Августрал 6-нний Дагъусттаннал бакIчи Сергей Меликовлул дунни актуалсса масъаларттал хIакъиравусса батIаву. Ххал бигьлай бия укунсса масъалартту:
Властьрал органнал инсантурал лабизавурттах къулагъас дуллалаву; Дагъусттаннал цаппара районнай тIабиаьтрал биян бувсса зараллу бухлаган баврин хасъсса чаранну лякъаву;
Республикалул делегация Ккавкказуллал инвестициярттал форумрай гьуртту шаврил хIасиллу ва цаймигу.
ДР-лул БакIчинал ва ХIукуматрал Администрациялул каялувчинал хъиривчу, ДР-лул БакIчинал информациялул политикалул управлениялул хъунама Рашид Акавовлул тIимунийну, гьашину июльданий Дагъусттаннал ЦУР-данул сияхIрайн ларсун дур 12 азарунниха лирчусса лабизавуртту. Исполнитель властьрал органнайн тIайла дурккун дур 5,2 азарда лабизаву, муниципалитетирттайн – 3,7 азаруннияр ххишаласса, личIи-личIисса ресурсоснабжениялул идарарттайн – 3 азарунниха лирчусса лабизавуртту.
Вай цинявннул дачIиксса диркIун дур энергоснабжениялуйн дагьайсса ва тIайла дурккун дур Энергетикалул министерствалийн ва «Дагэнерго» идаралийн.
Региондалул бакIчинал бусаврийну, гъансса чIумуй хьунтIий дур Аьрасатнал ХIукуматрал Председательнащалсса хьунабакьаву, микку ххал дигьинтIий бур ва темагу.
– На бусанна энергетикалул комплексрал тагьардания, укунсса тагьар шаврил савав хъанай дур сетьру лапра духдурккун душиву. БувчIин аьркинни, вай ччясса ппурттуву дакьин дуван къабюхъанссар. Жу тавакъю банну жулла программа бартдигьаврил чIун лахъи дуккан дуван. Сетьру жура дакьин дуллан аьркинни муданна. БувчIлай бур, 40 градусрал кIиришиврий инсантал укунсса информациялийну паракьат буван къашайссар. Мунийн бувну, на багьишла итира тIий ура ттигу проблемартту хъанахъиминнахь. Жу хIарачат буллай буру вай къулай дакъашивуртту шиная шинайн чан дуван, – куна региондалул бакIчинал.
СияхIрайн ларсун дур цIинцI цила чIумал къадукьлай бушиврул хIакъиравусса лабизавурттугу, жяматийсса транспортрацIунсса масъаларттугу.
Вай масъаларттал хIакъираву ихтилат бувна МахIачкъалаллал бакIчи Юсуп Умавовлул. Ванал бувсуна масъалартту дузал баву мурадрай дуллалисса давурттая. Шагьрулул бакIчинал бусаврийну, лизинграй ласунтIий бур ттигу 44 автобус дянивмур классрал ва 17 автобус хъунмур классрал. Вай зунтIий бур 7 муниципал маршрутрай.
Рашид Акавовлул гьартану бувсуна цаппара муниципал сакиншиннардай тIабиаьтрал биян бувсса зараллая ва ми бухлаган баншиврул дурсса давурттая.
БатIаврий ххал бивгьуна цаймигу масъалартту.
ХIадур бувссар ХI.Аьдиловлул
