Офтальмологнал кьини Дагъусттаннал жяматран кабакьу бувайсса штабрайн бувкIунни ДГМУ-рал геронтологиялул ва гериатриялул дуккаврилмур кафедралул хъунмур, доцент Сакинат Хархарова-Маккаева.

Шикку ванил балжину бувсуна ттизаманнул технологиярттай яруннил цIуцIавуртту ялун личин дуллалисса ва вай хъин дуллалисса медициналул шартIирдая.
– Зунма чани чан хьуну къа­ччай бухьурча, мабитару яруннайн гуж багьан. ХIакьинусса кьини яруннан зарал биян буллалавринсса цалчинсса савав инсантал хъунмасса хIаллай компьютердаву, телефоннаву бушиву дур.
ЧIявусса дуклаки оьрчIру бур яруннин чани чан хьуну, чивчумур архну чIалай бунугу, гъанну къачIалачIисса, ягу, гъанну чIалай, архну къачIалачIисса. Яруннин чани чан хъанай байбишин бюхъайссар, инсаннал оьрмулул шиннардих къабурувгун, ччимур чIумал. Чани чан шаву дикIайссар ирсирайх наниссагу, мукунсса цIуцIаву хъин дан хъинну захIматссар, чIивинияцIа хIакиннал ялув ацIаву дикIан аьркинссар, – увкуна ванил.
Ч1урчIав дурна ирсирай нанисса цIуцIавуртту гиччара хъин дулларча, инсан угьара хьунийгу мунан чани бикIантIишиврий.
Сакинат МахIаммадовал бусаврийн бувну, яруннин чани чан хьун къабитавриву хъунма­сса бияла бур дукиялухь, сукку-кьютIулухь, яруннайн гуж багьан къаацIаврихь. Дарсирдайн бачин хьхьичI оьрчIал яруннил чани ххал бан аьркинну бур чара бакъа.