МахIачкъалалив ГьунчIукьатIрал жяматрал, мачча-гъаннал, даврил уртакьтурал вив лавсун, хIурматрай барча бунни Бакуй мина дирхьусса, ГьунчIукьатIатусса шаэр ПатIимат Штанчаева Аьрасатнал Чичултрал союзравун кьамул баврищал.
Ванихьхьун удостоверение дуллай, Дагъусттаннал Чичултрал союзрал лакрал секциялул каялувчи Супиян Оьмаровлул кIицI лавгуна, тарихраву нажагьсса иш бушиву так ца лу итабавкьусса инсан союзравун кьамул увсса, цувагу цамур билаятраясса. Ва ПатIиматлул гьунарданун лахъсса кьимат бищаву хIисаврайсса иш хъанахъишиву.
Поэтесса барча буллалисса ихтилатру бувна Дагъусттаннал халкьуннал чичу Мирза Давыдовлул, Ккавкказуллал чичултрал клубрал хъунмур, поэтесса, публицист, таржумачи Миясат Муслимовал, «Илчи» кказитрал хъунама редактор Руслан Къардашовлул, «Зунттал хъами» журналданул редактор Аьжа АьбдурахIмановал, Мариян Илиясовал цIанийсса «Дараччи» клубрал президент Гульшан Хасаевал ва вице-президент Динара Маммаевал, Дагъусттаннал университетрал доцент, литературовед Ххазина Аминовал.
Вайгу, ихтилатру буллалициригу ца зумату кунма кIицI лаглай бия ПатIимат Штанчаевал «Оьрмулул лахIзарду» тIисса лу бюххансса асарду биян буллалисса бушиву, ванил назмурду буттал аьрщарахасса, оьрмулухасса ччаврил видурцIусса душиву ва буниялттунгу инсантурал дакIурдил яла куртIми ва язими асарду ялун личин буллалисса душиву.
ПатIиматлул хъунмасса барчаллагь увкуна цилла кьини хъун дуван чIарав бавцIусса шяраваллил язисса арсурваврахь: ГьунчIукьат1рал ккурандалул хъунама ХIажибутта ХIусайновлухь, ванал хъиривчу К. Ибрагьимовлухь, лакрал оьрмулуву хъанахъисса цавагу ккалли бансса иш чIарах гьан къабитайсса Зиябуттин ХIажимирзаевлухь, шяраваллил хъунама Мух1ад Штанчаевлухь, школалул директор Малик Къушиевлухь ва цинявппагу шяраваллил агьулданухь. Барчаллагь увкуна мукунма цилла кьинилул программа ярг-чIюлу дурсса халкьуннал артистка Луиза Шахдиловахь, республикалул лайкь хьусса артистътал Дилара Надыровахь ва Аьбдул Мурадовлухь.
Цал уттигу барча буллай гьунар бусса поэтесса, ванил «оьрмулул лахIзарду» талихIрал ва чаннал кIутIу тIутIисса хьуннав тIий буру. ЦIусса назмурдал жужру дунияллийн бувксса кьинирду ччяни дучIаннав !
ПатIимат Рамазанова
