Дуккаврил шин дайдихьлахьисса гьантрай Ккуллал райондалийсса школардал хIадуршинна ххал дигьин увкIунни ДР-лул Халкьуннал Мажлисрал председательнал хъиривчу Камил Давдиев.
Ва ивунни цаппарасса щархъал школардайн. Тахакьа АхIмадовлул цIанийсса Хъусращиял школалун ванал пишкаш дурна спортрал кьай-кьуй.
Цува дуклай ивкIсса школалун бахшишру дуллай, ванал кIицI лавгуна оьрчIал ГТО дуллалийни спортрал кьай дучIи лякъинтIишиву ва къулагъас ххишала дуллан аьркиншиву оьрчIру спортрал чулухунмай кIункIу буван.
Камил Давдиев хьунаавкьуна учительтуращал, кIулшивуртту дулаврил даража гьаз баврил ва оьрчIан патриот зумунусса тарбия дулаврил хIакъиравусса маслихIатру бувна.
ДакIнин бивчуна 1999 шинал ссуттил ЦIуссалакрал ва Дагъусттаннал тарихраву кьурчIисса асарду кьабивтсса дяъвилул ишру.
МуницIун бавхIуну, маслихIат бувна Дагъусттаннал аьрщарайн ххявхсса дунияллул террористътал ххит бувну 25 шинал юбилейран хас дурсса мероприятияртту школардайгу кIицI лаган.
Имара Саидова
