Августрал 14-нний «Анжи-Ареналий» Аьрасатнал художествалул академиялул член-корреспондент, Дагъусттаннал халкьуннал художник, ДР-лул ПаччахIлугърал премиялул лауреат, скульптор МахIаммадаьли Аьлиевлул «АРТ-галереялуву» тIиртIунни Дагъусттаннал машгьурсса художниктурал выставка.

Ва тIитIлатIисса мажлисрай махъру лавхъуна Аьрасатнал ПаччахIлугърал Думалул депутат Хизри Абакаровлул, Да­гъусттаннал халкьуннал художник МахIаммадаьли Аьлиевлул, Дагъусттаннал Художниктурал союзрал хъунама Кьурбанаьли МахIаммадовлул, Дагъусттаннал Музыкантътурал союзрал председатель Хан Башировлул.

Выставка тIитIлай, Хизри Абакаровлул кIицI лавгуна Дагъусттаннайсса машгьур­сса художниктурал творчество хъанахъишиву тамашачитурал дакIру ххари ва рахIат дуккан даврил щаращину. Художникталгу бавтIун, ккаккиярттал дюрхъусса выставка сакин дан бюхъаврихлу депутатнал барчаллагь увкуна МахIаммадаьли Аьлиевлухь.
Скульпторнал бувсуна, ва кьини ккаккиялун дирхьуну душиву 50-нния лирчусса давуртту.

– Выставкалий гьуртту хьу­ссар Дагъусттаннал ц1а дурксса художниктал: Шагьнабат Аьли­мурзаева, Наталья Савельева, Хава Аьлиева, Октай Аьлирзаев, Исмяил Исмяилов, Закарья Закарьяев, ХIабибуллагь ХIайбибуллаев, Зулпукьар Кьурбанов, МахIаммад Моллакаев. Ваний дуссар художниктурал личIи-личIисса шиннардий дирхьусса графикалул, живописьрал, скульптуралул давуртту, – бувсуна МахIаммадаьли Аьлиевлул.

Шиккура ккаккиялун дирхьуну дур Хъюллал шяраватусса, личIи-личIисса жанрардай суратру дихьлахьисса машгьурсса художник ХIабибуллагь ХIабибуллаевлул давурттугу.
– Выставкалул мурад «АРТ-галереялул» даву цIу лаган давур, цIанасса заманалул реализмалул лагрулий суратру дихьлахьисса художниктал бавтIун, вайннал давуртту тамашачитурал хьхьичI дишинсса кIану сакин бавур, – буслай ур ХIабибуллагь ХIайбибуллаев.

Ккаккиялий дирхьусса гьар­ца суратрал дия цилла ляли­чIишиву.
Асар хьумур аьч буллалисса ттизаманнул художниктурал суратру мяйжаннугу дакIнийхтуну дирхьусса дия, мунияту ччимур оьрмулул ва даражалул тамашачинан дурчIлачIиссагу дия.
Суратирттал кьимат бищун ва тамаша буван выставкалийн учIан бюхъайссар ччима инсаннаща.

Р. Къардашов