Табасараннал райондалий Хучни шяраву, Арула уссил ва ца ссил къалалучIа, хьунни Кулпатрал шинал лагрулий «Дагъусттаннал кулпат» цIанилусса байран. Шадлугъирттан хасну зий дия Республикалул Кьиблалул районнал хIаятру.

Рутуллал райондалул хIаят­­раву бия Дюкъуллал чIа­ххуврайсса Лув ЧIатIлухъиял шяраватусса, ттунмагу хъинну кIулсса музыкантъталгу. Хъунмасса хIаз ласлай бия инсантал чIаххуврайсса 3- 4 хIаятрал зюннаврдал ва дачIурдал чIурдах вичIи дирхьуну, цаппарасса къавтIунгума бизлай бия.
Ссят 11 хьусса чIумал байрандалийн увкIуна ДР-лул ХIукуматрал председатель Аьбдулмуслим Аьбдулмуслимов. Ванал ххал дуруна районнал хIаятру ва къалалий дузал бувсса жагьилтурал арт-площадкартту.
Ца павильондалий Дагъус­ттаннал Жагьилтурал иширттал министерствалул вакилтурал ккаккан буллай бия проект «Дроннал школа». Шикку хIадур буллай бур БПЛА-лул (беспилотные летательные аппараты) оператортал Национал инновациярттал колледжрал гьанулий. Проект бартдигьлай бур контрактрайну аьралуннал къуллугърайн гьан ччиминан рязишиврул чагъарданий къулбас дуллалиминнан, мукунма СВО-лул гьурттучитуран. Ва колледж бувккуминнан булай­ссар паччахIлугърал куццуйсса документ.
Аьбдулмуслимовлул лавай­сса кьимат бивщуна «Дроннал школа» проектран.
– Президент Владимир Путиннул тIимунийну, чIявусса оьрчI-бакI бусса кулпатру – Аьрасатнал гьанур, жула азарда шинал тарихри билаят хIисаврай, нация хIисаврай, цасса миллат хIисаврай.
Ва кьини дакIнин бутан ччай бур, кулпатрал хъунмур мяъна-мурад – оьрчIру баву душиву, тухум хъун баву душиву, жула чIявусса ттуршукурдал лахъишиврийсса тарих гихунмайгу бачин буллалаву душиву.
«Дагъусттаннал кулпат» байрандалунсса кIану язи бугьаву хатIалийсса дакъар.Табасараннал район хъанахъиссар республикалий ца яла хъунмурну. Шикку ялапар хъанай бур 50 азаруннаха ливчусса инсантал. Ва район цурдагу ккаллиссар ца яла чIявусса оьрчI-бакI бусса райондалун, – куна Аьбдулмуслимовлул.
Яла ванал чIявусса оьрчIру бусса 13 кулпатран буллуна Дагъусттаннал ХIукуматрал чулухасса Барчаллагьрал ча­гъарду.
Табасараннал райондалул бакIчи МахIаммад Кьурбановлул премьер-министрнахь бувсуна Бартбисурттал музей цIу буккан буван най бушиву.
«Дагъусттаннал кулпат» байрандалун хасну ккаккан дурна республикалул цIа дурксса балайчитурал ва ансамбльлал концерт.
ХI. Аьдилов