ЦIуссалакрал райондалул ТМО-рал хъунмур хIакин Людмила Султановал ттухь цилва кутIасса ихтилатраву дяъви байбивхьусса кьини цинма ккавкмуния бувсуна:
— КIюрххил ссят 7 хьун 15 минутI лирчIсса чIумал битаврил чIурду баллан бивкIуна. ОьрчIругу чIаххуврачIан бавкьуну, на даврийн лавгра. Ххуллийх хьунаавкьусса ласнауссищал на больницалул хирурггу уцав. Анаварну батIарду щалва экстренный кумаграл бригада, итабакьарду цинявппа занан бюхълахъими къашайшалт. Дяъвилий цалчинма щаву дирсса ХIаммадов Руслан МахIаммадлул арс увцуну бувкIунни хъинну захIматсса тагьарданий. 15 минутIравату му, жуща ххассал ан къабювхъуну, ивкIуна. Жу мунал нурчIи анаварну оьрчI­ру бай отделениялуву дишарду. ДачIи ссятрава больницалувун бувхсса боевиктал жухь къашайшалт чув бу­ссар тIий цIухлан бивкIуна. Ми ба­къар тIий бавцIукун, хъунама хIакин чув ур куну цIуххунни. На миннащал бувхра ттула кабинетравун.
Миннаватусса ца ттухь вев-гьарай тIий, цIухлан ивкIуна ккулла щуну, цIунцIия хьуми чув бур тIий.
— Ми жучIан къабивунни, — учав на.
Ттуйн вих къавхьуну, ми къашайшалтрах луглан бивкIуна. Миннан жу лариртсса кьаркьала ляркъукун, «Аллагьу акбар! Какой красавчикгу», — тIий, гайми палатардал нузру личин дуллан бивкIуна.
КIилчинмур зивулийн бу­чIайхту, миннал на кIилчингу ттула кабинетравун бувцунна.
Цивппа хъяврин бувнутIий, гайннаватусса ца ттуйн сситтуй, на ина бивчIанна тIун ивкIуна.
— Агана, — учав на, – на бив­кIуну зун бигьа хьунтIий бухьурчан, бивчIара. Миннал яла ттучIату даруртту тIалав бувна ва миннуяту бачIи цачIанма лавсун, бачIи гиккува больницалий цала къашайшалт хъин буллан кьабивтуна.
«Анаварсса кумаграл» машинагу бувцуну лавгун, 10 минутIравату зана хьуна цала къашайшалагу увцуну. Ттухь щаву дахIи тIун бивкIуна. «На щаву къадахIайссар», — учав на. Хирург-хIакин ХIусайннул дархIуна. Яла ца боевикнал, на кабинетравунгу бувцуну.
— «Агана шичча гьарчан, на ина аьрщараву бунугу лякъинна. На ина дакIний битав», — увкуна.
Муния махъ жун пикри хьуна ци чулийгу больницалияту гьан. Яла жу ЦIуссаккулув, Хасавюрт шагьрулия чара бакъа аьркинсса дарурттугу лавсун, тIитIарду щаву дирминнан цалчинсса кумаг баврил ФАП-рал пункт. ЦIанакул ТМО зун шай­сса куццуй ливчIун бакъар. Мунияту жу чIумуйнусса КБО-рал къатлуву поликлиника тIитIин най буру.

С. МахIаммадова
№39 «Илчи» ,1999 ш.