Фестивальданул мукьрагу кьини ци шадлугъру ди­кIантIиссарив, ца гьуртту хьун­тIиссарив, цIанасса чIумал ци хIадуршинна дуллай буссарив бусан бувкIун бия Дагъусттан Республикалул туризмалул ва халкьуннал художествалул пишардал министрнал хъиривмур Анна Безрукова, «Хранители традиций» фестивальданул программалул директор, Москавуллал «Синергия» университетрал проректор Сааду Казиев, фестивальданул хъунама режиссер, М. Горькийл цIанийсса Оьруснал театрданул директор Тимур МахIаммадов.

«Хранители традиций» фестивальданул сакиншинначину бур Дагъусттан Республикалул Туризмалул ва халкьуннал художествалул пишардал министерство. ЧIарав бацIаву дуллай бур Аьрасатнал Федерациялул Экономразвитиялул министерствалул, Аьрасатнал халкьуннал художествалул пишардал ассоциациялул, «Синергия» Москавуллал университетрал ва цаймигу уртакьтурал.
«Хранители традиций» фестиваль кIилчинни дуллалисса. Цалчинмур фестиваль дукIу МахIачкъалалив «Россия – моя история» тIисса музейраву хьуссар. Амма гьашинумур дукIумурнияр, масштабрал чулуха дикIу, цайми-цайми кIанттурдал чулуха дикIу, личIиссара хьун най дур. Гьашинумур дуван пикри бувнугу бур Аьрасатнал ца яла хьхьичIавамур шагьруну хъанахъисса Дарбантлив.
Фестивальданул мукьрагу кьини хьунтIиссар чIярусса шадлугъру. Шикку чара бакъа лякъинтIиссар гьарцаннан цанна хIаз дизанмур, асар биян буванмур. Деловой программа, арт-кварталлу, тарихчитал ва этнографтал гьурттусса культуралул ва кIулшивуртту дулаврил лекторияртту, личIи-личIисса миллатирттал усттартал гьурттусса халкьуннал каруннил дурмунил выставкарду, ярмаркарду, мастер-классру, цайнува цивппа хьусса ва пишакар­сса артистътурал, эстрадалул цIанихсса артистътурал сакин дурсса культуралул программалул ярг-яргсса номерду, личIи-личIисса шоурду, нахIу дукрарду ва кIицI къаларгсса чIярусса цаймигу затру гьуртту хьуманан хъунмасса хIаллай дакIний личIансса хьунтIишиврий дакI дацIлай дур. ЛичIи-личIисса конкурсирдавух дур чяйханщиктурал конкурс, хъамабитала хъанан бивкIсса халкьуннал тIуркIурду.
Мукьрагу кьини зунтIий дур яла хъуннамур мультимедийный фонтандалун ккаллисса Дарбантуллал фонтан.
Фестивальданий, Дагъусттаннал шагьрурдаями ва шяраваллавами усттартал къахIисавну, гьуртту хьунтIиссар Аьрасатнал 20 региондалиясса ва Узбакисттаннавасса, Къиргъизнавасса, Белоруссиянавасса халкьуннал усттартал.
Сакиншинначитурал агьаммур мурад бур халкьуннал усттартурал пагьму-гьунар, гьарцаннал ляличIишиву ккаккан даву, вайннал каруннил дуллалимур машгьур даву.
Фестивальданул лагрулий, цайми эмаратирттавух, ккаккан дувантIиссар усттартурал карунних дурсса, хъинну нажагь дакъа дуккан къадувайсса, сайки щинчIав къаккарксса, багьлулгу ххишала дакъа ххирасса, ляличIисса давуртту.
Тамашачитуравух бикIан­тIиссар хасну ва фестиваль дуллалисса гьантрайн цалла отпуск тIайла дацIанну жулла республикалийн бучIан пикри бувсса туристъталгу.
Фестивальданул мукьрагу кьини Дарбант багьантIиссар «Великий Шелковый путьрал» заманалувун.
Фестивальданул сакиншинначитал ванийн хIадур хъанай бур «Аьдатругу дуручлай, ялун бучIантIимургу сакин буллай» тIисса мукъурттилу.
Бадрижамал Аьлиева