ДР-лул Халкьуннал Мажлисрал председатель Заур Аскандаровлул цIусса дуккаврил шинал ссайгъатру буллунни Азирбижаннал дуклаки оьрчIан. ДР-лул парламентрал спикернал бувсунни Аьрасатнаву КIулшивурттал кьинилул хьхьичIми гьантрай шайсса бушиву «ОьрчI школалийн хIадур увара» тIисса акция, ваний чялишну гьуртту шайсса бушиву депутатътал, властьрал вакилтал, меценатътал.
Заур Аскандаровлул бавтIминнахь барча дурна ялун нанисса цIусса дуккаврил шин. Азирбижаннай дуккаврил шин дайдишайссар сентябрьданул 15-нний.
– ХIакьину жунма уссушиврийсса Азирбижаннай бунува личIинува тIааьнну бур оьрчIан пишкаш дуван школалунсса аьркинлугъ. Барчаллагьрал махъру чин ччай бур учительтурахь, вайннал захIмат лайкьссар лавайсса хIурматран. Жува вайннан даим барчаллагьрай бикIан аьркинссару, цанчирча вайннал лахьхьин буллай тIий кIулшивуртту ласун, жуява аькьлу-кIулши дусса инсантал хьун, – куна Заур Аскандаровлул.
Парламентрал спикернал каши кIюласса кулпатирттавасса оьрчIан дуллуна школалунсса аьркин-къарцин дусса рюкзакру ва кIукIлусса ссихьри.
Мероприятие хьуна Бакуй Оьруснал къатрал площадкалий Дагъусттаннал делегация Азирбижаннал Республикалийн бучIаврил лагрулий.
ХIадур бувссар
ХI. Аьдиловлул
