Тталаткьини, август зурул 27-нний «Дагестанская правда» кказитрал редакциялий хьунни республикалул кIулшивуртту дулаврил идарартту террорданул иширттая мюхчан баврил хIакъиравусса пресс-конференция.

Масъалалул хIакъираву ихтилатгу бувну, журналистътурал суаллахьхьун жавабру дуллуна Росгвардиялул управлениялул зузала, полициялул подполковник Расул СулайманхIажиевлул ва Дагъусттаннал Элмулул ва кIулшивуртту дулаврил министерствалул Информациялул ва аналитикалул центрданул директор Аьбдулмажид Ибрагьимовлул.
– Террорданул иширттая мюхчанну бикIаву мурад­рай закондалул ххуллийсса цукун­сса тIалавшиннарду дуссар кIул­шивуртту дулаврил идарарттая?
– КIулшивуртту дулаврил идарартту террорданул иширттая мюхчан баврихлу жаваб дулайссар идаралул каялувчинал, школа бусса кIанайсса муниципал властьрал ва ихтиярду дуруччай органнал.
НигьачIисса иширттая мюхчан хьун аьркинссар Вневедомственный къаралданул ягу частный предприятиярттал гужирдайну. Ххал ан аьркинссар школалул къатравун увххун нанисса гьарицагу инсан. Дишин аьркинссар сигнализация, камерарду ва лагма-ялттусса кIанттурдайсса радиациялул ва химиялул тагьар кIул дайсса системарду. Щаллу бан аьркинссар террордания мюхчан шаврил паспорт. Мудан ялув бавцIуну бикIан аьркинссар цIу къалачIун, токрая мюхчанну бикIан. Дуллан аьркинссар тренировкартту, ца къахьунмур хьусса чIумал идаралува цукун букканссарив лахьхьин буллалисса. Школалул, садикрал къатравун кIул бакъасса инсантал къабуххан личIлулну бикIан аьркинссар.
Школалул ва садикрал зузалтран кIулну бикIан аьркинссар экстренныйсса тагьарданий гьанавиххи къавхьуну, каялувчитурал ва жаваблувсса зузалтрал тIисса куццуй занакьулу бикIан. Зузалтращал ва дуклаки оьрчIащал дуллан аьркинссар граждан обороналул давуртту, къулай дан аьркинссар школалул техникалул дузалшинна.
– Дагъусттаннай кIулшивуртту дулаврил цими идара буссар хIакьину?
– КIулшивуртту дулаврил ва элмулул министерствалул бусласимунийн бувну, республикалий бур 2600-нния ливчусса кIулшивуртту дулаврил идарартту: 847 оьрчIал багъ, 1468 школа, 74 дянивсса пишалул кIулшивуртту дулайсса, 181 цайми кIулшивуртту дулайсса идара, 40 ларайсса кIулшивуртту дулайсса ва элмулул идара.
– Цукун мюхчан буллай буссар кIулшивуртту дулаврил идарартту?
– ХIакьинусса кьини чIявуми идарарттай бивхьуну буссар иш багьарча га цIана Росгвардиялул вневедомственный къаралданийн леххаву рутайсса кнопкарду. Му бакъассагу, вневедомственный къаралданул патруль ми идарарттая арх бакъа занай буссар.
– Ххалбигьавуртту дуллали­сса чIумал му масъала щаллу бавриву ци диялдакъашивуртту хьунадакьай?
– Мюхчаншиврул масъала щаллу бавриву цукунсса дунугу диялдакъашивуртту ялу-ялун чанну хьунадакьлай дур. Мигу га цIана дукьан дай жаваблувсса зузалтрал. ХьхьичIсса шиннардий аьркинсса куццуй техникалул дузалну къабикIайва, биялну къабикIайва мудан итталу бикIан аьркинсса кIанттурдах буруглансса камерарду, къабикIайва къаралданул постру.
– Террорданул иширттая мюхчан хьунсса тIалавшиннарду къадурурччуну духьурча, ци чаран лякъайссар?
– Диялдакъашивурттал хIа­къираву Росгвардиялул управлениялул зузалтрал жаваблувсса инсантуращал ххуллу ласаву мурадрай, личIи-личIисса идарарттайн чагъарду гьан байссар. ЦIана диялдакъашивуртту дукьан даву мурадрай аьмну 69 чагъар гьан бувссар. КIулшивуртту дулаврил идарарттайн – 3, кIанттул каялувшиннарал хъуниминнайн – 53, мукунма щаллу бувссар 14 протокол.

Андриана Аьбдуллаева