Цила ххаллилсса ппу, лакрал миллатрангу, Дагъусттаннал агьалинангу ххуйну кIулсса Киров Султанов дунияллия лавгсса кьини ванал душнил Светланал нитти-буттал библиотекалувасса луттирду буллунни Расул ХIамзатовлул цIанийсса Миллатрал библиотекалун.

Вай луттирдавух бур театрданул энциклопедия, философиялул энциклопедия, совет литературалул тарих. Мукунма цилла ниттил, Гулизар Султановал, Дагъусттаннал театрданиясса луттирду. Аьлимчу, педагог, жяматийсса ишккакку, жула агьалинайн багьайсса гьарцагу иширал чялишсса гьурттучи, гьунар бусса публицист, политик, философ, лакку макьаннал ва балайрдал автор Киров Султановлул ва диялсса шиннардий Дагъусттаннал литературалул, мазрал ва тарихрал институтраву хьхьичIунсса элмийсса специалистну, А. Къапиевлул цIанийсса Лакрал музыкалул ва драмалул театрдануву зий бивкIсса искусствоведениялул элмурдал кандидат, театрал критик Гулизар Султановал, гьай-гьай, хъинну авадансса библиотека бивкIшиврий махIаттал хьунсса иш бакъар, вай бия элмулул ва творчествалул инсантал, луттирдал инсантал.
Вайннал аьпалул хIурматран чIявусса кьиматрайсса луттирду, кIива мукъуйну «луттирдал ххазина» учирчагу тIайлахьунссар, библиотекалун пишкаш бувавугу вайннал наслугу лайкьну тарбия хьусса бушиврул барашинна дуллалисса алвагьсса давур.

ПатIимат Рамазанова