Августрал 26-нний Дагъусттаннал ХIукуматрал председатель Аьбдулмуслим Аьбдулмуслимовлул дунни Министртурал кабинетращалсса батIаву.
БакIрай премьер-министрнал бувсуна ялун нанисса нюжмардийсса давурттал пландалия ва ккаккан бувна агьамми масъалартту. Ванал хъунмур къулагъас дуруна КIулшивурттал кьинилийн хIадур шаврих ва дуккаврил цIусса объектру тIитIаврих.
Цаппара цаймигу социал мяъна дусса мероприятияртту бартдигьин ккаккан дурну дур ва нюжмардий. Табасараннал райондалий хьунтIий дур Кулпатран шинан хас дурсса шадлугърал мероприятие. Августрал 29-нний дайдихьлай дур Щалагу Аьрасатнал национал вещаниялул фестиваль «Голос Евразии – 2024». ХIадур хъанай бур Сулайман Стальскаллал райондалий тIитIин Промышленностьрал цIусса предприятие.
Ва нюжмардий хIадур буллан тIий бур кIинтнил зурдардийн ЖКХ-лул объектру хIадур баврил масъалартту, дебиторшиврул буржру чан баврил, цачIусса (консолидированный) бюджетравун доходру гьарзану дучIан даврил, кьатIаллищалсса машлул дахIавуртту лядуккан даврил, медициналул идарарттал цаппара категориялул зузалтран социал кумаг баврил ва цаймигу масъалартту.
Ва ялагу, Аьбдулмуслим Аьбдулмуслимовлул властьрал органнайн тапшур бувна регион бюхъайссаксса гьартану гьуртту хъанан федерал программарттавух.
Темалиясса хъунмур ихтилат бувна цалчинма вице-премьер Руслан Аьлиевлул. Ванал тIимунийну, цIанасса ппурттуву федерал даражалий хIадур буллай бур федерал бюджетрал проект, Дагъусттаннай цаппара давуртту бартдигьинсса харжлугъращал федерал идарартту рязи хьуну бур. Субъектрал властьрал органнаща бюхълай бур хIадур дуван цалами заявкартту.
Дагъусттаннал ХIукуматрал председательнал исполнитель властьрал каялувчитурайн тапшур бувна чялишну хIадур дуллан республикалул мероприятияртту бюхъавай чIярусса федерал программарттавун духхан даврил хIакъиравусса заявкартту, социал масъалартту дузал баву мурадрай.
Хъунмур даву къуртал дуван аьркинссар октябрьданул 1-нийнин.
КъюмайтIутIи батIаврил хIакъираву бувсуна Дагъусттаннал КъюмайтIутIул комитетрал каялувчи Шарип Каримхановлул.Ванал тIимунийну, къюмайтIутIи батIаврил давуртту щириркIуну най дур республикалул цаппара районнай. КъюмайтIутIи батIавриву хьхьичI ххуттай дур Дарбантуллал район. Гьар шинах ва райондалул батIайсса бур республикалий бавтIминнул 35 % тIутIул. Гьашину республикалий батIин най бур 282,8 азардаксса тоннарду къюмайтIутIул.
Ахирданий Аьбдулмуслим Аьбдулмуслимовлул бувсуна хьхьичIва цIуллу-сагъшиву дуруччаврил министрну зий бивкIсса Татьяна Беляеван награда дулунсса хIукму хьушиву.
ХIадур бувссар ХI.Аьдиловлул
