Аьрасатнал цIусса регионнай оьрму нирхиравун бутан зий, захIмат буллай бур тамансса дагъусттанлувтал. Луганскалийсса мизитрал имамну зий ур МухIаммад Ссаламов. Ва Буршиял шяраватуссар, увссар Бабаюртуллал райондалийсса Львовск-4 къутандалий.
РяхцIалку шиннардий ванал нину-ппу къутандалийн бивзун бур, 3 класс шикку къуртал бувну бур. Цал МахIачкъалалив, яла Бабаюртуллал райондалий ккалай ивкIун ур. Школа къуртал байхту, 2 шинайсса аьралий буржгу лавхъун, Буйнакскаливсса Сайпуллагь-кьади Башларовлул цIанийсса мадрасалуву дуклай ивкIун ур. Ва къуртал байхту, практикалий зунттавун гьан увну ур — Къяннал шяравун имамну. 2002-ку шинал Гъумукун гьан увну ур имамнал кумагчину, шиккува шяраваллил, райондалул имамнугу зий ивкIун ур. 2012-ку шинал ва Египетнава увкIсса аьлимначIа, хIапизначIа- хIадисоведначIа Зайнул АьбидиннучIа исламрал кIулшиву куртIгу, цIакьгу дуллай, архIала МахIачкъалаливсса мизитрал имамнугу зий ивкIун ур. Дуклан увххун ур аспирантуралувунгу. МухIаммад зий уссия Лакрал райондалул имамнугу, МахIачкъалаливсса Хъун-мизитрал имамнугу. Динчитурал, аьлимтурал дянив хIурматрайсса, агьалинавугу махъ нанисса инсанни МухIаммад. ЧIярусса шиннардий имамнал даврий зий биялсса опыт бусса МухIаммадлул Луганскалийгу даву дюхъан дувантIишиву кIулну, Дагъусттаннал Муфтиятрал тIайла увккун ур ва Луганскалийн.
Цайнна дурсса вихшала цIакь дуван, МухIаммадгу бюхъу-хIарачатрай зий ур, шиккусса бусурман агьалинан исламрал тIайласса ххуллу цумурдив, эбадат цукун дуван аьркинссарив, тIабиаьт, багьу-бизу, аьдлу-низам цукунсса дикIан аьркинссарив бувчIин буллай.
Жувагу ванан чIа учинну дуллалимуниву тIайлабацIу!
