Вай гьантрай Дагъусттаннал бакIчи Сергей Меликов видеоконференцсвязьрал низамрай хьунаавкьунни Федерал ххуллурдал агентствалул каялувчи Роман Новиковлущал. Вайннал ххал бивгьунни «Мюхчансса ва ххуйсса ххуллурду» нацпроект ва ххуллурду лябуккан баврил агьамми масъалартту.
Роман Новиковлул тIимунийну, республикалул ххуллурду ххуй баврил давурттаву лябукку хъанай бур: «Гьашину январьданул 1-ннин федерал ххуллурдал 67,5% ва региондалул ххуллурдал 86,6,% опорный сетьрал норматив тагьарданий бур».
Региондалул бакIчинал бусаврийну, хIакьинусса кьини республикалул бартдиргьуну дур 2030 шинайннин опорный сетьрал 85 % норматив тагьарданийн дуцаврил хIакъиравусса Аьрасатнал ХIукуматрал тапшурлугъру.
– Аьмну лавсун, региондалул Транспортрал министерствалул циняв бакIрайн лавсъсса масъалартту бартбивгьуну бур 97%. Вай циняв хъинчулийсса дахханашивурттал жула ватанлувтурал оьрмулуву къулайшивуртту хьун дуллай дур, – куна Сергей Меликовлул.
Республикалул территориялийх бур федерал 3 ххуллу, вайннул манзил бур 688 километра. Миннува 4 полоса бусса ххуллурду бур 111,2 километралул манзилданийсса. ЦIанасса ппурттуву лябуккулул давуртту дуллай бур Р-21 «Кавказ» федерал ххуллул яла гуж багьлагьими кIанттурдай. Ва ххуллу бухлай бур «Север-Юг» дунияллул халкьуннал дянивсса транспортрал коридорданувун.
2022 шиная шийнмай ва ххуллийх машинартту заназаву 1,5-лийла ххишала хьуну бур, цIана ва ххуллийх занай дур гьантлун 31,4 азарва машина. Шиккусса давуртту бакIуйн дуккан най дур хъиривмур шинал.
Региондалий яла агьамми ххуллурдуну хъанай бур Дарбантуллалгу, МахIачкъалаллалгу, Хасавюртуллалгу лагма буллалими. Вай къуртал буван пландалий ккаккан бувну бур 5 шинава.
«Мюхчансса ва ххуйсса ххуллурду» нацпроектрал лагрулий ларгмур шинал давуртту дурну дур 40 объектрай, норматив тагьарданийн бувцуну бур 136 километралий региондалул ва кIанттурдайсса ххуллурду.
ЦIанасса ппурттувугу Дагъусттаннай зий бур Манас – Сергокала – Первомайское ва Бабаюрт – Гребенская ххуллурдай.
