Дагъуcттаннай бантIий бур Пассажиртурансса транспортрал парк. Муния бувсунни пресс-конференциялий ДР-лул транспортрал ва ххуллурдал хозяйствалул министрнал хъиривчу Мурад Атаевлул.

Ванал тIимунийну, хIакьинусса кьини региондалий зий дур 615 муданнасса маршрут, миннува 92 регионнал дянивсса.
Шикку зий бур 3200 мюрщисса, дянивсса ва хъунисса классрал автобусру.
– Пассажиртал ххилай бур 19 транспортрал компаниялул (перевозчиктурал). БувчIлачIисса зат бур, республикалул шагьрурдайсса маршрутирттай машинартту биял хъанай бакъашиву, – куна Атаевлул. Ванал бувсуна Пассажиртурал транспортрал парк бух бувккун бушиву.
Министрнал хъиривчунал тIимунийну, дукIу лавсун бивкIун бур 47 цIусса автобус. Вай циняв хIакьину бур МахIачкъалаллал маршрутирттай.
Мурад Атаевлул тIимунийну, «МахIачкъала – Каспийск» маршрутрайгу пассажиртурансса транспорт ххишалану занази дувансса ният дур сентябрьдания тихуннай, цанчирча ва чIумал гьарза хъанай бур студентътал ва цаймигу пассажиртал.
Журналистътурал гьаз бувна транспортрал хIаллихшиннал качествалул масъалартту. Вайннал тIимунийну, маршруткардал вивалу чIявучин чапалну бикIай, пассажиртуращал ттярзлий гъалгъа тIун бикIай.
Ва масъалалухьхьун жаваб дуллай, Атаев авкьуна журналистътурал тIимуницIун. Ванал мукунма бувсуна министерствалул зузалт рейсирдай буккайсса маршруткардал тагьарданул ялув бацIайсса бушиву, ттиния тихуннай ва даву ялунгу гужлан дуллан тIий бушиву.
ХIасан Аьдилов