Сентябрьданул 3-нний Дагъусттаннал ХIукуматрал председатель Аьбдулмуслим Аьбдулмуслимовлул тIутIив дирхьунни къуллугърал бурж бартбигьлай жанну кьурван дурсса МВД-лул зузалтрал гьайкалдануцI. Мероприятие дурну дия Терроризмалущалсса талатаврил кьинилийн.
ТIутIив дишаврий гьуртту хьуна ДР-лул БакIчинал ва ХIукуматрал Администрациялул каялувчи МахIач Оьмаров, МахIачкъалаллал бакIчи Юсуп Умавов, ДР-лул виваллил иширттал министрнал хъиривчу АхIмад Баталиев, Дагъусттаннал прокурор Виктор Эпп, ДР-лул Мюхчаншиврул советрал секретарь МахIаммад Баачилов, ихтиярду дуруччаврил органнал каялувчитал.
Щалагу Аьрасатнал Аьралий-патриотшиврул «Юнармия» ккурандалул мемориалданучIа бацIан бувна хIурматрал къарал. ЛивтIуминнал хIурматран ца минутIрайсса пахъ багьуна.
ДакIнин бутанну, гьар шинах сентябрьданул 3-нний Аьрасатнаву дувайссар Терроризмалущал талатавривусса цашиврул кьини. Ва кьини 2004 шинал сентябрьданий, Ухссавнил АьсатIиннал Бесланнай оьхIалсса теракт дурну, 300-нниха ливчусса оьрчI-бакI ва хъами ливтIуну бивкIссар.
Ва кьини Аьрасатнал агьалинал азардахъул террактирдаву ливтIусса ватанлувтурал аьпа абад баврил мероприятияртту дайссар.
ХIадур бувссар
ХI. Аьдиловлул
