму хъинну ххуйну бутав. Ттун ттуйва язугъ хъанай бакъар, язугъ хъанай бур жагьилсса литIлатIисса оьрчIай ва вания тинмайгу нигьачIаврий, вас-ццахлий яхъанахъисса халкьуннал оьрмурдай.
Ттун бувчIусса куццуй, ва дяъви ссанкIуй бакъасса дяъви хьунни. Паракьатну мичухъулгу, жугу яхъанай бивкIру.
Мичухъаву дяъви бусса чIумал на, ттула лас къашавай уна, ттучIанма яхъанан ца хъамитайпагу, 5 оьрчIгу бувцуссия. На цIухлай бура хIукуматрахь ва цинявппа бакI дургьуминнахь, миннан баян буллай бунува дазуй боевиктал бур тIий, ва бала циван хьун бивтссар? Циванни ми гиккува ппив къабувсса, на ливчIун бура ца ттулла хъуннар хьусса ниттищал. Ттул я оьрчI, я душ бакъар (так оьрчIшиврий ивхьусса ца ссил оьрчI ур). Чуври на яхъанантIисса. Уссил-ссил оьрчIачIа 1-2 барз банссар. Минналгу цалами буруккинтту чIявусса бур. На кунма ливчIссагу чансса бакъар.
С. МахIаммадова,
№ 40 «Илчи», 1999 ш.