МахIаммадлул арс ДибирмахIаммадов Расул
«Издательство «Лотос» ООО-лул коллектив хъуннасса кьурчIишиврущал буслай бур, хар-хавар бакъа ялун дирсса азарданул жуятува личIи увшиву жула даврил уртакь, Кказит-журналлу итабакьайсса цехрал хъунама ДибирмахIаммадов Расул МахIаммадович.
Хамискьинилия нюжмаркьинилийн, августрал 15-нния 16-ннин бияннин, республикалул кказитру итабакьлакьисса мутталуву, къюкI дарцIуну, ахиратрал хьуну ур ххаллилсса инсан, тIалавшинна дусса пишакар, цIанихсса дус.
Ва ия гьунар бусса, цала коллективрай дакIцIуцIаву дусса, гьарцаннал чIарав ацIан хьхьичIун ливчусса каялувчи. Ванал мудангу дахIаву дуссия республикалул кказитирттал редактортуращал, вайннащал маслихIат бувнуя щаллу байсса даврийн багьлагьисса масъаларттугу.
ДухIан захIматсса кьурчIишивугу кIидачIлай, жижара буллай буру ванал гъан-маччанахь, кIулцириннахь. Ва дакI тIиртIусса, чаннасса симандалущалсса инсаннал аьпагу, ванал цIагу – Издательствалул ва миллатирттал кказитирттал тарихраву абадлий личIантIиссар.
Издательствалул ва республикалул
миллатирттал кказитирттал коллективру
Шяпинал арс МухIад Магьдиев
Уттигъанну аьпалухьхьун лавгунни ххаллилсса лаккучу, жяматран бусравсса ккуркличу, Шяпинал арс МухIад Магьдиев.
Увну ур МухIад 1945-ку шинал октябрьданул 3-нний Ккурккуллал шяраву, Магьихъал Шяпинал ва ХIабибатлул кулпатраву.
Ккурккуллал дянивмур даражалул школагу къуртал бувну, увххун ур Дагъусттаннал политехнический университетравун.
Мунияр махъ цала бусса оьрмулий зий ивкIун ур жаваблувсса къуллугъирттай. ЗахIматрал ххуллу МухIадлул байбивхьуну бур дуки-хIачIиялул ттучандалул директорнал къуллугърая. Мунияр махъ зий ивкIун ур промышленный кьайлул ттучандалул директорну, Россельхозэнергиялул материально-техническая базалул директорну, Дагпотребсоюзрал председательнал хъиривчуну, «Дагестан» гостиницалул директорну ва цаймигу къуллугъирттай. Чурххал бюхттулсса, чIалачIин дусса, даврил сант кIулсса МухIад гьарица даврий най унува каялувчину итайва, ванайн мудан жаваблувсса масъалартту тапшур байва.
МухIад ия шяраваллил жяматран бусравсса, цумур-цагу коллективраву сий дусса, махъ нанисса адамина. Шяпинахъал цинявппагу оьрчIаву кунна, ванавугу дия ляличIисса дугъришиву, чумартшиву, узданшиву.
Ванал хIурмат хъунмасса бия, ккурккуллачIа бакъассагу, цинявппагу ва кIулминначIа.
МухIад аьпалул шаврил кьурчIишиву кIидачIлай, жижара буллай буру кулпатрахь, душваврахь, ссурваврахь, махъсса циняв гъан-маччанахь.
Алжаннул ххари аннав, рухI хъинний дишиннав, махънал оьрмурдай барачат бишиннав.
Ккурккуллал жямат
Юсуплул арс Рамазанов Идрис
Оьрмулул ххюцIалла шинаву хар-хавар бакъа аьпалухьхьун лавгунни Мукьардал шяраватусса Юсуплул ва Зулайхатлул арс Рамазанов Идрис.
Идрис увну ур 1974-кусса шинал. Школа къуртал бувну мукьах, МединститутрацIунсса стоматологиялул техникумгу бувккуну, зий ивкIун ур Республикалул стоматологиялул клиникалий. Муния махъ Москавлийн ивзун, цала пишалий зийгу, яхъанайгу уссия тийх.
ЛичIи хьунни жуятува ххаллилсса нитти-буттал ххаллилсса арс, мурадирал къавхьусса кIива оьрчIгу махъ кьабивтун. Ци банссар, чичрулун чаран лякъин къашай.
Язисса арснацIа шаврил хъуннасса пашманшивугу кIидачIлай, дакIнийхтунусса жижара буллай буру буттахь Юсуплухь, ниттихь Зулайхатлухь, уссур-ссуннахь ва махъсса щалагу агьлу-авладрахь. Идрислул рухI бигьаний дишиннав, имандалий лавгун лякъиннав, махъ ливчIнал оьрмурдай барачат бишиннав.
Мукьардал жямат,
дустал, гьалмахтал
Макьсудлул арс
Кьурбанов ТIалхIат
Оьрмулул 90 шинаву аьпалухьхьун лавгунни ххаллилсса, агьулданул ва жяматрал дянив бусравсса, ЧIяйннал шяравасса Кьурбанов ТIалхIат Макьсудлул арс.
ТIалхIат увну ур 1934-ку шинал ЧIяйннал шяраву Макьсудлул ва ПатIиматлул кулпатраву.
ЧIяйннал шяравусса дянивмур даражалул школагу къуртал бувну, лавгун ур армиялийн. ЛухIи хьхьирил флотрай бурж биттур буллай унува, ванал ппу накьлу хьуну ур. Армиялия увкIун махъ зий айивхьуну ур Ккуллал райондалул Культуралул къатраву. 1968-ку шинал ва увчIуну ур ЧIяйннал советрал председательну, 1976-ку шинал – ЦIаххай Маккаевлул цIанийсса колхозрал парторгну. 1982-ку шинал ивтун ур Ккуллал райондалийсса «Союзпечатьрал» отделениялул начальникну, 1990-ку шинал кIилчингу ивтун ур колхозрал парторгну. Компартия духларгувкун, 1993-ку шиная шийнай, зий уссия колхозрал председательнал хъиривчуну.
ТIалхIат шяравугу, райондалийгу хъинну бусравсса, дустал ххирасса, ххаллилсса инсан ия. Ванал хIалал дурну дур грамотартту, дипломру ва медальлу.
ТIалхIат аьпалул шаврил кьурчIишивугу кIидачIлай, жижара буллай буру кулпатрахь ХIуллахь, ссихь Розахь, оьрчIахь, душнихь, цинявппагу гъан-маччаминнахь. Цал бунагьирттал аьпа баннав, рухI рахIатний дишиннав, махънал оьрмурду лахъи баннав. Амин!
ЧIяйннал жямат
