![](https://ilchi.info/wp-content/uploads/sites/11/sites/11/2024/08/905a5775-c843-4842-84fd-8fb0cbb233a5.jpg)
Вай гьантрай МахIачкъалалив Дагъусттаннал цалчинма президент МухIу Аьлиевлул завалунсса, 50-ннийн бивсса цIанихсса шахматистътал гьуртту хъусса, республикалул лагрулийсса Шахматирттал турнирданул х1асиллу дунни. Ва турнир мяйлчинни дуллалисса.
ДР-лул спортрал ва физкультуралул министерствалул, Республикалул Шахматирттал федерациялул ва МахIачкъала шагьрулул администрациялул А. Карповлул цIанийсса Шахматирттал школалул чIарав бацIаврийну сакин дурсса Шахматирттал турнир най дуссия июль зурул 30-нния август зурул 8-ннийн бияннин. Чемпионатрал бяст-ччаллу хьуссар швейцариянал кьяйдалий. Шахматирттай бувкссар 6 шинава 86 шинавун бияннинсса оьрмулул инсантал.
Гьурттучитал барча бан ва вайннан заварду дулун бувкIун бия МухIу Аьлиев, ДР-лул спортрал ва физкультуралул министрнал хъиривчу ХIайдарбаг ХIайдарбагов, Республикалул Шахматирттал федерациялул президент Жакай Жакаев ва цаймигу.
Бяст-ччалданий душваврал дянив 1-мур кIану бувгьуна 14-ра шинавусса лаккудуш СултIанат Жалаловал. Турнирданий гьуртту хьусса душварал дянив ва бия оьрмулул яла чIивимур. Пахру бансса иш бур укунсса даражалул чемпионатрай лаккудушнил хьхьичIунсса кIану бувгьаву.
ЧIава шахматист Тимурдул душ СултIанат Жалалова бур Гъази-Гъумучиял шяравасса. Шахматирттай буклай байбивхьуну бур 6 шинаву. Садикрая ниттил бувцуну нанисса душ бучIайсса бивкIун бур шахматирттай уклакисса хъунама уссил хъирив. Мукун чIивину бунува ххира хьуну бур ванин шахматру. СултIанатлул цалчинма тренер ур АьвдулхIамид Абилов. Ванал каялувшиннаралу СултIанатлул, СКФО-рай хьусса турнирдай гьуртту хьуну, цимилагу хьхьичIунсса кIанттурду бувгьуну бур.
Шахматирттал спортраву СултIанатлул тамансса хьхьичIуннайшивуртту лайкь дурну дур, цуппа хIадур буллалисса тренер Мансур Мусаевлул хIарачатрайн бувну. ЦIанасса ванил тренер, Шахматирттал федерациялул мастер Мансур Надирович КIулушацIрал шяравасса ур.
СултIанат 6 шинаву байбивхьуну бур шахматирттал турнирдай хьхьичIунсса кIанттурду бугьлай. Ванил 7 шинаву Аьрасатнаву хьусса, 200 инсан гьуртту хьусса чемпионатрай 24-мур кIану бувгьуну бур. Му бакъассагу, СултIанатлул хьхьичIунсса кIанттурду бувгьуну бур дунияллул ва билаятрал даражалийсса турнирдай, 2023 шинал — Батуми шагьрулий хьусса дунияллул даражалийсса чемпионатрай.
2019 шинал СултIанатлул 2-мур кIану бувгьуну бур Таллиннай хьусса турнирданий.
ХIакьинусса кьинигу чялиш бувккун зий бур шахматрай буккаву магьир давриха. Хияллай бур чIявусса баллу лайкь бувминнан дулайсса шахматирттал спортрал кандидатнал цIа ласун.
Спортраву бакъассагу, СултIанат бур дуккавривугу итххявхсса. ЦIана ва дуклай бур Республикалул итххявхсса оьрчIансса лицейраву, 8-мур классраву. ХIакин хьунсса пикрилий бур.
ЧIа учинну СултIанатлун ванияр гихунмайгу цила гьунар ккаккан буллансса тIайлабацIу.
Имара Саидова