Сентябрьданул 3-нний Дагъусттаннал бакIчи Сергей Меликовлул дунни актуальсса масъаларттал хIакъиравусса батIаву. Ххал бигьлай бия властьрал органнал инсантурал лабизавурттах къулагъас даврил масъала, мукунма паччахIлугърал ва муниципал унитар предприятиярттал реформа даврицIун бавхIусса масъалартту. Сергей Меликовлул бувсунни Дагъусттаннал властьрал органнаву кадрардан хасну хьусса дахханашивурттая.

Августрай ДР-лул бакIчинал ва ХIукуматрал Администрациялул каялувчинал къуллугърай цIакь увну ур МахIач Оьмаров, цIуллушиву дуруччаврил министрнал къуллугърая хушрай лавгун бур Татьяна Беляева. Сергей Меликовлул хъинчулийсса кьимат бивщуна вайннал дурсса давурттан.
БатIаврий республикалул бакIчинал бувсуна дуккав­рил идарарттал хьхьичIу­ннайши­вурттая – билаятрай цIусса школарду тIитIаврил чулуха республикалул цалчинмур кIану бугьлай бур. Сергей Меликовлул барчаллагь куна дуккаврил ва строительствалул министртурахь ва муниципалитетирттал бакIчитурахь.
– Дуккаврил шин дайдишаву барча дуван ччай бур дуккаврил ва элмулул министрнахь. Агьамсса иш хьунни вай гьантрай – Дагъусттаннай тIивтIунни 21 дуккаврил объект. 2021-ку шинай шийнмай, ЯхIия ХIамидович министрну ивтния махъ, Дагъусттаннай бувну бур 143 дуккаврил объект, 363 школа ва 61 оьрчIал багъ бакьин бувну бур. ЦIусса школардай бур спортрал ва актовый заллу, футболданул ва волейболданул майданну. Вара куццуй ванияр тихуннайгу дуллан аьркинни вайра давуртту. Барчаллагь тIий ура вице-премьер Муслим Телякавовлухь, стротельствалул министр Бахтияр Уллаевлухь ва муниципалитетирттал бакIчитурахь, – куна бакIчинал.
Сергей Меликовлул бувсуна республикалий ттигу аьркинну бушиву буван 200-нниха ливчусса школарду.
ДР-лул бакIчинал ва ХIуку­матрал Администрациялул кая­лувчи МахIач Оьмаров­лул тIимунийну, гьашину августрай Дагъусттаннал ЦУР-данул сияхIрайн ларсун диркI­ссар 8 азарунниха лирчусса лабизавуртту. Вай хъанай дур хьхьичIмур зуруйнияр 31 процентрал чансса. Вай чаншиву дархIуну дур МахIачкъалалив чани лещан баврицIунсса аьрзарду чан шаврицIун ва цIинцIал бакIурду цила чIумал букьлай бушивруцIун.
Исполнитель властьрал органнайн тIайла дурккун дур 2263 лабизаву, муниципал сакиншиннардайн – 4311, личIи-личIисса ресурсосбережениялул идарарттайн – 1758.
БатIаврий ххал бивгьуна па­ччахIлугърал ва муниципалитетирттал унитар предприятиярттал реформа даврил масъала. Муния ихтилат бувна кураторшиву дуллалисса вице-премьер Заур Эминовлул.
Муниципалитетирттай закупкардал хIакъиравусса контрактру чичаврил хIакъираву махъ лавхъуна ДР-лул ПаччахIлугърал закупкардал комитетрал председатель Азер Нафталиевлул. Ванал тIимунийну, муниципал заказчиктурал гьашину паччахIлугърал хъус ласаврил иширттаву бюджетрал арцул 67 млн чанну харж бувну бур.
БатIаврил хIасиллу дурну махъ циняв актуальсса масъаларттал хIакъираву тапшурлугъру дурна. Вайннул ялув бацIаву дуллан ккаккан бувну бур исполнитель властьрал органнал каялувчитурайн ва Дагъусттаннал бакIчинайн.

ХIадур бувссар ХI.Аьдиловлул