Дагъусттаннал ЗахIматрал ва социал къайгъурдал министерствалул баян бунни Телеграм-каналлай, Палестиннавасса лихъачалтрах къулагъас дакъар, кумаг бакъар тIисса хаварду гьану бакъасса бушиву ва багьайкунсса кумаг буллай бушиву ва буллантIишиву.
Вайннал бувсмунийн бувну, 195 инсан ур чIумуйну яхъанахъисса кIанай, вайннавугу 97 оьрчI. 2023 шинал ноябрь зуруя шийнмай вайннан дуки-хIачIиялун харж дурну дур 20 миллион арцул, 137 инсаннал ларсун дур Аьрасатнал гражданство, 57 инсан миграциялул сияхIрайн лавсун ур. Вайннан дуллуну дур СНИЛС, ИНН, ОМС-рал полисру. Дузал бувну бур лаххиялул, аьркинмунил. Пособие ласлансса 10 кулпатрал документру аьркиннийн гьан бувну бур, ца кулпат пособие ласлай бур. ХIасул бувну бур оьрус маз лахьхьин буллалисса 3 класс, 3 оьрчI школалийн занай бур, 19 оьрчI — садикрайн.
Дагъусттаннал вузирдаву бюджетрал гьанулий дуклай ур 13 студент. Медициналул кIулшивуртту дусса 25 инсаннал касму цIакь дуллалисса курсру (переподготовка) бувккуну бур. КIия инсан зун увххун ур Республикалул физика-математикалул лицей-интернатравун. Уттигу 6 инсан давурттал щаллу ан хIадурну бур, вай, кIулшивуртту цIакь дуллай, касму магьир дуллай бур зун бухханнин. КIицI ларгсса министерствалул вакилтурал бувсуна лихъачалт бигьалагаврихгу къулагъас душиву, гьарца чулуха аякьалулун ласунсса хIарачат бушиву. Стоматологиялул клиникалийн, хьхьиричIан, тIабиаьтрай бигьалаган, паркирдавун бувцушиву. «Школалийн хIадур ува оьрчI» тIисса акциялул лагрулийгу оьрчIру дарсирдайн аьркинмунил дузал бувантIишиву. Ва ялагу, 4 хIакин «Земский доктор» программалул лагрулий республикалул районнай зунсса сантгу хьушиву.
ПатIимат Рамазанова
