ЦIусса дуккаврил шин дайдихьулул кьини Каспийскалий 1224 дуклаки оьрчIансса цIусса гимназия тIивтIунни. 16-мур гимназия цуппагу Аьрасатнал Виричу МахIаммадаьли МахIаммаджановлул цIанийссар.
Гимназия тIитIаврил шадлугърай гьуртту хьуна Дагъусттаннал ХIукуматрал хъунама Аьбдулмуслим Аьбдулмуслимов, Минстройрал хъунама Бахтияр Уллаев, Халкьуннал Мажлисрал Элмулул ва кIулшивурттал комитетрай каялувшиву дуллалисса Елена Павлюченко, Каспийскаллал администрациялул хъунаманал цалчинма хъиривчу Арсен Шарипов, школалун цIа дирзсса Виричунал щащар Муслимат МахIаммаджанова ва цаймигу бусравсса хъамал.
Премьер-министрнал бавтIцири барча буллалисса ихтилатраву кIицI лавгуна, республикалий ва кьини тIитIлай бушиву кIулшивуртту дулаврил 21 учреждение. – Агарда цаппара шиннардил хьхьичI республикалий 5-7 школа шинай тIитIайсса бивкIхьурча, махъсса 2 шинал мутталий 40-нниха ливчусса тIивтIуссар. Уттигу республикалий 17 школа буллай буссар. 2025 шиналгу 7 цIусса школа ва оьрчIансса 1 багъ тIитIинсса ният дуссар. Национал проектру бартдигьлай бушиврийн бувну, жущава гьармунил дузалсса ххуйсса школарду тIитIин бюхълай бур, – увкуна Аьбдулмуслим Аьбдулмуслимовлул.
Елена Павлюченкол, Халкьуннал Мажлисрал хъунама Заур Аскандаровлул цIанияту учительтал, дуклаки оьрчIру ва нину-ппу барча буллай, кIицI лавгуна учительтуралгу хIарачат бикIан аьркиншиву ххуйсса школардай оьрчIан куртIсса кIулшивуртту дуллан. Муслимат МахIаммаджановал барчаллагь увкуна, ласнал аьпалул хIурмат бушиврухлу республикалул хъуниминнахь ва школалун ласнал цIа дизан чялиш бувкминнахь.
ХIукуматрал вакилтал школалийх бувккун мукьах, Аьбдулмуслим Аьбдулмуслимовлул, 1999 шинал республикалийн бандитътурацIа марцI дуллай жанну дуллусса вирттавран хас дурсса Чувшиврул дарс дирхьуна, бувсуна цIанасса ппурттуву СВО-лий чувшиврий аьралий буржру бартбигьлагьисса къучагътураягу.
Мукьра зивулийсса цIусса школалий бур 63 класс, 420 инсаннансса аьшвашхана, библиотека, 2 бассейн, гимнастикалунсса, футболданунсса ва бяст-ччаллил тIуркIурдансса спортзаллу, дур гъинтнил чIумал оьрчIру цIуллушиврулсса буллансса, бигьалаглансса спортрал площадка, зий дур 4 лифт. Гимназиялул директор Светлана ХIасанбагьовал бувсмунийн бувну, оьрчIру 1-мур сменалий занантIий бур дарсирдайн, 2-мур сменалий-личIи-личIисса кружокирттайн. Школалийн кьамул увну ур 1224 дуклаки оьрчI.
ПатIимат Рамазанова
