Сентябрь зурул 4-нния байбивхьуну 6-ннийн бияннин МахIачкъалалив, А.-П.Салаватовлул цIанийсса Къумукьнал театрдануву наниссар «RT.Док: Время наших героев» тIисса документал кинорал Дунияллул халкьуннал дянивсса 11-мур фестиваль. Ванин хас бувсса пресс-конференция хьуна тталаткьини, сентябрьданул 3-нний, «Дагестан» РИА-лий. Журналистътуращал хьунабакьин бувкIун бия аьралий корреспондент, документалист, жяматийсса ишккакку, Аьрасатнал ПрезидентначIасса советрал член Руслан Гусаров ва RT документал вещаниялул дирекциялул каялувчи, режиссер-документалист, «RT.Время наших героев» фестивальданул генеральный продюсер Екатерина Яковлева.
Пресс-конференциялул мурад бия фестивальдания, ванил программалия ва географиялия, ларсъсса суратирттая ва автортурая бусаву. Фестиваль дуллалиссар Дагъусттаннал ХIукуматрал кабакьулийну 1999-ку шинал Дагъусттаннал аьрщарайн ххявхсса боевиктал ххит бувну 25 шин шаву кIицI лаглагисса мероприятиярттал лагрулий. Ванил программалуву дур хасъсса аьралий операциялул ва 1999-ку шиналсса дяъвилул иширттал вирттавраясса 14 фильм: «Будем жить», «Непокоренные: Дагестан-99», «Общими молитвами», «Стать «Барсом»: путь добровольца» ва цаймигу, ккуркки стол «Победа мужества: 25-летие разгрома международных бандформирований» тIисса, автортуращалсса, режиссертуращалсса ва цаппара вирттавращалсса хьунабакьавуртту. Мукунна хьунтIиссар пранкертал Вованнущалсса ва Лексуслущалсса хьунабакьаву.
– Дагъусттан лайкьссар гьарицагу виричуная фильм ласун. Гьарицанналгу оьрмулуву буссар цайминнавун гьавас бутансса ляличIисса ишру. ЦIана жунма аьркинну бур, ччарча фильм ларсун, ччарча хаварданийну, ччарча сурат дирхьуну, хъанахъимур тарихраву ябансса хIарачат бан. Фестивальданул дакъассар конкурсрал программа, къабуллантIиссар кIанттурду, гьарица фильм лайкьссар цалчинмур кIанттун. Автортал ласлай бивкIссар кино оьрмулун нигьачIисса шартIирдай, дяъви нанисса кIанттурдай, – увкуна Екатерина Яковлевал.
Руслан Гусаровлул ва Екатерина Яковлевал кIицI лавгуна Аьрасатнал халкьуннал цашиву ва патриотизм цIакь дан фестивальданул бияла хъунмасса бушиву.
Андриана Аьбдуллаева
