![](https://ilchi.info/wp-content/uploads/sites/11/sites/11/2024/08/l89u5n50yu4nfe1zdfiabx36evqtfn28.jpg)
Вай гьантрай МахIачкъалаллал пляжрай хьунни Греблялул Дагъусттаннал цалчинсса чемпионат. Ва цурдагу хас дурну дия Физкультурникнал кьинилун. Арамтал, хъами, жагьилсса оьрчIру, душру, аьмну шикку гьуртту хьунни 50 инсан. Къаехъ дачин дуллай бия хьхьирил зумания арх бакъа, ца-кIира километралийх.
– ХIакьину агьамсса байран дур. Физкультурникнал кьинилун хасну, жу дуллай буру тарихраву къаехъ дачин даврил цалчинсса Чемпионат, мукунна хьхьирил зуманицIух къаехъ дачин даврил Республикалул первенствагу. Ва журалул спортрах хъунмасса гъира бур. ЦIанасса хIасиллах бурувгун, октябрь зуруй шиккура хьунтIисса Аьрасатнал чемпионатрай гьуртту хьунсса Дагъусттаннал цалчинсса команда сакин дансса пикри бур, – тIий ур ДФГС — рал президент МахIуммадамин ХIажиев.
Чемпионатрай цалчинсса кIану бувгьуна х1акин, Москавлия отпускалий МахIачкъалалив бувкIсса, къаехъ дачин даврил спортрахун бувагу багьну къабивкIсса Тутубава Башанаевал.
ХIакин хIисаврай, Тутубаван ччан бивкIуна ялун нанисса никирал оьрчIан-душвавран ккаккан бан, спортрахун багьну бакъахьурчагума, цIуллу-сагъсса оьрму бутлатисса, оьккимуния, чурххан заралмуния архсса инсаннаща, цахъи вардишгу хьуну, цIусса журалул спортравугума чемпион хьун бюхъайшиву.
КIицI лаган, Тутубава хIадур хъанай бивкIун бур ва Чемпионатрайн дахьва ца зуруй, цуппагу цила агьаммур даву дайдишиннин кIюрххицIунмай. ЧIун чIирисса диркIнугу, ванища бювхъунни чемпионнал цIа ласун. Умуд бур Аьрасатнал чемпионатрайгу ккаккан банссар Тутубавал цила бюхъу-гьунар тIисса. ТIайлабацIу баннав.
Андриана Аьбдуллаева