Сентябрьданул 4-нний «Дагестан» РИА-лул площадкалий хьунни Аьрасатнал ДОСААФ-рал ва ванил Дагъусттаннал региондалул отделениялул иширттан хасъсса пресс-конференция.

Мероприятиялул хъамаличуну ия ва идаралул Дагъусттаннал региондалул отделениялул каялувчи Шамил Аьлиев.
Аьрасатнал ДОСААФ сакин бувну бур 1927-ку шинал январьданул 23-нний. Таний ванил цIа диркIссар «Общество содействия обороне, авиационному и химическому строительству» (ОСОАВИАХИМ). Сакин хьуния махъ ванил хъанай дур сайки 100 шин.
– ХIакьину Дагъусттаннал ДОСААФ чялишну зий бур личIи-личIисса ххуллурдай: дуллай бур аьралий-патриотшиврул мероприятияртту, инсантал хIадур буллай бур аьралуннаву къуллугъ буллан,хIадур буллай бур личIи-личIисса машинарттал шофертал, хIадур буллай бур обороналул предприятиярттансса ва аьралуннаву къуллугъ буллансса пишакартал, – куна Шамил Аьлиевлул.
Ванал мукунма бувсуна цIанасса ппурттуву ва идаралий патриотшиврий тарбия буллай бушиву аьралуннавун буцинсса жагьилтал. ДОСААФ-рал тарихрал дахIаву дур паччахIлугъ дуруччаврищал.
ХIакьину ДОСААФ-рал региондалул отделениялуву бур 42 горрайсовет, дуккаврил 7 идара ва спортрал ва техникалул 3 клуб. Идаралий дуклай ур 780 жагьил.
Пресс-конференциялий Шамил Аьлиевлул «Первый трижды Герой Советского Союза А. И. Покрышкин» тIисса Аьрасатнал ДОСААФ-рал Центральный комитетрал медаль дуллуна «Дагестанская правда» кказитрал журналист Арсен Моллаевлун билаятрал мюхчаншиву цIакь даврихлу ва патриотшиврий тарбия шаврихлу.
ХIасан Аьдилов