25 шинал хьхьичI, 1999 шинал, хар-хавар бакъа ЦIуссалакрал райондалийн дунияллул террористътурал кьюкьри ххярхсса тарихрал иширан хасну кказитрай рирщусса язиязими макьалартту.

Гьашину августрай-сентябрь­даний Дагъусттаннайн ххявхми, «марцIсса» исламраягу гъалгъа тIий, жула республикалий власть цалла канихьхьун ласаврилсса буллай бия. Мунил мяънагу Дагъусттан лагьшиврийн кIункIу бавур ва му Аьрасатнал Федерациялия личIи бавур.
ЧIалачIисса куццуй, вагьабишиву республикалий гужну ппив шаврил савав хъанай дур инсантал зунсса кIанттурду бакъа ливчIун бушиву. Му масъалалулсса къабувссаксса, республикалий экономикалул тагьар цалийн дуцин къахьунссар. Даву дакъасса хаснува чIявусса бур жагьилми – 90%. Промышленностьрал ва шяраваллил хозяйствалул производство, транспортрал, строительствалул отраслирду, машлул ва агьалинал багьу-бизулулсса байсса отраслирду, хIасил щалла экономика хьхьичIуннай дурну, инсантал давурттахун къабивчуну чара бакъассар. Му бангу хьунтIиссар. КIулсса зат бур, Ухссавнил Ккавкказнаву бушиву хъинну аьркинсса ханхъуслил мяъданну – вольфрамрал, молибдендалул, чIутIул ва тутиялул, кадмийрал ва дувссилул, ванадийрал ва сералул. Ми буккайсса ва миннул продукция итадакьайсса комбинатру тIурча, промышленностьрал цайми предприятияртту кунма, хIакьину экономикалувусса гъургъаза сававрай зукъазий бавцIуну бур. Билаятрайн му ханхъус дазул кьатIату хъинну ххирану машан ласлай бур.
Ухссавнил Ккавкказнал республикалул вивсса ва кьатIувсса экономикалул каширду ишла дарча, даву ххуйну сакин дан хьунтIиссия, регионнал дянивсса дахIавуртту цалийн дурцуну. КьюлтIсса зат бакъар, хIакьину щаллуну ишла дуллай бакъашиву жула региондалийсса гидроэнергетикалул чIярусса луртанну, рекрециярдал каширдая гъалгъа тIийвагу акъара. Курортру бувагу зий бакъар учин бучIир, геотермал луртанну ва энергетикалул ляличIисса мяъданну ишла буллай бакъар.
ТIабиаьтрал дуллусса му хъус залуннал кунна ишла дансса бюхъу Ухссавнил Ккавкказнал бакъашиву сававрай, шиккун цIархъанну я бурган буллай бур Аьрасатнал геополитикалул конкурентътал. ЧIявусса миллатру бусса Дагъусттан тIурча ,бучIи лявкъуну бур щала региондалий социал-экономикалул тагьар зия даврил дайдихьу даврин. Му хIалу диривуна террористурахьхьун.
СССР ппив хьуну махъ, жула республикалул халкьуннал хозяйствалул статус чIаланну баххана хьунни. Дагъусттаннайх най бия Аьрасатнал, Дянивмур Азиянал ва Заккавкказнал дянив ва мукунма гъанмур баргъ буккавал билаятирттащал маша бачин буллалисса ххуллурду. Жула республикалийх най бур газ ва навт Азирбижаннава ва Туркмениянава Европанавун. Му бакъассагу, Каспийлийри бусса Аьрасатнаву ца бакъа бакъасса инфраструктуралул объект – МахIачкъалаливсса микIкъалачIайсса хьхьирил порт, дунияллул халкьуннал дянивсса портну ккаккан бувсса. Мунихлуну хъанахъиссар Каспийлуву тIабиаьтрал хьун дурсса хъунисса луртанну ишла дуллан.
Вай къулайшивуртту сававрай хъинну личIлулну буруглай бур Дагъусттаннах жунна хас дакъасса идеологиялул гужру – личIи-личIисса билаятирттал экстремистал.
Мунихлуну, ва нигьачIаву гужлан къахьуншиврул, федерал хIукуматран чара бакъа кутIасса чIумуву Дагъусттанналгу, щала Ухссавнил Ккавкказналгу агьалинал багьу-бизулул даража лавай бансса чаранну ккаккан аьркинни.
Ва дяъвилул хъинну хъунмасса зарал биян бунни жула республикалул экономикалун. Му зарал хIакьину млрд. къурушрая ливчусса хIисав хъанай бур. Зия бувну бур чIявусса ххуллурду, 30 миллиондалунсса зарал бивну бур Дагъусттаннал энергосистемалун.
Дагъусттаннайсса тагьар цалийн дуцаврин харж дан Аьрасатнал ХIукуматрал резерврал фондрава 100 млн къуруш арцул итадаркьунни. Федерал бюджетрава дучIантIий дур 12 млн къуруш лихъачувтуран дуки-хIачIия ва шану-кIараллу ласаврин харж дан. Му бакъассагу, Аьрасатнал Минфиндалун тапшур бувссар Дагъусттаннал хIукуматран 300 млн къуруш бюджетрал ссудалул дулун, республикалул экономикалул ва багьу-бизулул масъаларттан харж дан.
Амма ми арцу диял къахьун бюхъай лирмур дазин. Зарал бивсса региондалул экономика цалийн дуцинсса механизм лякъин аьркинни. Дяъвилул лиян дурсса Дагъусттаннал экономика ччаннай дацIан даврил цIаний залуннал инвестициярдах производствалул инфраструктуралул предприятиярду сакин бувну, миннул ласласисса дучIиялия чIумуйсса налогру къаласлан бучIия.
Аьрасатнал ХIукуматрал амрулийну, Аьрасатнал МЧС-ран тапшур дурссар какъащайсса луртаннава укра дулун Дагъусттаннай терактирдал лиян дурмур дакьин даврин харж данмур. Республикалул ХIукуматрал тIурча, хIукму бувссар Аьрасатнал ХIукуматрал резерврал фондрава 3,92 миллион къуруш итадакьин МЧС-райн багьайсса ишру, бала-апатIру хьун къабитаврин ва хьуминнул лирмур дакьин даврин харж дан, МЧС-рал какъащайсса луртаннава дуллумунил лахъаву дан. Федерал бюджетрава ялагу 6,8 млн къуруш харж дантIий дур медициналул препаратру ва оборудование ласаврин.
Дяъвилул зарал бивминнан Дагъусттаннал ХIукуматрал дулун ккаккан дурну дур федерал бюджетрава дучIантIисса арцу, яла гай цачIара дацIан дан увкуну. Утти, дяъви хьуну махъ, чIявусса инсантал зунттава кьанив бизантIиссар. Миннангу харж дан багьанссар 150 миллион къурушрая чан дакъасса арцу. Мадарасса арцу аьркин хьунссар терактру хьун къадитансса, уттиния тиннай къачагъшивуртту дайщун даврийн тIайла дурсса давурттах.
Аьрасатнайн хъар къавхьуну яхьун бюхъавриягу, укун жущава цаппараннал тIисса куццуй, аваданну яхъанан, чавахъ, навт, чахир ва коньяк дахлай. Ххал банну республикалул экономика Москавлийн цуксса хъарну дурив. Дагъусттаннал бюджет хъанай бур сайки 4 млрд къуруш. Миннувасса 3 млрд дучIайссар Аьрасатнал бюджетрава. 1680 млн. пенсиярттан ва 4811 млн оьрчIан пособиярттан бучIайссар. Республикалийн гьарца шинал Аьрасатнал регионная бучIай сайки 2 млн тонна къалмул, жучIара тIурча ,датIайссар так 250 азарда тонна. Аьрасатнансса гуманитар кумаг хIисаврай Дагъусттаннайн дуркIссар США-нава 15 азарда тонна къалмул, ЕС-рал билаятирттая- 20 азарда тонна.
1998 шинал республикалийн дуркIссар 53 азарда тонна качарданул, 16,6 азарда тонна дикIул. Дагъусттаннай шинай дуккан дайссар сайки 360-370 азарда тонна навтлил. Жунна тIурча, аьркинссар 2 млн тонна. Геологиялул хъиривлаявурттал чIалачIи буллай бур, Каспий хьхьириву навтлил луртанну сайки 275 млн. тоннарду душиву. Аьрасатнава Дагъусттаннайн шинай 1,5 млрд кубаметра газрал тIайла дуккайссар, республикалий тIурча, дуккан дайссар 700 азарда кубаметра. 1998 шинал промышленностьрал хъус дарххуну дучIан дурсса 5 млрд.къурушрая 4,7 млрд Аьрасатная дуркIсса хъус дарххунур дучIан дурсса. Ва статистикалул буслай бур Дагъусттаннал экономика Аьрасатная личIи хьуну якъахьунтIишиву. Гьарца иширавугу жува хIакьинугу, гьунттигу Аьрасатнаву бикIан аьркинссару.
М. ХIасанов,
экономикалул элмурдал доктор, профессор «Илчи» № 41, 1999 ш.